મનોરંજન / હેપ્પી બર્થડે વિજય થલાપતિ, બાળ અભિનેતાથી લઈ તમિલનાડુના મુખ્યમંત્રી બનવા સુધીના સફરની કહાની

થલાપતિ વિજયે છેલ્લા ત્રણ દાયકાથી વધુ સમય સુધી તમિલ ફિલ્મ ઈન્ડસ્ટ્રીમાં રાજ કર્યું છે. બાળ કલાકાર તરીકે શરૂ થયેલી તેમની સફર તેમને દક્ષિણ ભારતના સૌથી મોટા સ્ટાર્સમાં સ્થાન અપાવ્યું. વર્ષ 2024માં તેમણે રાજકારણમાં પ્રવેશ કર્યો અને પોતાની પાર્ટી 'તમિલગા વેટ્રી કઝગમ' (TVK)ની સ્થાપના કરી. 2026ની તમિલનાડુ વિધાનસભા ચૂંટણીમાં તેમની પાર્ટીએ શાનદાર પ્રદર્શન કર્યું અને વિજય મુખ્યમંત્રી બન્યા. આજે તેમના જન્મદિવસે તેમની ફિલ્મી અને રાજકીય સફર પર એક નજર કરીએ.

બાળ કલાકાર તરીકે કરી હતી કારકિર્દીની શરૂઆત

વિજયનું પૂરું નામ જોસેફ વિજય ચંદ્રશેખર છે. તેમનો જન્મ 22 જૂન 1974ના રોજ ચેન્નાઈમાં થયો હતો. તેમના પિતા એસ.એ. ચંદ્રશેખર જાણીતા ફિલ્મ નિર્દેશક છે, જ્યારે માતા શોભા ચંદ્રશેખર ગાયિકા છે. વિજયે બાળ કલાકાર તરીકે ફિલ્મોમાં કામ શરૂ કર્યું હતું અને નાની ઉંમરથી જ અભિનયની દુનિયામાં પોતાની ઓળખ બનાવી હતી.

18 વર્ષની ઉંમરે મળી પ્રથમ લીડ ફિલ્મ

માત્ર 18 વર્ષની ઉંમરે વિજયે પોતાની પ્રથમ મુખ્ય ભૂમિકાવાળી ફિલ્મ નાલૈયા થીરપુ સાઇન કરી હતી. ત્યારબાદ તેમણે ક્યારેય પાછળ વળી જોયું નથી. ઘિલી, પોક્કિરી, કથી, મર્સલ, માસ્ટર, બીસ્ટ અને લિયો જેવી ફિલ્મોએ તેમને તમિલ સિનેમાના સૌથી લોકપ્રિય સ્ટાર્સમાં સ્થાન અપાવ્યું. તેમની ફિલ્મોએ બોક્સ ઓફિસ પર અનેક રેકોર્ડ બનાવ્યા હતા. જના નાયકન તેમની અંતિમ ફિલ્મ તરીકે ચર્ચામાં છે.

તમિલ સિનેમાના સૌથી વધુ ફી લેનારા સ્ટાર્સમાં સામેલ

વિજય લાંબા સમય સુધી તમિલ ફિલ્મ ઈન્ડસ્ટ્રીના સૌથી વધુ કમાણી કરનારા કલાકારોમાં સામેલ રહ્યા હતા. તેમની ફિલ્મો સતત સુપરહિટ સાબિત થતી હતી. ચેન્નાઈના ઈસ્ટ કોસ્ટ રોડ વિસ્તારમાં આવેલું તેમનું ભવ્ય નિવાસસ્થાન પણ ચર્ચાનો વિષય રહ્યું છે. મીડિયા અહેવાલો મુજબ તેમની કુલ સંપત્તિ સેંકડો કરોડ રૂપિયાની હોવાનું માનવામાં આવે છે.

આ પણ વાંચોઃ રણવીર સિંહે સલમાન-શાહરુખને છોડ્યા પાછળ, એક ફિલ્મ માટે લે છે અધધધ 325 કરોડ રૂપિયા

2024માં રાજકારણમાં પ્રવેશ

વિજયે ફેબ્રુઆરી 2024માં સત્તાવાર રીતે રાજકારણમાં પ્રવેશ કર્યો અને 'તમિલગા વેટ્રી કઝગમ' (TVK) નામની પાર્ટીની જાહેરાત કરી. તેમણે સ્પષ્ટ કર્યું હતું કે તેઓ સંપૂર્ણ સમય રાજકારણને સમર્પિત કરવા માટે ફિલ્મી કારકિર્દીમાંથી નિવૃત્ત થશે. ત્યારબાદ સમગ્ર રાજ્યમાં પાર્ટીને મજબૂત બનાવવા માટે તેમણે અનેક સભાઓ અને જનસંપર્ક કાર્યક્રમો કર્યા.

માત્ર 27 મહિનામાં મુખ્યમંત્રી પદ સુધીની સફર

રાજકારણમાં પ્રવેશ કર્યા બાદ વિજયે ઝડપથી લોકપ્રિયતા મેળવી. 2026ની તમિલનાડુ વિધાનસભા ચૂંટણીમાં તેમની પાર્ટી TVK સૌથી મોટી પાર્ટી તરીકે ઉભરી આવી. સહયોગી પક્ષોના સમર્થન સાથે તેમણે સરકાર બનાવી અને 10 મે 2026ના રોજ તમિલનાડુના મુખ્યમંત્રી તરીકે શપથ લીધા. આ રીતે માત્ર 27 મહિનામાં તેમણે ફિલ્મ સ્ટારથી મુખ્યમંત્રી સુધીની ઐતિહાસિક સફર પૂર્ણ કરી.

અંગત જીવન પણ રહ્યું ચર્ચામાં

વિજયના અંગત જીવનની ચર્ચા પણ અવારનવાર મીડિયામાં થતી રહી છે. તેમણે વર્ષ 1999માં પોતાની ચાહક સંગીતા સોર્નાલિંગમ સાથે લગ્ન કર્યા હતા. બંનેને બે સંતાનો છે. છેલ્લા કેટલાક સમયથી તેમના વૈવાહિક જીવન અંગે વિવિધ અહેવાલો અને અટકળો સામે આવી રહી છે, જોકે આ અંગે સત્તાવાર માહિતી મર્યાદિત છે.

કરોડો ચાહકોના દિલના 'થલાપતિ'

ફિલ્મો હોય કે રાજકારણ, વિજયે દરેક ક્ષેત્રમાં પોતાની આગવી ઓળખ બનાવી છે. આજે તેઓ માત્ર અભિનેતા કે રાજનેતા જ નહીં, પરંતુ લાખો ચાહકો માટે પ્રેરણાસ્ત્રોત બની ગયા છે. બાળ કલાકારથી લઈને સુપરસ્ટાર અને ત્યારબાદ મુખ્યમંત્રી સુધીની તેમની સફર ખરેખર અસાધારણ માનવામાં આવે છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ