T20 World Cup / મેદાન પર લંકાનું તોફાન: ડિફેન્ડિંગ ચેમ્પિયન ન્યૂઝીલેન્ડને ધૂળ ચટાવી શ્રીલંકાએ રચ્યો ઇતિહાસ

મહિલા ટી20 વર્લ્ડ કપ 2026 માં ક્રિકેટ ચાહકોને એક અત્યંત રોમાંચક અને યાદગાર મેચ જોવા મળી છે. જે રીતે ભારતીય ક્રિકેટ ટીમ પાકિસ્તાનને મેદાન પર ચારેય ખાને ચિત્ત કરીને કરોડો ફેન્સને ખુશ કરી દે છે, બરાબર એ જ અંદાજમાં શ્રીલંકાની ટીમે ડિફેન્ડિંગ ચેમ્પિયન ન્યૂઝીલેન્ડને મેદાન પર ઘૂંટણિયે ટેકવી દીધું છે. સાઉથૅમ્પટનના મેદાન પર રમાયેલી ગ્રુપ બીની આ મહત્વની મેચમાં શ્રીલંકાએ હિંમત અને શાનદાર રણનીતિનો પરિચય આપીને ન્યૂઝીલેન્ડને 5 વિકેટે પરાજય આપ્યો છે. ટી20 વર્લ્ડ કપના ઇતિહાસમાં આ પ્રથમ અવસર છે જ્યારે શ્રીલંકાની મહિલા બ્રિગેડે ન્યૂઝીલેન્ડને હરાવવામાં સફળતા મેળવી હોય.

શ્રીલંકાની ખરાબ શરૂઆત અને નીલાક્ષિકાનો 'ચમત્કાર'

ન્યૂઝીલેન્ડના 151 રનના લક્ષ્યનો પીછો કરવા ઉતરેલી શ્રીલંકાની શરૂઆત સારી રહી હતી. કેપ્ટન ચામરી અટાપટ્ટુ (27 રન, 19 બોલ) અને વિષમી ગુણારત્નેએ પ્રથમ વિકેટ માટે 45 રન જોડ્યા હતા. પરંતુ, તેજીથી બેટિંગ કરી રહેલી કેપ્ટન અટાપટ્ટુ આઉટ થતાની સાથે જ શ્રીલંકાની ઇનિંગ લથડી ગઈ હતી. લંકન ટીમે માત્ર 55 રનના સ્કોર પર પોતાની 4 મહત્વની વિકેટો ગુમાવી દીધી હતી. 9 મી ઓવર સુધી એવું લાગી રહ્યું હતું કે ન્યૂઝીલેન્ડ આ મેચ સરળતાથી જીતી જશે. પરંતુ 6 ઠ્ઠા નંબર પર બેટિંગ કરવા આવેલી 36 વર્ષની અનુભવી ખેલાડી નીલાક્ષિકા ડી સિલ્વા અલગ જ મૂડમાં હતી. તેમણે ક્રીઝ પર આવતાની સાથે જ કીવી બોલરોની લાઈન-લેન્થ બગાડી નાખી હતી. નીલાક્ષિકાએ કવિશા દિલહારી સાથે મળીને માત્ર 39 દડામાં અર્ધશતકીય ભાગીદારી નોંધાવી હતી, જેમાં નીલાક્ષિકાનો હિસ્સો 32 રનનો હતો. તેમણે માત્ર 33 દડામાં પોતાની શાનદાર હાફ સેન્ચુરી પૂરી કરી લીધી હતી.

અંતિમ ઓવરોમાં કૌશાનીનો તોફાની સાથ

15 મી ઓવરમાં જ્યારે કવિશા આઉટ થઈ ત્યારે શ્રીલંકા પર ફરી દબાણ વધ્યું હતું, પરંતુ વિકેટકીપર બેટ્સમેન કૌશાની નુત્થયાંગનાએ નીલાક્ષિકાને અદભુત સાથ આપ્યો હતો. કૌશાનીએ કીવી બોલરો પર આક્રમણ કરતા 3 ચોગ્ગાની મદદથી માત્ર 14 દડામાં અણનમ 24 રન ફટકારી દીધા હતા. આ બંને મહિલા ખેલાડીઓએ માત્ર 28 દડામાં 48 રનની અજેય ભાગીદારી કરીને શ્રીલંકાને 2 દડા બાકી રહેતા જ ઐતિહાસિક જીત અપાવી દીધી હતી. નીલાક્ષિકા 37 દડામાં 54 રન બનાવીને અણનમ રહી હતી.

ન્યૂઝીલેન્ડની બેટિંગ અને ખરાબ હાલત

આ પહેલાં ટોસ જીતીને બેટિંગ કરવા ઉતરેલી ન્યૂઝીલેન્ડની ટીમ 20 ઓવરમાં 5 વિકેટ ગુમાવીને 150 રન જ બનાવી શકી હતી. કેપ્ટન એમિલી કર્ર અને સોફી ડિવાઈને 45-45 રનની ઇનિંગ રમીને ટીમને સન્માનજનક સ્કોર સુધી પહોંચાડી હતી, પરંતુ અન્ય કોઈ બેટ્સમેન મોટો સ્કોર કરી શક્યા નહોતા. શ્રીલંકા તરફથી બોલિંગમાં કવિશા દિલહારીએ 2 વિકેટ ઝડપી હતી, જ્યારે મિતાલી અયોધ્યા, અટાપટ્ટુ, સુગંધિકા અને નિમાશા મીપગેને 1-1 સફળતા મળી હતી.

વધુ વાંચો : સંચિતા ઉગલેના નિધન બાદ ચોંકાવનારો ખુલાસો!, કો-એક્ટર પર લાગ્યા ગંભીર

આ શરમજનક હાર સાથે જ ન્યૂઝીલેન્ડની ટીમ ગ્રુપ બી માં 5 મા સ્થાને ધકેલાઈ ગઈ છે અને તેનું વર્લ્ડ કપનું સફર હવે અત્યંત મુશ્કેલ બની ગયું છે. આ પહેલાં વેસ્ટ ઇન્ડીઝે પણ ન્યૂઝીલેન્ડને 7 વિકેટે કચડી નાખ્યું હતું. બીજી તરફ, ઇંગ્લેન્ડ સામે 87 રને હાર્યા બાદ શ્રીલંકાએ આ ટૂર્નામેન્ટમાં પોતાની પ્રથમ અને સૌથી યાદગાર જીત નોંધાવી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ