રજાની મજા બગડી! / અમદાવાદમાં કેમ હડતાળ પર ઉતર્યા ઘરકામ કરતાં બહેનો? અને વર્કિંગ વુમન્સનું વધ્યું ટેન્શન, ન્યૂયર પાર્ટીના રંગમાં પડ્યો ભંગ

• અમદાવાદમાં ઘરકામ કરનારાઓએ ગૃહિણીઓ માટે મુશ્કેલી ઉભી કરી છે.
• કામવાળા બહેનો હડતાળ પર ઉતરી જતા ગૃહિણીઓની રજાની મજા બગડી. 
• શું છે કામવાળા બહેનોની હડતાળનું કારણ ચાલો જાણીએ.. 

આજે વર્ષ 2023નો છેલ્લો દિવસ છે અને આવતીકાલથી નવા વર્ષ 2024 ની શરૂઆત થશે. અમદાવાદ સહિત રાજ્યભરમાં થર્ટી ફર્સ્ટની ઉજવણી અને નવા વર્ષને આવકારવા સૌ કોઈમાં થનગનાટ છે. પરંતુ થર્ટી ફર્સ્ટની ઉજવણી પહેલા જ અમદાવાદમાં કામવાળા બહેનોએ ગૃહિણીઓની મુશ્કેલી વધારી દીધી છે.

વાત એમ છે કે અમદાવાદના સાઉથ બોપલ વિસ્તારમાં આવેલા ઓર્ચિડ એલીગન્સ અને ગાલા મારવેલાના કામવાળાઓ હડતાળ પર ઉતરી ગયા છે. અહીં 110 જેટલા કામવાળા બહેનો એક સાથે હડતાળ પર ઉતરી જતા ગૃહિણીઓ મુંઝવણમાં મુકાઈ છે. પણ આ હડતાળ પાછળનું કારણ શું છે?

કામવાળા બહેનોની માગ છે કે, તેને ચૂકવાતા મહેનતાણામાં વધારો કરવામાં આવે. હાલમાં તેઓને એક કામના 800 રૂપિયા આપવામાં આવી રહ્યા છે અને આ મહેનતાણુ વધારીને હજાર રૂપિયા કરવાની માગણી કરવામાં આવી છે. આ માંગ સાથે તેઓનું કહેવું છે કે, મોંઘવારી સાથે ભાવમાં વધારો થવો જોઈએ, જે નથી થઇ રહ્યો. ઘરના ભાડા મોંઘા થયા છે, આવી સ્થિતિમાં પરિવારનું ગુજરાન ચલાવું મુશ્કેલ બન્યુ છે. 

વાંચવા જેવુ: ઉત્તરાયણ પર પતંગના શોખીન ગુજરાતીઓ : ધાબું ભાડે લેવા માટે 1 લાખ રૂપિયા પણ આપવા તૈયાર, અમદાવાદની પોળમાં એવું તો શું છે ખાસ 

હવે પરિસ્થિતિ કઇંક એવી છે કે એક તરફ કામવાળાઓની હડતાળ તો બીજી તરફ ઘર માલિકો પરેશાન થઈ રહ્યાં છે. રજાના દિવસોમાં જ કામવાળા બહેનો હડતાળ પર ઉતરી જતા રજાની મજા બગડી છે. જોકે પોતાનો પક્ષ રજૂ કરતાં ઘર માલિકોનું કહેવું છે કે, કામવાળાની રજાઓમાં તેનો પગાર નથી કપાવામાં આવતો. તેમજ તહેવારમાં બોનસ પણ આપતા હોવાનો ઘર માલિકો દાવો કરી રહ્યાં છે.

આમ છતાં કામવાળા બહેનોની એક જ માગ છે કે તેનું મહેનતાણું વધારવામાં આવે. જો કે હાલ અચાનક જ કામવાળા બહેનો હડતાળ પર ઉતરી જતાં ખાસ કરીને વર્કિગ વૂમનની મુશ્કેલીમાં વધારો થયો છે. ત્યારે હવે આ સમસ્યાનો ઉકેલ ક્યારે આવે છે તે જોવું રહ્યું.