- રાજકોટ વિધાનસભાની સેન્સ પ્રક્રિયામાં વજુભાઇ વાળાની એન્ટ્રી
- વજુભાઇ વાળાના અંગત મદદનીશ તેજસ ભટ્ટીએ માંગી ટિકિટ
- રાજકોટ પશ્વિમ અને રાજકોટ પૂર્વ બેઠક પર નોંધાવી ઉમેદવારી
રાજ્યમાં વિધાનસભા ચૂંટણીના પડઘમ વાગી રહ્યા છે. તેવાંમાં ભાજપ દ્વારા બે દિવસથી સેન્સ લેવાની પ્રક્રિયા ચાલી રહી છે. જોકે અહી મોટી વાત તો જોવા મળી કે, ભાજપની સેન્સ પ્રક્રિયામાં ટિકિટ વાચ્છુકોનો રાફડો ફાટ્યો હોવાની સ્થિતિ બની છે. વિગતો મુજબ એક બેઠક ઉપર સરેરાશ 20-20 દાવેદારો જોવા મળ્યા છે. તેવામાં રાજકોટ વિધાનસભાની સેન્સ પ્રક્રિયામાં વજુભાઇ વાળાની એન્ટ્રી થતા ચર્ચા જાગી છે.
વર્ષોથી વજુભાઇ વાળા સાથે જોડાયેલા છે તેજસ ભટ્ટી
વજુભાઇ વાળાએ પોતાના અંગત મદદનીશ તેજસ ભટ્ટીએ ટિકિટ માંગી છે. તેજસ ભટ્ટીએ રાજકોટ પશ્વિમ અને રાજકોટ પૂર્વ બેઠક પર ઉમેદવારી નોંધાવી છે. તેજસ ભટ્ટી વર્ષોથી વજુભાઇ વાળા સાથે જોડાયેલા છે. દાવેદારી નોંધાવ્યા બાદ તેજસ ભટ્ટીનું નિવેદન સામે આવ્યું છે. તેમણે જણાવ્યું કે પાર્ટીએ નક્કી કર્યું છે કે 25 ટકા નવા ઉમેદવારને ટિકિટ આપવાની છે. જેને લઇને વિધાનસભા 68 અને 69 બંને માટે દાવેદારી કરી છે અને વજુભાઈ વાળાના આશીર્વાદ મારી સાથે જોડાયેલા છે. ટિકિટ માટે મેં વજુભાઈનું ધ્યાન દોર્યું છે તેમણે મને આશીર્વાદ આપ્યા છે.
બે દિવસથી ચાલતી ભાજપની સેન્સ પ્રક્રિયા
ગુજરાતમાં વિધાનસભાની ચૂંટણી જાહેરાતનું કાઉન્ટ શરૂ થઈ ગયો છે ત્યારે ભાજપ, કોંગ્રેસ અને આમ આદમી પાર્ટીએ કમર કસી લીધી છે અને જોરદાર તૈયારી કરી રહ્યાં છે. ચૂંટણી પ્રચારથી લઈ બેઠકોનો દોર શરૂ કરી દીધો છે. ભાજપે ચૂંટણીલક્ષી રાજનીતિ માટે નિરીક્ષકોની યાદી જાહેર કરી છે અને ગઇકાલથી સેન્સ પ્રક્રિયા હાથ ધરી છે.
