નેશનલ / NEET-UG રી-એક્ઝામ પહેલાં દેશભરમાં કાલે હાઇટેક મોક ડ્રિલ: પેપર લીક રોકવા ખડકાયો અભેદ સુરક્ષા કિલ્લો

દેશની સૌથી મોટી મેડિકલ પ્રવેશ પરીક્ષા 'NEET-UG 2026' ના રી-એક્ઝામને લઈને નેશનલ ટેસ્ટિંગ એજન્સી દ્વારા તમામ વહીવટી અને સુરક્ષા લક્ષી તૈયારીઓ પૂર્ણ કરી લેવામાં આવી છે. પેપર લીકના ગંભીર આક્ષેપો બાદ આગામી 21 June ના રોજ યોજાનારી આ પરીક્ષા પર સમગ્ર દેશની નજર છે. આ પરીક્ષાને સંપૂર્ણપણે સુરક્ષિત અને ભયમુક્ત વાતાવરણમાં પૂર્ણ કરવા માટે પરીક્ષાના એક દિવસ પહેલા એટલે કે 20 June ના રોજ સવારે 9 AM થી રાત્રે 8 PM સુધી દેશવ્યાપી મોક ડ્રિલનું આયોજન કરવામાં આવ્યું છે. આ મોક ડ્રિલનો મુખ્ય ઉદ્દેશ્ય પરીક્ષાના દિવસે સિસ્ટમમાં કોઈ ખામી ન સર્જાય તે સુનિશ્ચિત કરવાનો છે.

22 લાખથી વધુ વિદ્યાર્થીઓ નોંધાયા

NTA દ્વારા જાહેર કરાયેલા સત્તાવાર આંકડા મુજબ, આ મહત્વપૂર્ણ રી-એક્ઝામમાં 22.79 Lakh થી વધુ પરીક્ષાર્થીઓ સામેલ થવાના છે. અત્યાર સુધીમાં 18.5 Lakh થી વધુ ઉમેદવારોએ પોતાના એડમિટ કાર્ડ સફળતાપૂર્વક ડાઉનલોડ કરી લીધા છે. વિદ્યાર્થીઓની સુવિધાને ધ્યાનમાં રાખીને, 3.5 લાખ જેટલા ઉમેદવારોને તેમની વિનંતીના આધારે પરીક્ષાનું શહેર અથવા કેન્દ્ર બદલવાનો વિકલ્પ પણ આપવામાં આવ્યો હતો. આ પરીક્ષા ભારતના 551 શહેરો અને વિદેશના 14 શહેરોમાં એકસાથે આયોજિત કરવામાં આવશે, જેના માટે દેશભરમાં 5,500 થી વધુ અત્યાધુનિક પરીક્ષા કેન્દ્રો તૈયાર કરવામાં આવ્યા છે. આ તમામ સેન્ટર્સને 'હાઇ-સિક્યોરિટી ઝોન' તરીકે જાહેર કરાયા છે.

પરીક્ષામાં ડિજિટલ છેતરપિંડી અને નકલખોરી રોકવા માટે NTA એ ટેકનોલોજી અને મેનપાવરનો અત્યાર સુધીનો સૌથી મોટો સંગમ ખડકી દીધો છે..

• પરીક્ષા કેન્દ્રો પર ઈલેક્ટ્રોનિક ગેજેટ્સ અને બ્લૂટૂથનો ઉપયોગ રોકવા માટે 15,000 સિગ્નલ જેમર લગાડવામાં આવ્યા છે.
• વર્ગખંડો અને કેન્દ્રોની ગતિવિધિઓ પર નજર રાખવા માટે વધારાના 1.5 Lakh સીસીટીવી કેમેરા તૈનાત કરાયા છે, જેનું લાઈવ પ્રસારણ NTA હેડક્વાર્ટરના કંટ્રોલ રૂમમાં રિયલ-ટાઇમ જોઈ શકાશે.
• સમગ્ર પ્રક્રિયા પર નજર રાખવા માટે 674 સિટી કો-ઓર્ડિનેટર અને 6,669 સ્વતંત્ર ઓબ્ઝર્વર્સ મેદાનમાં ઉતારવામાં આવ્યા છે.
• કાયદો અને વ્યવસ્થા જાળવવા માટે 2 લાખથી 2.5 લાખ જેટલા પોલીસકર્મીઓ તૈનાત રહેશે. જ્યારે પ્રશ્નપત્રો અને OMR શીટ્સના સુરક્ષિત પરિવહન માટે 15,000 અર્ધસૈનિક દળોના જવાનોને જવાબદારી સોંપવામાં આવી છે.
• આ આખી પરીક્ષાના સંચાલનમાં 2 લાખથી વધુ અધિકારીઓ અને કર્મચારીઓ રાત-દિવસ ફરજ બજાવી રહ્યા છે.

ફ્રોડ અને ફેક ન્યૂઝથી બચવા કડક ચેતવણી

NTA એ શુક્રવારે સોશિયલ મીડિયા પર સત્તાવાર પોસ્ટ શેર કરીને જણાવ્યું છે કે, તે પરીક્ષાર્થીઓને એડમિટ કાર્ડ ડાઉનલોડ કરવા માટે સતત SMS, ઈમેલ અને વોટ્સએપ મેસેજ મોકલી રહી છે. એજન્સીએ સ્પષ્ટપણે ચેતવણી આપી છે કે, "NTA ક્યારેય પણ પરીક્ષાના નામે કોઈ વધારાના પેમેન્ટ કે પૈસાની માંગણી કરતું નથી. જો કોઈ વિદ્યાર્થીને આવો કોઈ શંકાસ્પદ મેસેજ કે લિંક મળે, તો તેના પર ક્લિક ન કરવું અને તુરંત સત્તાવાળાઓને જાણ કરવી."

આ પણ વાંચો- રાજુલાના કોવાયા ગામમાં યુવકના શિકાર બાદ પગ મળ્યો, કૂતરું મોઢામાં પકડી કંપની તરફ લઈ ગયું

ઉલ્લેખનીય છે કે, મેડિકલ કોર્સમાં એડમિશન માટેની આ NEET-UG પરીક્ષા અગાઉ આ વર્ષે 3 May ના રોજ લેવાઈ હતી. પરંતુ પેપર લીકના ગંભીર આરોપો અને હોબાળા બાદ 12 May ના રોજ તેને રદ કરવામાં આવી હતી, જેની તપાસ હાલમાં સેન્ટ્રલ બ્યુરો ઓફ ઇન્વેસ્ટિગેશન (CBI) ચલાવી રહી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ