Ahmedabad Plane Crash / સાથે રહેતા-સાથે જમતા બે મિત્રો ગુમાવવાનો આઘાત ક્યારેય...! સુરતના MBBS વિદ્યાર્થીની આપવીતિ

અમદાવાદ પ્લેન ક્રેશ દુર્ઘટનાને આજે એક વર્ષ પૂર્ણ થયું છે. છતાં આ ભયાનક ઘટનાની યાદો આજે પણ અનેક લોકોના મનમાં તાજી છે. આ દુર્ઘટનામાં સુરતના MBBS વિદ્યાર્થી યશ ખત્રી પણ ગંભીર રીતે ઇજાગ્રસ્ત થયા હતા. એક વર્ષ બાદ પણ તે દિવસની ભયાનક ક્ષણો તેમને આજે પણ સતાવે છે.

પ્લેન ક્રેશ દુર્ઘટના દરમિયાન યશ ખત્રી

અમદાવાદમાં થયેલી પ્લેન ક્રેશ દુર્ઘટના દરમિયાન યશ ખત્રી મેડિકલ કોલેજના મેસમાં હાજર હતા. જમ્યા બાદ તેઓ બહાર નીકળતા હતા ત્યારે અચાનક જોરદાર ધડાકા સાથે વિમાન ક્રેશ થયું હતું. ઘટનાની ગંભીરતા એટલી હતી કે થોડી જ ક્ષણોમાં તેમના પર દીવાલ ધરાશાયી થઈ હતી. આ અકસ્માતમાં યશને માથા અને હાથમાં ગંભીર ઈજાઓ પહોંચી હતી.

યશના મિત્રોએ તાત્કાલિક મદદ

આકસ્મિક રીતે સર્જાયેલી આ ઘટનામાં યશના મિત્રોએ તાત્કાલિક મદદ કરી હતી અને તેમને હોસ્પિટલ ખસેડ્યા હતા. હોસ્પિટલમાં તેમની સારવાર કરવામાં આવી હતી અને બાદમાં તેઓ સ્વસ્થ થયા હતા. જોકે શારીરિક ઈજાઓ સમય સાથે ઠીક થઈ ગઈ, પરંતુ આ દુર્ઘટનાએ તેમના મન પર એવો ઘાવ છોડી દીધો છે જે આજે પણ ભરાયો નથી.

યશે પોતાના નજીકના મિત્રો ગુમાવ્યા

આ દુર્ઘટનામાં યશે પોતાના નજીકના મિત્રો ગુમાવ્યા હતા. તેમની સાથે હોસ્ટેલમાં અભ્યાસ કરતા ચાર વિદ્યાર્થીઓના મોત થયા હતા. જેમાં તેમના બે નજીકના મિત્રો અને બે સિનિયર વિદ્યાર્થીઓનો સમાવેશ થાય છે. સાથે રહેતા, સાથે ભણતા અને સાથે જમતા મિત્રોને ગુમાવવાનો આઘાત આજે પણ યશના મનમાં જીવંત છે.

યશ કહે છે કે એક વર્ષ વીતી ગયું હોવા છતાં તે દિવસની દરેક ક્ષણ તેમને સ્પષ્ટ રીતે યાદ છે. આજે પણ તેઓ એ જ હોસ્ટેલમાં રહે છે. પરંતુ જ્યારે પણ હોસ્ટેલ ઉપરથી કોઈ વિમાન પસાર થાય છે ત્યારે અકસ્માતની ભયાનક યાદો ફરી તાજી થઈ જાય છે. વિમાનનો અવાજ સાંભળતા જ તેમના મનમાં ડર અને ગભરાટનો માહોલ સર્જાય છે.

આ પણ વાંચો : એક એવો ઘા.., જે ક્યારેય નહીં રૂઝાય! કોઈએ દીકરો-દીકરી ગુમાવ્યા તો કોઈએ માતા-પિતા

યશ ખત્રી માટે આ ઘટના માત્ર એક અકસ્માત નહોતી, પરંતુ જીવનને બદલાવી નાખનારો અનુભવ હતો. પોતાના મિત્રો ગુમાવ્યાનું દુઃખ અને મોતને નજીકથી જોયાની યાદો આજે પણ તેમને સતત સતાવે છે. અમદાવાદ પ્લેન ક્રેશને એક વર્ષ પૂર્ણ થયું છે, પરંતુ આ દુર્ઘટનામાં બચી ગયેલા લોકો અને પોતાના સ્વજનો ગુમાવનારા પરિવારો માટે એ દુઃખદ યાદો આજે પણ એટલી જ તાજી છે. યશ ખત્રી જેવા અનેક લોકો માટે આ ઘટના માત્ર એક અકસ્માત નહીં, પરંતુ જીવનભરનો ઘાવ બની ગઈ છે

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ