ન્યૂઝ અપડેટ્સ
VTV / ગુજરાત / રાજકોટના સમાચાર / ફરજ દરમિયાન ASI ગોદડું ઓઢી ઊંઘી ગયાં, ફરિયાદીને કહ્યું- '24 કલાક રાહ તો જુઓ', DySPએ આપ્યા તપાસના આદેશ
Last Updated: 06:01 PM, 21 November 2026
ADVERTISEMENT
રાજકોટ રેલવે સ્ટેશન પરથી 12 વર્ષનો કિશોર અજાણ્યા શખ્સ સાથે જતો જોવા મળ્યા બાદ ગુમ થવાની ચોંકાવનારી ઘટના સામે આવી છે. કિશોર ઘરેથી દ્વારકા જવાનું કહીને નીકળ્યો હતો અને ત્યારબાદ પરિવારજનોનો તેની સાથે સંપર્ક તૂટી ગયો હતો. CCTV ફૂટેજમાં કિશોર પ્લેટફોર્મ નંબર-1 પર એક અજાણી વ્યક્તિ સાથે જોવા મળ્યો હોવાનું પરિવારજનોનું કહેવું છે. બીજી તરફ, બાળકની શોધખોળ માટે પોલીસનો સંપર્ક કરવા પહોંચેલા મામાએ રેલવે પોલીસની કામગીરી સામે ગંભીર સવાલો ઉઠાવ્યા છે.
ADVERTISEMENT
વહેલી સવારે 4:18 વાગ્યે પ્લેટફોર્મ પર દેખાયો કિશોર
પરિવારજનોના જણાવ્યા અનુસાર, 21 નવેમ્બરના વહેલી સવારે આશરે 4:10 વાગ્યે 12 વર્ષનો કિશોર ઘરેથી નીકળ્યો હતો. ત્યારબાદ 4:18 વાગ્યે તે રાજકોટ રેલવે સ્ટેશનના પ્લેટફોર્મ નંબર-1 પર પ્રવેશતો CCTVમાં જોવા મળ્યો હતો. આ દરમિયાન તેની સાથે એક અજાણ્યો શખ્સ પણ હોવાનું સામે આવ્યું છે.
ADVERTISEMENT
પરિવારના જણાવ્યા મુજબ, અજાણી વ્યક્તિએ લાલ રંગની ટોપી પહેરી હતી અને ગળામાં કેસરી રંગનું મફલર જેવું કપડું લટકાવ્યું હતું. કિશોરે અજાણ્યા મોબાઈલ નંબર પરથી ફોન કરીને પોતે દ્વારકા જઈ રહ્યો હોવાનું જણાવ્યું હતું. જોકે, ત્યારબાદ તેનો કોઈ સંપર્ક થઈ શક્યો નથી.
ADVERTISEMENT
બાળક ગુમ થયાની ફરિયાદ નોંધાવવા જતા પરિવારને રાજકોટ રેલવે પોલીસનો કડવો અનુભવ, Video વાયરલ #Rajkot #RailwayPolice #ViralVideo #PoliceComplaint #VTVDigital https://t.co/W7bAPfiF2O
— VTV Gujarati News and Beyond (@VtvGujarati) November 21, 2026
પરિવાર 2થી 3 મિનિટમાં સ્ટેશને પહોંચ્યો, ત્યાં સુધીમાં ટ્રેન ઉપડી ગઈ
ADVERTISEMENT
કિશોરના મામા મુરલી ભાવનાણીએ જણાવ્યું હતું કે, બાળકના ગુમ થયાની જાણ થતાં જ પરિવારજનો માત્ર 2થી 3 મિનિટમાં રેલવે સ્ટેશન પહોંચી ગયા હતા. તેમનું ઘર સ્ટેશનની નજીક જ આવેલું છે. જોકે, તેઓ પહોંચે ત્યાં સુધીમાં ટ્રેન ઉપડી ગઈ હતી. ત્યારથી પરિવારજનો બાળકની શોધખોળ કરી રહ્યા છે.
ફરિયાદ કરવા પહોંચ્યા તો PSO ગોદડું ઓઢીને સૂતાં હોવાનો આક્ષેપ
ADVERTISEMENT
આ ઘટનાને લઈને મામા મુરલી ભાવનાણી મોડી રાત્રે રેલવે પોલીસ સ્ટેશનમાં ફરિયાદ કરવા પહોંચ્યા હતા. તેમનો આક્ષેપ છે કે, રાત્રિના સમયે ફરજ પર રહેલાં મહિલા PSO કામિનીબેન ગોદડું ઓઢીને સૂતાં હતાં. પરિવારજનોએ બાળક ગુમ થયાની ગંભીરતા જણાવી હોવા છતાં તેમણે ઊંઘમાં જ 24 કલાક રાહ જોવાનું કહ્યું હતું. મામાના આક્ષેપ મુજબ, પોલીસ તરફથી એક-બે દિવસ રાહ જોયા બાદ નિયમ મુજબ તપાસ કરવાની વાત કરવામાં આવી હતી. આ જવાબથી પરિવારજનોમાં ભારે રોષ જોવા મળ્યો હતો.
ચાઇલ્ડ હેલ્પલાઇન અને RPFનો પણ સંપર્ક કર્યો
ADVERTISEMENT
પરિવારજનોએ જણાવ્યું હતું કે, બાળક ગુમ થતાં સૌપ્રથમ ચાઇલ્ડ હેલ્પલાઇનનો સંપર્ક કરવામાં આવ્યો હતો, પરંતુ ત્યાંથી સંતોષકારક જવાબ મળ્યો નહોતો. ત્યારબાદ RPF કચેરીએ જઈ CCTV ફૂટેજ તપાસવાની માગ કરવામાં આવી હતી. જોકે, ત્યાંથી પણ લેખિત અરજી કરીને આવવાનું કહેવામાં આવ્યું હોવાનો પરિવારનો આરોપ છે. પરિવારજનોએ આખી રાત CCTV ફૂટેજ તપાસ્યાં હતાં અને સવારે 4:42 વાગ્યા સુધીનાં ફૂટેજ મેળવ્યાં હોવાનું જણાવ્યું હતું. તેમાં કિશોર પ્લેટફોર્મ પર જોવા મળ્યો હોવાનું પણ તેમણે કહ્યું હતું.
અગાઉ પણ ગુમ થયો હતો કિશોર
નોંધનીય છે કે, આ જ કિશોર અગાઉ પણ આ રીતે ગુમ થયો હતો. તે સમયે રાજકોટ ક્રાઇમ બ્રાન્ચના DCP ક્રાઇમ અને બાંગરવા ટીમે શોધખોળ કરીને તેને શોધી કાઢ્યો હતો. હવે ફરી એકવાર કિશોર ગુમ થતાં પરિવારજનોની ચિંતામાં વધારો થયો છે.
પરિવારનો સવાલ: બાળકને કંઈ થશે તો જવાબદાર કોણ?
પરિવારજનોની માગ છે કે તાત્કાલિક મિસિંગ ફરિયાદ નોંધવામાં આવે, રેલવે સ્ટેશન સહિત આસપાસના વિસ્તારોનાં CCTV ફૂટેજ તપાસવામાં આવે અને બાળક સાથે જોવા મળેલા અજાણ્યા શખ્સની ઓળખ કરવામાં આવે.
આ પણ વાંચોઃ ''90 ટકા સિંધિએ લાઈનમાં ઊભા રહીને...", કોળી બાદ હવે સિંધિ સમાજના અગ્રણીઓની ભાજપ પાસે માંગ
મામા મુરલી ભાવનાણીએ સવાલ ઉઠાવ્યો હતો કે, 12 વર્ષનો બાળક અજાણી વ્યક્તિ સાથે ગયો હોવાની ગંભીર ઘટના હોવા છતાં પોલીસ 24 કલાક રાહ જોવાનું કહે છે. જો આ સમયગાળા દરમિયાન બાળક સાથે કોઈ અઘટિત ઘટના બને તો તેની જવાબદારી કોની રહેશે? હાલ પરિવારજનો બાળકની સલામત પરત આવવાની આશા સાથે પોલીસ પાસે તાત્કાલિક અને અસરકારક કાર્યવાહી કરવાની માગ કરી રહ્યા છે.
સંકળાયેલા મુદ્દાઓ
Vishal Khamar is Senior Sub-Editor at VTV Gujarati with 15+ years of digital journalism experience. He covers crime and civic issues.