વિવાદ / મહાકાલ મંદિરમાં મોરારી બાપુએ એવું તે શું કર્યું કે મચી બબાલ, પૂજારીઓને પડ્યો વાંધો, જાણો મામલો

• મોરારી બાપુના મહાકાલના ગર્ભગૃહમાં પ્રવેશને લઈને વિવાદ
• મોરારી બાપુના પહેરવેશને લઈને બબાલ
• મોરારી બાપુએ માથા પર સફેદ કપડું બાંધ્યું હતું

મધ્યપ્રદેશના ઉજ્જૈન ખાતે એક દિવસીય રામકથાના અવસર પર કથાકાર મોરારી બાપુ ઉજ્જૈન ગયા હતા. આ દરમિયાન તેમણે બાબા મહાકાલના ગર્ભગૃહમાં જઇને ભગવાન મહાકાલનો જળાભિષેક અને પૂજન પણ કર્યું હતું. જેને લઈને હવે વિવાદ શરૂ થયો છે. ગર્ભ ગૃહમાં મોરારી બાપુ જે પહેરવેશ પહેરીને ગયા હતા તેને લઈને પૂજારી મહાસંઘ દ્વારા વિરોધ વ્યક્ત કરાઈ રહ્યો છે. અખિલ ભારતીય પૂજારી મહાસંગ દ્વારા કહેવામાં આવ્યું છે કે મોરારી બાપુ એ માથા પર સફેદ કપડું બાંધ્યું હતું અને સફેદ ધોતી પહેરી હતી. જે મંદિર પ્રવેશની મર્યાદાની બહાર છે. 

સરસ્વતી શિશુ મંદિરમાં રામ કથાનું આયોજન

નોંધનીય છે કે મુરારી બાપુના વ્યાસાસને 5 ઓગસ્ટે ઉજ્જૈનમાં મહાકાલ લોક નજીક આવેલા સરસ્વતી શિશુ મંદિરમાં રામ કથાનું આયોજન કરવામા આવ્યું હતું. જેના ભાગરૂપે મુરારી બાપુ ત્યાં પહોંચ્યા હતા. જ્યા તેઓના હજારો અનુયાયીઓની પણ હાજરી હતી. બાદમાં બાપુ મહાકાલેશ્વર જ્યોતિર્લિંગ પહોંચ્યા હતા.

પ્રમુખ મહેશ પૂજારીએ જણાવ્યું કે...
વિવાદને લઈને અખિલ ભારતીય પૂજારી ફેડરેશનના પ્રમુખ મહેશ પૂજારીએ જણાવ્યું કે મહાકાલ મંદિરના ગર્ભગૃહમાં પ્રવેશવા માટે અલગ વ્યવસ્થા છે. જેનું પાલન કરવું જરૂરી છે. જે રીતે મસ્જિદોમાં ટોપીનો નિયમ હોય છે, ગુરુદ્વારામાં માથા પર પાઘડીનો નિયમ હોય છે, તો મહાકાલ સમક્ષ ક્યારેય પણ માથા પર પાઘડી બાંધી ને જવામાં આવતું નથી. ભક્તો માત્ર ધોતી પહેરીને જ પ્રવેશ કરી શકે છે. પરંતુ બાપુએ ધોતી અને માથા પર કફન બાંધી રાખ્યું હતુ.

બીજી બાજુ મુરારી બાપુએ આ મામલે કહ્યું હતું કે 12 જ્યોતિર્લિંગ યાત્રા દરમિયાન તિરુપતિ બાલાજીના દર્શન થયા હતા. ત્યાંની પરંપરા મુજબ મેં મંદિરમાં મુંડન કરાવ્યું હતું અને પછી ગુજરાતી પાઘડી પહેરી હતી. મારા દાદા, પિતા અને આગળની પેઢીઓએ આ ગુજરાતી વિશિષ્ટ પાઘડી પહેરી છે. તે સૌરાષ્ટ્રના પરંપરાગત પહેરવેશ છે.