ક્રાઈમ / ભાવનગરના વાળુકડમાં જાહેરમાં યુવકની હત્યા, પોલીસ તપાસ શરૂ

ભાવનગર જિલ્લાના ઘોઘા તાલુકાના વાળુકડ ગામે એક યુવકની છરીના ઘા ઝીંકી હત્યા કરવામાં આવતા પંથકમાં ચકચાર મચી જવા પામી છે, ઘટનાની જાણ થતાં પોલીસ ઘટનાસ્થળે પહોચી છે જ્યારે યુવકના મૃતદેહને પોસ્ટમોર્ટમ માટે હોસ્પિટલ ખસેડ્યો હતો.

ઘોઘા તાલુકાના વાળુકડ ગામમાં શનિવારે મોડી રાત્રે એક દિલ દહેલાવતી ઘટના સામે આવી છે. અજાણ્યા ઇસમોએ રવિ રબારી નામના યુવાન પર છરીના ઘા મારી તેની નિર્દય હત્યા કરી હોવાનું સામે આવ્યું છે. પ્રાથમિક માહિતી અનુસાર, આ હત્યા પાછળ વ્યક્તિગત દુશ્મનાવટ અને જૂની અદાવત કારણભૂત હોવાની શક્યતા વ્યક્ત કરવામાં આવી રહી છે.

સ્થાનિક લોકો દ્વારા પોલીસને જાણ કરવામાં આવતા ASP, DYSP, PI, PSI સહિતનો પોલીસ કાફલો તાત્કાલિક ઘટનાસ્થળે દોડી ગયો હતો. મૃતદેહને ભાવનગર સરકારી હોસ્પિટલ ખાતે પોસ્ટમોર્ટમ માટે ખસેડવામાં આવ્યો છે. આ સમગ્ર મામલે પોલીસ દ્વારા તપાસ શરૂ કરવામાં આવી છે અને આરોપીઓને ઝડપી પાડવા માટે કાર્યવાહી હાથ ધરવામાં આવી રહી છે.

આ પણ વાંચોઃ આજથી ફરી ભાવનગર-મુંબઈ ફ્લાઈટનો પ્રારંભ, કેન્દ્રીય ઉડ્ડયન મંત્રી પ્રથમ ફ્લાઇટને ફ્લેગ ઑફ કરાવ્યો

આ ઘટનાને લઈને એક લાઈવ વીડિયો સોશિયલ મીડિયામાં વાયરલ થવાની માહિતી પણ સામે આવી છે, જોકે તેની પુષ્ટિ વીટીવી ચેનલ દ્વારા કરવામાં આવતી નથી. યુવકની હત્યા બાદ સમગ્ર વિસ્તારમાં ભય અને ચર્ચાનો માહોલ ફેલાયો છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ