બનાસકાંઠા / 'પાટીદાર સમાજને મદદ કરવા તૈયાર', ખેડામાં પાટીદાર યુવતીના પ્રેમલગ્ન વિવાદ પર ઠાકરશી રબારીનું નિવેદન

ખેડા જિલ્લામાં પાટીદાર સમાજની યુવતીના પ્રેમલગ્ન મુદ્દે ઉભા થયેલા વિવાદને લઈ રબારી સમાજના આગેવાન ઠાકરશી રબારીએ મહત્વપૂર્ણ નિવેદન આપ્યું છે. તેમણે આ મુદ્દે પાટીદાર સમાજને સમર્થન આપતા જણાવ્યું કે સમાજની પરંપરા અને સંસ્કૃતિ જળવાઈ રહે તે માટે સૌએ સંયમ રાખવો જરૂરી છે.

રબારી સમાજના યુવાનોને અપીલ કે કોઈ સમાજની દીકરી લાવવી નહીં-ઠાકરશી રબારી

ઠાકરશી રબારીએ રબારી સમાજના યુવાનોને અપીલ કરતાં કહ્યું કે કોઈપણ અન્ય સમાજની દીકરીને ભાગેડું લગ્ન કરીને લાવવું યોગ્ય નથી. આવા પગલાંથી સમાજોમાં તણાવ ઊભો થવાની શક્યતા રહે છે, તેથી યુવાનોને જવાબદારીપૂર્વક વર્તવું જોઈએ.

પાટીદાર સમાજને મદદની જરૂર પડશે તો મદદ કરવા તૈયાર-ઠાકરશી રબારી

તેમણે વધુમાં જણાવ્યું કે જો આ મુદ્દે પાટીદાર સમાજને મદદની જરૂર પડશે તો રબારી સમાજ તેમની સાથે ઊભો રહેશે. પાટીદાર સમાજ ખૂબ શક્તિશાળી અને આર્થિક રીતે મજબૂત સમાજ હોવાનું તેમણે ઉમેર્યું.

નરેશ પટેલને કહેવા માગુ છું કે કાયદો બનાવવા માટે આંદોલન કરે-ઠાકરશી રબારી

આ સાથે ઠાકરશી રબારીએ સામાજિક મુદ્દાઓના કાયમી ઉકેલ માટે કાનૂની વ્યવસ્થા કરવાની જરૂરિયાત પણ વ્યક્ત કરી. તેમણે પાટીદાર આગેવાન નરેશ પટેલને સંબોધતા જણાવ્યું કે આવી ઘટનાઓ અટકાવવા માટે કાયદો બનાવવા સરકાર પર દબાણ લાવવા માટે આંદોલન કરવાની જરૂર છે.

આ પણ વાંચોઃ 'રબારી પાસેથી દીકરી પાછી લાવો', કિંજલ રબારીની ઘરવાપસી પછી પાટીદાર સમાજના માતા-પિતાની આજીજી

ભાગેડું લગ્ન સામે આંદોલનમાં રબારી સમાજનું સમર્થન-ઠાકરશી રબારી

ઠાકરશી રબારીએ સ્પષ્ટ કર્યું કે ભાગેડું લગ્નના મુદ્દે જો કોઈ સામાજિક આંદોલન થાય તો તેમાં રબારી સમાજનો સમર્થન રહેશે. સમાજોમાં શાંતિ અને સમરસતા જળવાઈ રહે તે માટે સૌએ મળીને વિચારવું જરૂરી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ