ઉત્તરાયણ સ્પેશયલ / ઉત્તરાયણ પર પતંગના શોખીન ગુજરાતીઓ : ધાબું ભાડે લેવા માટે 1 લાખ રૂપિયા પણ આપવા તૈયાર, અમદાવાદની પોળમાં એવું તો શું છે ખાસ

• અમદાવાદ પોળોમાં ઉત્તરાયણની તૈયારી
• નવેમ્બરથી અગાસીનું બુકિંગ, રૂ.25 હજારથી રૂ.1 લાખ ભાડુ
• દેશ-વિદેશના લોકો કરશે ઉજવણી, ફૂલ પેકેજ સાથે આખા દિવસનું બુકિંગ
• નાસ્તા, જમવા સાથે પતંગ ચગાવવાની મોજ

Uttarayan 2024 : ઉત્તરાયણ શબ્દ આવે એટલે અમદાવાદની જ ઉત્તરાયણ યાદ આવે છે. એમાં ખાસ કરીને અમદાવાદ શહેરની મધ્યમાં આવેલી પોળો. માત્ર અમદાવાદ જ નહીં પરંતુ ગુજરાત ભરમાંથી લોકો અહીંયા ઉત્તરાયણ કરવા આવે છે. મહત્વનું છે કે, બોલીવુડના કલાકારો સહિતના લોકો પણ અમદાવાદ ઉત્તરાયણ કરવા માટે સ્પેશ્યલ આવતા હોય છે ત્યારે પોળમાં વસતા લોકો પણ પોતાની અગાસી એક દિવસ માટે ભાડે આપીને સારી એવી આવક પ્રાપ્ત કરી રહ્યા છે.

નવેમ્બર મહિનામાં જ શરૂ થઈ જાય છે બુકિંગ 
VTV ન્યૂઝની ટીમે લોકો સાથે વાત કરતા જાણવા મળ્યું હતું કે, ઉત્તરાયણની ઉજવણી માટે નવેમ્બર મહિનાથી જ બુકિંગ શરૂ કરી દેવામાં આવતું હોય છે જ્યારે ઘણા લોકો ઓગસ્ટ માંથી પણ ઇન્કવાયરી શરૂ કરી દે છે. શરૂઆતમાં 25,000થી ભાડું લેવામાં આવે છે પરંતુ જેમ જેમ ઉત્તરાયણ નજીક આવે છે ત્યારે તેનું ભાડું પણ વધારો થાય છે એટલે કહી શકાય કે 25 હજારથી 1 લાખ સુધીનું ભાડું હોય છે. જેમાં પણ અમુક પ્રકારના પેકેજ કરવામાં આવે છે.

જાણો શું-શું હોય છે ઉત્તરાયણના એ ખાસ પેકેજમાં ? 
સ્થાનિકોએ જણાવ્યું હતું કે, પરિવારમાંથી કેટલા લોકો આ પેકેજનો લાભ લે છે. અને પેકેજના વધારે તેમની સુવિધા નક્કી કરવામાં આવે છે. જેમાં સવારે ચા ,નાસ્તો બપોરે ઊંધિયું, પૂરી, જલેબીનું ભોજન બપોરે ભોજન અને રાત્રે પણ ભોજન આપવામાં આવે છે. આ ઉપરાંત તલની અને સિંગની ચીકી લાડુ ધાબા ઉપર ડીજે સેટ, માઈક અને બેસવા માટેની ખુરશીઓની પણ વ્યવસ્થા કરવામાં આવે છે. જોકે ઘણી જગ્યાએ ભોજન વિનાના પેકેજ પણ આપવામાં આવે છે.

ઉત્તરાયણથી થાય છે રોજગારનું સર્જન 
ઉત્તરાયણ દિવસે આવી રીતે એક દિવસ ભાડે આપવાથી સ્થાનિક લોકોમાં એક પ્રકારનું રોજગારીનું સર્જન થયું છે. અનેક જગ્યાએ જમવા સાથેના પેકેજ આપવામાં આવે છે. જેમાં પતંગ ચગાવનારને અને તમામ પ્રકારની સુવિધાઓ આપવામાં આવે છે અને તેમાં પણ ફુલ ડે અને હાફ ડે પ્રમાણે પેકેજ નક્કી કરવામાં આવતા હોય છે. અને છેલ્લા કેટલાક વર્ષોથી આ ધાબા ભાડે આપવાનું ચલણ વધુ હોવાથી બોર્ડમાં રહેતા મધ્યમ વર્ગના લોકો માટે રોજગારીનું સર્જન થયું છે.