IND vs WI / વેસ્ટ ઈન્ડિઝ સામે આજથી રોહિત-વિરાટનું 2027 વર્લ્ડ કપ મિશન, ટીમ ઈન્ડિયા પહેલા બોલિંગ કરશે

એક તરફ મેદાન પર ભારત અને વેસ્ટ ઇન્ડીઝ વચ્ચે વનડે શ્રેણીની શરૂઆત થઈ રહી છે, તો બીજી તરફ કરોડો ભારતીય ક્રિકેટ ચાહકોની નજર બે દિગ્ગજ ખેલાડીઓ પર ટકેલી છે. વિરાટ કોહલી અને રોહિત શર્મા માટે આજની મેચ માત્ર એક વનડે મેચ નથી, પરંતુ 2027ના વનડે વર્લ્ડ કપની તૈયારીઓની શરૂઆત પણ માનવામાં આવી રહી છે. બંને ખેલાડીઓ માટે આ તેમનો છેલ્લો વનડે વર્લ્ડ કપ હોઈ શકે છે અને વર્લ્ડ કપ બાદ તેઓ પોતાની આંતરરાષ્ટ્રીય કારકિર્દીને અલવિદા કહે તેવી શક્યતા છે.

ભારત અને વેસ્ટ ઇન્ડીઝ વચ્ચે ત્રણ મેચની વનડે શ્રેણીનો પ્રથમ મુકાબલો આજે તિરુવનંતપુરમમાં રમાઈ રહ્યો છે. મેચમાં ભારતીય ટીમે ટોસ જીતીને પ્રથમ બોલિંગ કરવાનો નિર્ણય લીધો છે. આ સાથે જ ભારતીય ટીમમાં એક યુવા ઓલરાઉન્ડરને આંતરરાષ્ટ્રીય વનડે ક્રિકેટમાં ડેબ્યૂ કરવાની તક પણ મળી છે. આજે ઓલરાઉન્ડર નમન ધીરે ટીમ ઈન્ડિયા માટે પોતાનો વનડે ડેબ્યૂ કર્યો છે. નમન ધીરે તાજેતરમાં શેર-એ-પંજાબ ટી20 લીગમાં સારું પ્રદર્શન કર્યું હતું. આ ઉપરાંત ઘરેલુ ક્રિકેટમાં પણ તેણે સતત સારું પ્રદર્શન કરીને પસંદગીકારોનું ધ્યાન ખેંચ્યું છે. હવે તેને આંતરરાષ્ટ્રીય સ્તરે પોતાની ક્ષમતા સાબિત કરવાની તક મળી છે.

હર્ષિત રાણાની જગ્યાએ નમન ધીરને પ્લેઇંગ ઇલેવનમાં સ્થાન આપ્યું

કેપ્ટન શુભમન ગિલે હાર્દિક પંડ્યા અને હર્ષિત રાણાની જગ્યાએ નમન ધીરને પ્લેઇંગ ઇલેવનમાં સ્થાન આપ્યું છે. નમન ધીર પાસે બોલિંગ કરવાની સાથે ઝડપી બેટિંગ દ્વારા ટીમ માટે નીચેના ક્રમમાં મહત્વનું યોગદાન આપવાની ક્ષમતા છે. આ જ કારણોસર તેને વેસ્ટ ઇન્ડીઝ સામેની પ્રથમ વનડે માટે ટીમમાં સામેલ કરવામાં આવ્યો છે. બીજી તરફ વિરાટ કોહલી અને રોહિત શર્મા ફરી એકવાર ભારતીય વનડે ટીમમાં સાથે જોવા મળી રહ્યા છે. બંને દિગ્ગજ ખેલાડીઓ ટેસ્ટ અને ટી20 ફોર્મેટમાંથી નિવૃત્તિની જાહેરાત કરી ચૂક્યા છે. હાલમાં બંને માત્ર વનડે ક્રિકેટ રમી રહ્યા છે અને તેમનો મુખ્ય ઉદ્દેશ્ય આગામી 2027 વનડે વર્લ્ડ કપમાં ભારતને ટ્રોફી અપાવવાનો છે.

2011માં મહેન્દ્ર સિંહ ધોનીની કેપ્ટનશીપ

ભારતીય ટીમે છેલ્લે 15 વર્ષ પહેલાં એટલે કે 2011માં મહેન્દ્ર સિંહ ધોનીની કેપ્ટનશીપ હેઠળ વનડે વર્લ્ડ કપ જીત્યો હતો. ત્યારબાદ 2023ના વનડે વર્લ્ડ કપમાં ભારત રોહિત શર્માની કેપ્ટનશીપ હેઠળ ફાઇનલમાં પહોંચ્યું હતું. જોકે, ફાઇનલમાં ઓસ્ટ્રેલિયા સામે ભારતને હૃદયદ્રાવક હારનો સામનો કરવો પડ્યો હતો અને વર્લ્ડ કપ જીતવાનું સપનું અધૂરું રહ્યું હતું.

નજર ફરી એકવાર વર્લ્ડ કપ ટ્રોફી પર

હવે ભારતીય ટીમની નજર ફરી એકવાર વર્લ્ડ કપ ટ્રોફી પર છે. 2027નો વર્લ્ડ કપ વિરાટ કોહલી અને રોહિત શર્મા માટે ખાસ બની શકે છે, કારણ કે બંને માટે આ કારકિર્દીનો અંતિમ વનડે વર્લ્ડ કપ રહેવાની શક્યતા છે. તેથી આજથી શરૂ થયેલી વેસ્ટ ઇન્ડીઝ સામેની શ્રેણી બંને દિગ્ગજોની આગામી સફર માટે પણ મહત્વપૂર્ણ બની શકે છે.

ટીમ ઈન્ડિયાની પ્લેઇંગ ઇલેવન

વેસ્ટ ઇન્ડીઝ સામેની પ્રથમ વનડે માટે ભારતીય ટીમમાં રોહિત શર્મા, શુભમન ગિલ, વિરાટ કોહલી, રુતુરાજ ગાયકવાડ, કેએલ રાહુલ, નમન ધીર, રવિન્દ્ર જાડેજા, નીતિશ કુમાર રેડ્ડી, ગુરનુર બ્રાર, કુલદીપ યાદવ અને પ્રસીદ કૃષ્ણનો સમાવેશ કરવામાં આવ્યો છે. શુભમન ગિલ ટીમના કેપ્ટન છે, જ્યારે કેએલ રાહુલ વિકેટકીપરની ભૂમિકા નિભાવશે. ટીમમાં અનુભવ અને યુવા જોશનું મિશ્રણ જોવા મળી રહ્યું છે. એક તરફ રોહિત અને વિરાટ જેવા દિગ્ગજ ખેલાડીઓ છે, તો બીજી તરફ નમન ધીર જેવા યુવા ખેલાડીને પોતાની પ્રતિભા બતાવવાની તક મળી છે.

આ પણ વાંચો : IND vs WI : રોહિત-કોહલીની વાપસી વચ્ચે તિરૂવનંતપુરમમાં વરસાદનું સંકટ, ફેન્સની ચિંતા વધી

આ રીતે વેસ્ટ ઇન્ડીઝ સામેની પ્રથમ વનડે ભારતીય ટીમ માટે અનેક રીતે મહત્વપૂર્ણ બની છે. મેચની શરૂઆત ટોસથી થઈ ગઈ છે અને ભારતે પ્રથમ બોલિંગ કરવાનો નિર્ણય લીધો છે. પરંતુ મેચના પરિણામ ઉપરાંત ચાહકોની નજર ખાસ કરીને વિરાટ કોહલી અને રોહિત શર્મા પર રહેશે. બંને દિગ્ગજ ખેલાડીઓ 2027ના વર્લ્ડ કપ માટે પોતાની સફર કેવી રીતે આગળ વધારે છે અને નમન ધીર પોતાના ડેબ્યૂમાં કેવું પ્રદર્શન કરે છે, તેના પર સૌની નજર રહેશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ