સુરત / પાંડેસરા બાદ પાલ વિસ્તાર રોડ બેસી જતા BRTS બસ ફસાઇ, જુઓ Video

Surat BRTS Bus Video : સુરત શહેરમાં ચોમાસાની શરૂઆત સાથે જ પડેલા ટૂંકા વરસાદે શહેરી વ્યવસ્થાની વાસ્તવિક સ્થિતિ ઉજાગર કરી દીધી છે. માત્ર 15 મિનિટના વરસાદ બાદ જ શહેરના અનેક વિસ્તારોમાં પાણી ભરાઈ જતાં રસ્તાઓ પર વાહન વ્યવહાર ખોરવાઈ ગયો હતો. ખાસ કરીને કેટલીક જગ્યાએ રસ્તા બેસી જવાના બનાવો અને બસો ફસાઈ જવાની ઘટનાઓએ લોકોને ચિંતિત કરી દીધા છે.

પાંડેસરા બાદ પાલ વિસ્તારની બસ ફસાયાની ઘટના

તાજેતરમાં પાંડેસરા વિસ્તારમાં બસ ફસાવાની ઘટના બાદ હવે પાલ વિસ્તારમાં પણ BRTS બસ રોડમાં ધસી જવાની ઘટના સામે આવી છે. સદનસીબે આ ઘટનામાં કોઈ જાનહાનિ થઈ નથી, પરંતુ આ બનાવે શહેરના રસ્તાઓની ગુણવત્તા અને વરસાદી સીઝન માટેની તૈયારીઓ અંગે ગંભીર પ્રશ્નો ઊભા કર્યા છે.

મળતી માહિતી મુજબ, ઉધના બસ ડેપોથી સચિન હાઇવે તરફ જતા માર્ગ પર વરસાદ બાદ મોટી માત્રામાં પાણી ભરાઈ ગયું હતું. રોડની એક બાજુ લાંબા અંતર સુધી પાણીમાં ગરકાવ થઈ જતાં વાહનચાલકોને ભારે મુશ્કેલીઓનો સામનો કરવો પડ્યો હતો. પાણી ભરાયેલા માર્ગોને કારણે ટ્રાફિક ધીમો પડી ગયો હતો અને અનેક સ્થળોએ વાહનોની લાંબી કતારો જોવા મળી હતી. શહેરના વિવિધ વિસ્તારોમાં વરસાદી પાણીના નિકાલની યોગ્ય વ્યવસ્થા ન હોવાને કારણે રસ્તાઓ પર જળભરાવ સર્જાયો હતો. કેટલાક સ્થળોએ રોડની સપાટી પણ બેસી ગઈ હોવાનું સામે આવ્યું છે. જેના કારણે વાહનચાલકોને જોખમ વચ્ચે મુસાફરી કરવી પડી હતી.

દર વર્ષે ચોમાસા પહેલાં મહાનગરપાલિકા દ્વારા પ્રિમોન્સૂન કામગીરી અંતર્ગત ડ્રેનેજ સફાઈ, વરસાદી પાણીના નિકાલની વ્યવસ્થા અને જળભરાવ અટકાવવા માટે વિવિધ કામગીરી કરવામાં આવતી હોવાના દાવા કરવામાં આવે છે. જોકે પ્રથમ જ વરસાદમાં સર્જાયેલી પરિસ્થિતિએ આ દાવાઓ પર સવાલો ઊભા કરી દીધા છે.

આ પણ વાંચો : સુરતમાં પહેલા વરસાદે જ ખોલી મહાનગરપાલિકાની પોલ, અનેક વિસ્તારોમાં ભરાયાં પાણી

સ્થાનિક રહેવાસીઓ અને વાહનચાલકોનું કહેવું છે કે, જો સામાન્ય વરસાદમાં જ શહેરના મુખ્ય રસ્તાઓ પર આ સ્થિતિ સર્જાય છે, તો આગામી દિવસોમાં ભારે વરસાદ દરમિયાન પરિસ્થિતિ વધુ વિકટ બની શકે છે. લોકો દ્વારા તંત્રને વરસાદી પાણીના ઝડપી નિકાલ અને રસ્તાઓની મજબૂતી માટે અસરકારક પગલાં ભરવાની માંગ કરવામાં આવી રહી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ