ઉત્તરાયણ 2025 / દેશના વિવિધ રાજ્યોમાં આ રીતે થાય છે મકર સંક્રાતિની ઉજવણી, જાણો ધાર્મિક મહત્વ

હિંદુ ધર્મમાં મકરસંક્રાંતિનો તહેવાર ખૂબ જ વિશેષ માનવામાં આવે છે. સૂર્ય દેવતા મકર રાશિમાં પ્રવેશ્યા પછી મકરસંક્રાંતિનો તહેવાર ઉજવવામાં આવે છે. આ દિવસે લોકો પવિત્ર નદીઓમાં સ્નાન કરે છે. પછી દાન કરવામાં આવે છે. હિંદુ ધાર્મિક ગ્રંથોમાં આ દિવસે પવિત્ર નદીઓમાં સ્નાન અને દાન કરવું ખૂબ જ મહત્વપૂર્ણ માનવામાં આવે છે. એવી માન્યતાઓ છે કે આ કરવાથી પુણ્ય પ્રાપ્ત થાય છે.

પંચાંગ અનુસાર આ વખતે ભગવાન સૂર્ય 14 જાન્યુઆરીએ સવારે 9.03 કલાકે મકર રાશિમાં પ્રવેશ કરશે. તેથી આ દિવસે મકરસંક્રાંતિની ઉજવણી કરવામાં આવશે. દેશના દરેક રાજ્યમાં મકરસંક્રાંતિની ઉજવણી કરવામાં આવે છે, પરંતુ શું તમે જાણો છો કે દરેક રાજ્યમાં મકરસંક્રાંતિ અલગ-અલગ રૂપ અને પરંપરાઓ સાથે ઉજવવામાં આવે છે. આવો જાણીએ ક્યા રાજ્યમાં મકર સંક્રાંતિ કયા સ્વરૂપમાં અને કઈ પરંપરાઓ સાથે ઉજવવામાં આવે છે.

ગુજરાત

ગુજરાતમાં મકરસંક્રાંતિને ઉત્તરાયણ તરીકે ઉજવવામાં આવે છે. ઉત્તરાયણ બે દિવસ ચાલે છે. ગુજરાતમાં ઉત્તરાયણ પર પતંગોત્સવ યોજાય છે. મોટાભાગના પરિવારો આ બે દિવસ દરમ્યાન ધાબા પર જ જોવા મળે છે.. ધાબા પર તલસાંકળી અને મોટા બોર ઉત્તરાયણમાં ખાસ ખવાતા હોય છે. જ્યારે ઘરોમાં રસોઇમાં મોટેભાગે આ દિવસે લોકો શાકમાં ઉંધીયુ ખાતા હોય છે.

તમિલનાડુ

ઉત્તર ભારતની જેમ દક્ષિણ ભારતમાં પણ મકરસંક્રાંતિનો તહેવાર ઉજવવામાં આવે છે. દક્ષિણ ભારતમાં તેનું સ્વરૂપ અને પરંપરાઓ અલગ છે. તમિલનાડુમાં મકરસંક્રાંતિને પોંગલ તરીકે ઉજવવામાં આવે છે. પોંગલનો તહેવાર ચાર દિવસ સુધી ચાલે છે. પોંગલ દરમિયાન ખેડૂતો તેમના બળદને શણગારે છે અને તેમની પૂજા કરે છે. ઉપરાંત, પોંગલ પર કૃષિ સંબંધિત અન્ય વસ્તુઓની પૂજા કરવામાં આવે છે. આ તહેવારને કૃષિ ઉત્પાદકતા અને સમૃદ્ધિનું પ્રતિક માનવામાં આવે છે.

કેરળ, કર્ણાટક અને આંધ્રપ્રદેશ

કેરળમાં મકર સંક્રાંતિનું નામ મકર વિલક્કુ છે. આ દિવસે સબરીમાલા મંદિર પાસે આકાશમાં મકર જ્યોતિ દેખાય છે. લોકો તેની મુલાકાત લે છે. જ્યારે કર્ણાટકમાં આ તહેવાર ઈલુ બિરોધુ તરીકે ઓળખાય છે. અહીં આ દિવસે મહિલાઓ ઓછામાં ઓછા 10 પરિવારો સાથે શેરડી, તલ, ગોળ અને નાળિયેરમાંથી બનેલી વસ્તુઓની આપ-લે કરે છે. આંધ્રપ્રદેશમાં મકરસંક્રાંતિનો તહેવાર ત્રણ દિવસ સુધી ઉજવવામાં આવે છે. મકરસંક્રાંતિ પર, જૂની વસ્તુઓ ફેંકી દેવામાં આવે છે અને નવી વસ્તુઓ અહીં લાવવામાં આવે છે.

પંજાબ, એમ.પી

પંજાબમાં મકરસંક્રાંતિને માઘી તરીકે ઉજવવામાં આવે છે. માઘી પર શ્રી મુક્તસર સાહિબ ખાતે મેળાનું આયોજન કરવામાં આવે છે. અહીં લોકો આ દિવસે નૃત્ય કરે છે અને પરંપરાગત ગીતો ગાય છે. અહીં આ દિવસે ખીચડી, ગોળ અને ખીર ખાવાની પરંપરા છે.

આ પણ વાંચોઃ ચાઇનીઝ દોરી વાપરતા પહેલા ચેતજો, ભૂલ કરી તો જેલની હવા ખાવાનો વારો

બધા જ સમાચાર અને અપડેટ્સ મેળવવા માટે પ્લે સ્ટોર/ એપ સ્ટોર પર જઈને અથવા આ લાઈન પર ક્લિક કરીને ડાઉનલોડ કરો અમારી લેટેસ્ટ એપ