બિઝનેસ / અચાનક આજે સોનામાં મોટો ઘટાડો, ચાંદી પણ સસ્તી, ફક્ત આ એક કારણ

મોંઘવારીના જમાનામાં સોના-ચાંદીની ખરીદી કરવા ઈચ્છતા સામાન્ય ગ્રાહકો અને રોકાણકારો માટે બજારમાંથી બહુ મોટા અને રાહતના સમાચાર સામે આવ્યા છે. સોનું મોંઘું જરૂર છે, પરંતુ હવે તે અગાઉ જેટલું મોંઘું રહ્યું નથી. ચાલુ વર્ષની શરૂઆતમાં રેકોર્ડ તોડનારી સોનાની કિંમતો હવે પોતાના ઓલ-ટાઇમ હાઇ સ્તરથી અંદાજે ₹46,000 પ્રતિ 10 ગ્રામ જેટલી સસ્તી થઈ ચૂકી છે. સ્થાનિક કોમોડિટી માર્કેટ પર શુક્રવારે સતત બીજા દિવસે સોના અને ચાંદીના ભાવમાં ભારે કડાકો જોવા મળ્યો હતો, જેના કારણે સરાફા બજારમાં ભારે હલચલ મચી ગઈ છે. શુક્રવારે ટ્રેડિંગ દરમિયાન સોનાનો ભાવ ગગડીને ₹1,45,710 ના સ્તર સુધી પહોંચી ગયો હતો.

બે દિવસમાં જ સોનું ₹7,000 સસ્તું થયું

બજારના આંકડા અનુસાર, શુક્રવારે સોનાના ભાવમાં 2% થી વધુનો મોટો ઘટાડો નોંધાયો હતો. સાંજે 5 વાગ્યાની આસપાસ મલ્ટી કોમોડિટી એક્સચેન્જ (MCX) પર સોનું 1.68% ના ઘટાડા સાથે ₹1,46,800 પ્રતિ 10 ગ્રામ પર ટ્રેડ કરી રહ્યું હતું. ઉલ્લેખનીય છે કે આ વર્ષની શરૂઆતમાં એટલે કે જાન્યુઆરી મહિનામાં સોનાના ભાવમાં જોરદાર તેજી આવી હતી અને તે વધીને ₹1.91 લાખ પ્રતિ 10 ગ્રામની સર્વોચ્ચ સપાટી પર પહોંચી ગયો હતો. જો કે, ત્યાંથી માત્ર 4 મહિનાના ટૂંકા ગાળામાં જ સોનામાં ₹46,000 નો તોતિંગ ઘટાડો આવી ચૂક્યો છે. છેલ્લા બે દિવસના ટ્રેડિંગ સેશનમાં જ સોનું ₹7,000 થી વધુ સસ્તું થઈ ગયું છે.

સોના-ચાંદીમાં આટલા મોટા કડાકા પાછળનું અસલી કારણ શું?

વૈશ્વિક સ્તરે કિંમતો તૂટવાને કારણે ભારતીય બજાર પર તેની સીધી અસર થઈ છે. બજારના નિષ્ણાતોના મતે, આ ઘટાડા પાછળનું મુખ્ય કારણ અમેરિકી સેન્ટ્રલ બેંક 'ફેડરલ રિઝર્વ' (US Federal Reserve) નો કડક નિર્ણય છે. ફેડરલ રિઝર્વે પોતાની તાજેતરની બેઠકમાં વ્યાજ દરોને સ્થિર રાખવાનો નિર્ણય કર્યો છે, સાથે જ એવા સંકેતો આપ્યા છે કે આ વર્ષે મોંઘવારીના જોખમને જોતા વ્યાજ દરોમાં ફરી એકવાર વધારો કરવામાં આવી શકે છે. આ આક્રમક વલણને કારણે વૈશ્વિક શેરબજારો સહિત સોના અને ચાંદી પર દબાણ વધ્યું છે અને રોકાણકારો નફો બુક કરવા માટે મોટા પાયે વેચવાલી કરી રહ્યા છે.

જો કે, આ ઘટાડાથી તે મધ્યમવર્ગીય પરિવારોને મોટી રાહત મળી છે જેઓ આગામી લગ્નસરાની સીઝન માટે સોનાની ખરીદી કરવા લાંબા સમયથી કિંમતો ઘટવાની રાહ જોઈ રહ્યા હતા. બજાર વિશ્લેષકોના જણાવ્યા અનુસાર, લાંબા ગાળાના રોકાણકારો માટે આ ખરીદીની શાનદાર તક છે. પરંતુ, શોર્ટ-ટર્મ ટ્રેડર્સે અત્યારે સાવધ રહેવું જોઈએ, કારણ કે આગામી થોડા દિવસો સુધી બજારમાં હજુ વધુ ઉતાર-ચઢાવ જોવા મળી શકે છે. નિષ્ણાતો રોકાણકારોને એકસાથે મોટી રકમ રોકવાને બદલે હપ્તાવાર ખરીદી કરવાની સલાહ આપી રહ્યા છે.

સોનાની જેમ ચાંદીના ખરીદદારો પર પણ લક્ષ્મીજી પ્રસન્ન થયા છે. ચાંદીના ભાવમાં પણ ભયંકર ઘટાડો નોંધાયો છે. શુક્રવારે ચાંદી એક જ ઝાટકામાં અંદાજે ₹9,000 પ્રતિ કિલોગ્રામ સસ્તી થઈ ગઈ હતી. આ પૂર્વે ગુરુવારે પણ ચાંદીના ભાવમાં ₹13,000 નો મોટો ઘટાડો આવ્યો હતો. આમ, માત્ર બે જ દિવસમાં ચાંદી ₹22,000 થી વધુ સસ્તી થઈ ગઈ છે. હાલમાં MCX પર ચાંદીનો ભાવ ઘટીને ₹2,31,600 પર આવી ગયો છે, જ્યારે ટ્રેડિંગ દરમિયાન તે વધુ ઘટીને ₹2,28,162 પ્રતિ કિલોના સ્તરે સરકી ગયો હતો.

આ પણ વાંચો- રાજુલાના કોવાયા ગામમાં યુવકના શિકાર બાદ પગ મળ્યો, કૂતરું મોઢામાં પકડી કંપની તરફ લઈ ગયું

ચાંદી પણ પોતાના ઓલ-ટાઇમ હાઇ સ્તરથી અંદાજે ₹1.90 લાખ પ્રતિ કિલો સસ્તી થઈ ચૂકી છે. આ વર્ષની શરૂઆતમાં ચાંદીનો ભાવ વધીને ₹4.21 લાખ પ્રતિ કિલોના રેકોર્ડ સ્તરે પહોંચ્યો હતો, જે હવે માત્ર 4 થી 5 મહિનામાં ઘટીને ₹2.30 લાખની આસપાસ આવી ગયો છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ