રાહતના સમાચાર / હવે ડબ્બાનો સંઘરો કરી જ લેજો! સિંગતેલના ભાવમાં આવ્યો મોટો ઘટાડો, જાણો કેટલી મળી રાહત?

Gujarat Edible Oil Price : મોંઘવારીના સમયમાં ગૃહિણીઓ માટે રાહતના સમાચાર સામે આવ્યા છે. રાજ્યમાં સિંગતેલના ભાવમાં નોંધપાત્ર ઘટાડો નોંધાતા ઘરેલુ બજેટ પરનો બોજ થોડો હળવો બન્યો છે. છેલ્લા કેટલાક મહિનાથી ઊંચા સ્તરે રહેલા સિંગતેલના ભાવ હવે ધીમે ધીમે નીચે આવી રહ્યા છે, જેના કારણે ગ્રાહકોમાં ખુશીનો માહોલ જોવા મળી રહ્યો છે.

ત્રણ મહિનામાં રૂ.190નો ઘટાડો

બજારના તાજા આંકડા મુજબ સિંગતેલના 15 કિલોના ડબ્બાના ભાવમાં અંદાજે રૂ.190નો ઘટાડો નોંધાયો છે. માર્ચ મહિનામાં જે ડબ્બો રૂ.2900થી વધુ કિંમતે વેચાઈ રહ્યો હતો, તે હવે ઘટીને આશરે રૂ.2710 સુધી પહોંચી ગયો છે. ભાવમાં આવેલા આ ઘટાડાને કારણે ગ્રાહકોને સીધો ફાયદો મળી રહ્યો છે.

ઉનાળામાં માંગ ઘટતા ભાવ નરમ બન્યા

વેપારીઓના જણાવ્યા અનુસાર ઉનાળાની ઋતુ દરમિયાન સ્થાનિક બજારમાં સિંગતેલની માંગમાં ઘટાડો જોવા મળ્યો છે. ઘરેલુ વપરાશમાં ઘટાડો તેમજ વેપારી સ્તરે ખરીદીની ગતિ ધીમી પડતા બજારમાં પુરવઠો વધ્યો છે, જેના કારણે ભાવ પર દબાણ સર્જાયું છે. સિંગતેલના ભાવમાં ઘટાડા પાછળનું એક મહત્વનું કારણ ઉનાળુ મગફળીની વધતી આવક પણ માનવામાં આવે છે. ખેડૂતો પાસેથી બજારમાં મગફળીનો પુરવઠો વધતા તેલ ઉત્પાદન માટે પૂરતો કાચો માલ ઉપલબ્ધ થયો છે. પરિણામે ઉત્પાદકોને પણ ભાવમાં રાહત આપવાની તક મળી છે.

નાફેડની કામગીરીનો પણ પ્રભાવ

બજાર નિષ્ણાતો માને છે કે નાફેડ દ્વારા મગફળીના વેચાણ અને સ્ટોક મેનેજમેન્ટની પ્રક્રિયાએ પણ ભાવને નિયંત્રિત કરવામાં મહત્વની ભૂમિકા ભજવી છે. બજારમાં મગફળીની ઉપલબ્ધતા વધતા તેલના ઉત્પાદનમાં સરળતા આવી છે અને તેના સીધા પ્રભાવરૂપે સિંગતેલના ભાવમાં નરમાશ જોવા મળી રહી છે. માત્ર સિંગતેલ જ નહીં, પરંતુ અન્ય કેટલાક ખાદ્ય તેલોના ભાવમાં પણ ઘટાડાનો ટ્રેન્ડ જોવા મળી રહ્યો છે. આંતરરાષ્ટ્રીય બજારમાં ખાદ્ય તેલના ભાવમાં આવેલી સ્થિરતા અને સ્થાનિક પુરવઠાની સ્થિતિના કારણે ગ્રાહકોને વધુ રાહત મળવાની શક્યતા વ્યક્ત કરવામાં આવી રહી છે.

આ પણ વાંચો : મહેસાણા જેલમાં જેલ સિપાહી પર હુમલો, ત્રણ કેદીઓ સામે સરકારી ફરજમાં રુકાવટ અને મારામારીની ફરિયાદ નોંધાઈ

આગામી સમયમાં વધુ ઘટાડાની આશા

બજારના વર્તમાન સંજોગોને જોતા વેપારીઓ અને નિષ્ણાતોનું માનવું છે કે જો મગફળીની આવક યથાવત રહેશે અને માંગમાં કોઈ મોટો ઉછાળો નહીં આવે, તો સિંગતેલના ભાવમાં હજુ વધુ નરમાશ જોવા મળી શકે છે. તેથી આગામી અઠવાડિયાઓમાં ગ્રાહકોને વધુ સસ્તા ભાવે સિંગતેલ મળી શકે તેવી સંભાવના છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ