ગાંધીનગર / TAT (ઉચ્ચતર માધ્યમિક) પ્રીલિમ પરીક્ષાનું પરિણામ જાહેર, 10,876 ઉમેદવારોએ 100થી વધુ ગુણ મેળવ્યા

રાજ્ય પરીક્ષા બોર્ડ (SEB) દ્વારા લેવામાં આવેલી શિક્ષક અભિરુચિ કસોટી (TAT) ઉચ્ચતર માધ્યમિકની પ્રીલિમ પરીક્ષાનું પરિણામ જાહેર કરવામાં આવ્યું છે. ગુજરાતી, અંગ્રેજી અને હિન્દી માધ્યમના ઉમેદવારો માટેનું પરિણામ બોર્ડની સત્તાવાર વેબસાઇટ પર ઉપલબ્ધ કરાવવામાં આવ્યું છે. જોકે, પરિણામ જાહેર થયા બાદ અનેક ઉમેદવારોએ વેબસાઇટ ધીમી ચાલતી હોવા અથવા ન ખુલતી હોવાની ફરિયાદો નોંધાવી છે.

આ વર્ષે કુલ 1,47,584 ઉમેદવારોએ પરીક્ષા આપી હતી. જાહેર કરાયેલા પરિણામ મુજબ 51,971 ઉમેદવારોએ 70થી વધુ ગુણ મેળવ્યા છે, જ્યારે 34,644 ઉમેદવારોએ 80થી વધુ ગુણ પ્રાપ્ત કર્યા છે. તે ઉપરાંત 20,893 ઉમેદવારોએ 90થી વધુ ગુણ અને 10,876 ઉમેદવારોએ 100થી વધુ ગુણ મેળવી નોંધપાત્ર સફળતા હાંસલ કરી છે. પરિણામના વિશ્લેષણ અનુસાર 1,666 ઉમેદવારોએ 120થી વધુ ગુણ મેળવી ઉત્તમ પ્રદર્શન કર્યું છે, જે રાજ્યભરના ઉમેદવારોમાં સ્પર્ધાત્મક સ્તર દર્શાવે છે.

રાજ્ય પરીક્ષા બોર્ડે જણાવ્યું છે કે પરિણામ અંગે કોઈ વાંધો હોય અથવા ગુણની પુનઃચકાસણી કરાવવી હોય તેવા ઉમેદવારો 18 જૂનથી 30 જૂન, 2026 દરમિયાન ઓનલાઈન અરજી કરી શકશે. પુનઃચકાસણી સંબંધિત તમામ વિગતો બોર્ડની વેબસાઇટ પર ઉપલબ્ધ કરાવવામાં આવશે.

આગામી તબક્કામાં ગુજરાતી માધ્યમની TAT મુખ્ય પરીક્ષા 19 જુલાઈ, 2026ના રોજ યોજાશે. જ્યારે હિન્દી માધ્યમની મુખ્ય પરીક્ષા ઓગસ્ટ મહિનામાં યોજાય તેવી સંભાવના વ્યક્ત કરવામાં આવી રહી છે. પરિણામ જાહેર થતાં હવે હજારો ઉમેદવારો મુખ્ય પરીક્ષાની તૈયારીમાં વ્યસ્ત બન્યા છે.

આ પણ વાંચોઃટ્રાફિક નિયમ ભંગ કરનારા સાવધાન, 5થી વધુ ચલણ પર લાયસન્સ સસ્પેન્ડ થશે

શિક્ષક ભરતી પ્રક્રિયામાં મહત્વપૂર્ણ ગણાતી TAT પરીક્ષાના આ પરિણામે સફળ ઉમેદવારોમાં ઉત્સાહનો માહોલ જોવા મળી રહ્યો છે, જ્યારે મુખ્ય પરીક્ષાની તારીખ નજીક આવતા તૈયારીનો ધમધમાટ પણ તેજ બન્યો છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ