ગુજરાત યુથ કોંગ્રેસના ટ્વીટ હેન્ડલ પર કેન્દ્ર સરકારને સમર્થન
યુથ કોંગ્રેસે PM મોદીના કાર્યોના કર્યા વખાણ
#ModiHaiToMumkinHaiથી કર્યું ટ્વીટ
સોશિયલ મીડિયા સાઇટ હેક થવાના બનાવો વધી રહ્યા છે. ત્યારે આજે ગુજરાત યુથ કોંગ્રેસનું ટ્વિટર એકાઉન્ટ હેક થયું હોવાના દાવા થઈ રહ્યા છે. કારણ કે ગુજરાત યુથ કોંગ્રેસના ટ્વીટર હેન્ડલ પર થોડી ક્ષણો માટે કેન્દ્ર સરકારને સમર્થન આપતી પોસ્ટ મુકાઇ હતી. જેમાં યુથ કોંગ્રેસે PM મોદીના કાર્યોના વખાણ કર્યા હતા અને લખવામાં આવ્યું હતું કે જે કામનું શિલાન્યાસ અમે કરીએ છીએ તેનું ઉદ્ઘાટન પણ અમે જ કરીએ છીએ. #ModiHaiToMumkinHai ના ટેગનો પણ ઉપયોગ કરવામાં આવ્યો હતો.
ટ્વીટર એકાઉન્ટ હેક થયું હોવાનો કોંગ્રેસે કર્યો દાવો
કેન્દ્ર સરકારની સમર્થન કરતી પોસ્ટ ગુજરાત કોંગ્રેસમાં ટ્વિટ થતાં કોંગ્રેસ ખેમાંમાં હડકંપ મચ્યો હતો. અચાનક કેન્દ્ર સરકાર સમર્થક પોસ્ટથી ચર્ચાઓ તેજ બની હતી. ટ્વીટર એકાઉન્ટ હેક થયું હોવાનો કોંગ્રેસ દાવો કરી રહી છે. કોઈ વિધ્નસંતોષી દ્વારા આ કાર્ય કરાયું હોવાની વાતો થઈ રહી છે
સાયબર ક્રાઇમમાં ફરિયાદ કરીશું: કોંગ્રસ
સમગ્ર મામલે ભાજપ અને કોંગ્રેસના નેતાઓની પ્રતિક્રિયા સામે આવી છે. કોંગ્રેસ નેતા હેમાંગ રાવલે કહ્યું હતું કે ગુજરાત યૂથ કોંગ્રેસની છબી ખરડાય તેને લઈ ટ્વીટર એકાઉન્ટ હેક કરવામાં આવ્યું છે. આગળ જતા અમે આની ગહન તપાસ કરાવીશું જરૂર જણાશે તો સાયબર ક્રાઇમમાં ફરિયાદ પણ કરવામાં આવશે. સાથે કહ્યું હતું કે ટ્વિટ એકાઉન્ટ હેક કરી વિપક્ષી પાર્ટીઓનો મજાબ લેવાનો હોય તો સાંખી લેવાશે નહીં.
ભાજપ નેતાની પ્રતિક્રિયા
તો બીજી તરફ ભાજપ તરફથી યજ્ઞેશ દવે મીડિયા ક્વીનર દ્વારા નિવેદન આપવામાં આવ્યું કે કોંગ્રેસનું ટ્વિટર એકાઉન્ટ પ્રથમ દ્રષ્ટીએ હેક થયું હોય તેવુ લાગતું નથી કારણ કે રાષ્ટ્રપતિની ચૂંટણી દરમિયાન સતત કોંગ્રેસ નેતાઓના મતદાનની અપેડટ થતી હતી. એ દરમિયાન હેક ન થઈ શકે, કોઈએ શિડ્યુલ પોસ્ટ કરી હોય તો આવું બની શકે તેવો મત વ્યક્ત કર્યો હતો અને કહ્યું હતું કે જો કોંગ્રેસ કહે છે કે એકાઉન્ટ હેક થયું છે તો ટ્વીટર પાસે જઈ ચેક કરાવે, ખોટા આડકતરી રીતે આરોપ કરવાનું બંધ કરે.
ગુજરાત પોલીસનું પણ ટ્વિટર એકાઉન્ટ થયું હતું હેક
આપને જણાવી દઈએ કે ગત 11 જુલાઇને સોમવારે રાત્રે 9 30 થી 10 વાગ્યાની આસપાસ ગુજરાત પોલીસનું ટ્વીટર એકાઉન્ટ હેકર્સે હેક કરી લીધું હતું. ગુજરાત પોલીસના આઈડીમાં ઇલોન મસ્ક લખ્યું હતું, તેમજ પ્રોફાઇલમાં પણ રોકેટનો ફોટો લગાવ્યો હતો. મહત્વનું છે કે હેકર્સ વિરુદ્ધ પોલીસે વિશેષ અભિયાન ચલાવ્યું હતું. જેથી હેકર્સે ગુજરાત પોલીસનું એકાઉન્ટ જ હેક કરી પડકાર આપ્યો હતો સાયબર ક્રાઈમ વિભાગની કાર્યવાહીથી હેકર્સ પરેશાન હતા જેથી ગુજરાત પોલીસનું આઈડી હેક કરવાની કરતૂત કરી હતી.
