ભયાનક / નાઇજીરિયામાં હિંસા કેમ નથી અટકતી? ગામ પર હુમલો કરી 30 લોકોની નિર્દયી હત્યા

નાઇજીરિયાના ઉત્તર-પશ્ચિમ વિસ્તારમાં એક વખત ફરીથી બંદૂકધારીઓના હુમલાએ આખા વિસ્તારને હચમચાવી દીધો છે. જેમાં કડુના રાજ્યના કાઉરા વિસ્તારમાં આવેલા નારીડોન ગામમાં રવિવારે મોડી રાત્રે આ ઘટના બની હતી. જેમાં સ્થાનિકોના જણાવ્યા મુજબ આ હુમલામાં ઓછામાં ઓછા 30 લોકોના મોત થયા છે જ્યારે અનેક લોકો ઘાયલ થયા છે.આ હુમલા બાદ આખા ગામમાં ભય અને દહેશતનો માહોલ છવાઈ ગયો છે.

• સ્થાનિક સંગઠનનો આરોપ

આ અંગે સદર્ન કડુના પીસ એન્ડ સિક્યોરિટી નેટવર્કના અધ્યક્ષ ડેરેક ક્રિસ્ટોફરે જણાવ્યું કે, આ હુમલો રવિવારે મોડી રાત્રે થયો હતો. જેમાં તેમને કહ્યું કે આ જ ગામ પર પાછલા વર્ષે પણ આ સમયે હુમલો થયો હતો. તેમનો આરોપ છે કે સરકાર આ વિસ્તારને સશસ્ત્ર હુમલાઓથી બચાવવામાં સંપૂર્ણપણે નિષ્ફળ નીવડી છે. તેમનો આરોપ છે કે સરકાર દ્વારા આ સમુદાયની સુરક્ષા માટે કોઈ ગંભીર પ્રયાસ જ થતો નથી.

• હુમલા બાદની સ્થિતિ

આ અંગે સ્થાનિકોએ જણાવ્યું કે મૃતદેહોને નજીકના હોસ્પિટલમાં લઈ જવામાં આવ્યા છે અને ઘાયલોની સારવાર ચાલુ છે. મૃતકોના અંતિમ સંસ્કારની તૈયારીઓ શરૂ થઈ ગઈ છે. આ હુમલા બાદ આખા ગામમાં ભય અને તણાવનું વાતાવરણ ઉભું થયું છે. જેમાં અનેક પરીવારોએ તેમના સભ્યોને ગુમાવ્યા છે અને લોકો ભવિષ્ય અંગે ચિંતામાં છે.

• કોણે લીધી હુમલાની જવાબદારી ?

આ હુમલાની જવાબદારી અત્યાર સુધી કોઈ સંગઠને લીધી નથી. તેમ છતાં નાઇજીરિયાના ઉત્તર-પશ્ચિમ અને ઉત્તર-મધ્ય વિસ્તારોમાં 'બેન્ડિટ' તરીકે ઓળખાતા સશસ્ત્ર ગિરોહો નિયમિતપણે આવા હુમલા અને અપહરણ કરતા રહે છે. આ ગિરોહોમાં મોટા ભાગે એવા પૂર્વ પશુપાલકોનો સમાવેશ થાય છે જેઓ ખેડૂતો સાથેના સંઘર્ષ બાદ હથિયારો ઉઠાવી લીધા છે.

વધુ વાંચો : રશિયા-યુક્રેન યુદ્ધમાં ફરી કોમર્શિયલ જહાજ પર હુમલો, બે ભારતીય નાવિક લાપતા

• નાઇજીરિયામાં હિંસાનું મુખ્ય કારણ

નાઇજીરિયા માત્ર બેન્ડિટથી જ પરેશાન નથી પણ બોકો હરામ અને ઇસ્લામિક ટેસ્ટ વેસ્ટ આફ્રિકા પ્રોવિન્સ જેવા સંગઠનોથી પણ પ્રભાવિત છે. આ તમામ હિંસક પ્રવૃત્તિઓને કારણે સામાન્ય નાગરિકોની સુરક્ષા એક મોટી ચિંતાનો વિષય બની ગઈ છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ