માફી માંગી / ભારતના સમર્થનમાં આવ્યું રશિયા, માં કાલીના અપમાન કરવા બદલ યુક્રેનને લીધું આડેહાથ

• યુક્રેનના સંરક્ષણ વિભાગે હિન્દુ દેવી મા કાલીની મજાક ઉડાવી
• મા કાલીના અપમાન પર હિંદુઓના સમર્થનમાં આવ્યું રશિયા
• રશિયાએ યુક્રેનના આ કૃત્યની નિંદા કરતા નાઝીવાદ સાથે કરી તુલના

યુક્રેનના સંરક્ષણ વિભાગ દ્વારા હિન્દુ દેવી મા કાલીની મજાક ઉડાવવાના મામલે ભારતને રશિયાનું સમર્થન મળ્યું છે. રશિયાએ યુક્રેનના આ કૃત્યની નિંદા કરી છે અને યુક્રેનની તુલના નાઝીવાદ સાથે કરી છે. તમને જણાવી દઈએ કે યુક્રેનના સંરક્ષણ વિભાગે હાલમાં જ એક ટ્વીટ કર્યું હતું, જેમાં વિસ્ફોટ બાદ ઉછળતા ધુમાડાને મા કાલી તરીકે દર્શાવવામાં આવ્યો હતો અને હિંદુ આસ્થાની મજાક ઉડાવવામાં આવી હતી. જો કે વિવાદ વધ્યા બાદ યુક્રેને આ ટ્વિટ ડિલીટ કરી દીધી હતી.

રશિયાએ ભારતને સમર્થન આપ્યું 

સંયુક્ત રાષ્ટ્રમાં રશિયાના પ્રતિનિધિ દિમિત્રી પોલિન્સકીએ કહ્યું કે 'કિવની સરકાર કોઈની પણ આસ્થાની પરવા કરતી નથી પછી તે હિન્દુ હોય, મુસ્લિમ હોય કે ખ્રિસ્તી રૂઢિચુસ્ત હોય. યુક્રેનિયન સૈનિકો કુરાન બાળી રહ્યા છે, મા કાલીનો ઉપહાસ કરી રહ્યા છે અને રૂઢિવાદી ખ્રિસ્તીઓના પવિત્ર સ્થળોનો નાશ કરી રહ્યા છે. તે માત્ર નાઝી વિચારધારામાં માને છે. તે યુક્રેનને બધાથી ઉપર માને છે.

યુક્રેને માફી માંગી

યુક્રેનની સરકારે તેના સંરક્ષણ વિભાગના ટ્વિટ માટે માફી પણ માંગી છે. યુક્રેનના ડેપ્યુટી ફોરેન મિનિસ્ટર એમિન જાપ્રોવાએ એક નિવેદન જારી કરીને કહ્યું હતું કે 'હિંદુ દેવી મા કાલીને ખોટી રીતે બતાવવા માટે અમે અને અમારું સંરક્ષણ વિભાગ શરમ અનુભવીએ છીએ. યુક્રેન અને યુક્રેનના લોકો ભારતીય સંસ્કૃતિનો આદર કરે છે અને તેમના સમર્થનની પ્રશંસા કરે છે. તે ફોટો દૂર કરવામાં આવ્યો છે અને અમે પરસ્પર સહકાર અને પરસ્પર સન્માન વધારવા માટે સમર્પિત છીએ.