Asia Cup 2025 / શ્રીલંકા તો એશિયા કપમાંથી OUT! તો હવે કોના ફાળે જશે ફાઇનલની ટિકિટ, ભારત vs પાકિસ્તાન?

પાકિસ્તાનની શ્રીલંકા પરની જીત પછી એશિયા કપ ફાઇનલની દોડ વધુ રસપ્રદ બની ગઈ છે. સુપર-4માં પહોંચેલી ચાર ટીમોમાંથી એક શ્રીલંકા હવે લગભગ બહાર થઈ ગઈ છે.

જો કોઈ ચમત્કાર નહીં બને તો ફાઇનલમાં ભારત, પાકિસ્તાન અને બાંગ્લાદેશમાંથી જ બે ટીમો એકબીજાને ટક્કર આપવા સામસામે મેદાનમાં ઊતરશે. ભારતની દાવેદારી સૌથી મજબૂત છે, કારણ કે તેનો નેટ રન રેટ સારો છે અને ટીમ પણ ખુબ જ મજબૂત છે. અસલી ટક્કર બાંગ્લાદેશ અને પાકિસ્તાન વચ્ચે જોવા મળશે.

શ્રીલંકાની પાકિસ્તાન સામે હાર

પાકિસ્તાનને સુપર-4માં ભારત સામે હારનો સામનો કરવો પડ્યો હતો, પરંતુ ત્યારબાદ તેણે શ્રીલંકાને હરાવીને સ્પર્ધાને વધુ જ રસપ્રદ બનાવી દીધી છે. ત્રણ સતત જીત બાદ થયેલી બે હારે શ્રીલંકાની સફર લગભગ પૂરી કરી દીધી છે. હવે ભારતીય ટીમ આજે બાંગ્લાદેશ સામે મેદાનમાં ઊતરશે. બંને ટીમો પાસે 1-1 જીત છે, એટલે આજે જે જીતશે તે સીધી ફાઇનલમાં પહોંચશે. હારનાર ટીમ પાસે એક છેલ્લો મોકો રહેશે.

ફાઇનલની દોડ બનશે વધુ શાનદાર

હાલ પોઇન્ટ ટેબલમાં ભારત 2 પોઇન્ટ સાથે અને 0.689 નેટ રન રેટ ધરાવીને પ્રથમ સ્થાને છે. પાકિસ્તાન, શ્રીલંકાને હરાવ્યા પછી 2 પોઇન્ટ અને 0.226 નેટ રન રેટ સાથે બીજા ક્રમે છે. બાંગ્લાદેશ 2 પોઇન્ટ અને 0.121 નેટ રન રેટ સાથે ત્રીજા ક્રમે છે. શ્રીલંકા તેના બંને સુપર-4 મુકાબલા હારીને હવે લગભગ બહાર છે. આજે ભારત અને બાંગ્લાદેશનો મુકાબલો એક ફાઇનલિસ્ટ ટીમનું નામ નક્કી કરી દેશે.

શું છે ફાઇનલનું સમીકરણ?

ભારત અને બાંગ્લાદેશ વચ્ચે જે જીતશે તે 4 પોઇન્ટ મેળવી ફાઇનલમાં પ્રવેશ મેળવી લેશે. જેમાં હાર થશે તેની સ્થિતિ મુશ્કેલ બનશે. જો બાંગ્લાદેશ હારે તો ભારત ફાઇનલમાં પહોંચી જશે અને ત્યારબાદ તેને પાકિસ્તાન સામે રમવું પડશે. અહીં જે જીતશે તે ફાઇનલની ટિકિટ ઝડપી લેશે.

વધુ વાંચો : Asia Cup 2025 : પાકિસ્તાને શ્રીલંકાને 5 વિકેટથી હરાવ્યું, ફાઇનલમાં ભારતનો સામનો?

ફાઇનલમાં કોણ જશે?

જો ભારતીય ટીમ આજે હારી જાય તો તેને છેલ્લો મુકાબલો શ્રીલંકા સામે રમવો પડશે. તે પહેલાં એક દિવસ પાકિસ્તાન અને બાંગ્લાદેશ વચ્ચેનો મુકાબલો થશે. જો પાકિસ્તાન જીતે તો ભારતને શ્રીલંકા સામે મોટી જીત સાથે નેટ રન રેટ સુધારીને જ ફાઇનલમાં પહોંચવું પડશે. જ્યારે જો બાંગ્લાદેશ પાકિસ્તાનને હરાવે તો ભારત ફક્ત શ્રીલંકાને હરાવીને ફાઇનલમાં પહોંચી જશે. પરંતુ જો અંતમાં પાકિસ્તાન અને ભારત બંને તેમના છેલ્લા મુકાબલામાં હારી જાય તો ફાઇનલમાં કોણ જશે તેનો નિર્ણય નેટ રન રેટના આધારે થશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ