રાજકોટના ગોંડલમાં ભાજપની ટિકિટ મુદ્દે ફરી એકવાર રાજકારણ ગરમાયું છે.સહદેવસિંહ જાડેજાને ક્ષત્રિય સમાજના પ્રમુખ પદેથી નિષ્ક્રિય કરવા માટે કારોબારીની બેઠકમાં નિર્ણય લેવામાં આવ્યો છે.
ગુજરાત વિધાનસભાની ચૂંટણીની જાહેરાત અંગે ઘડીઑ ગણાઈ રહી છે. ત્યારે રાજકોટના ગોંડલમાં ભાજપની ટિકિટ મુદ્દે ફરી એકવાર રાજકારણ ગરમાયું છે. સહદેવસિંહ જાડેજાને ક્ષત્રિય સમાજના પ્રમુખ પદેથી દૂર કરવામાં આવ્યા છે અને હરિહરસિંહ વાઘેલાને સમાજના કાર્યકારી અધ્યક્ષ બનાવવામાં આવ્યા છે. સહદેવસિંહ જાડેજા રીબડાના અનિરુદ્ધસિંહ જાડેજા જૂથના છે અને તેમને હટાવતા ફરી એક વખત ગોંડલમાં ટિકિટની ઘમાસાણ વચ્ચે પદને લઈ વધુ વિવાદ સર્જાયો છે.
સહદેવસિંહ, જયંતિ ઢોલ માટે માગી છે ટિકિટ
જેમ જેમ ચૂંટણી નજીક આવી રહી છે તેમ-તેમ ગોંડલમાં ભાજપની ટિકિટ મુદ્દે માહોલ ગરમાતો જાય છે. છેલ્લા કેટલાક સમયથી ભાજપની ટિકિટ મુદ્દે બે જૂથ આમને સામને આવી ગયા છે. એક જૂથ વર્તમાન ધારાસભ્યના પતિ જયરાજસિંહ જાડેજાનો છે. જ્યારે જયરાજસિંહ સામે રિબડાના અનિરૂદ્ધસિંહ જાડેજા જૂથ ટિકિટની માંગણી કરી રહ્યા છે. બન્ને જૂથ ટિકિટની દાવેદારી માટે શક્તિ પ્રદર્શન કરી રહ્યા છે. અગાઉ કડવા અને લેઉવા પાટિદારે અલગ અલગ સમેલન દ્વારા શક્તિ પ્રદર્શન કર્યું હતું. પટેલ સમાજ સાથે ક્ષત્રિય સમાજનું પણ શક્તિ પ્રદર્શન યોજાયું હતુ. બન્ને જૂથ પોતાના નેતાને ટિકિટ મળે તે માટે એડીચોટીનું જોર લગાવી રહ્યા છે.
ગોંડલમાં ગરમાયું રાજકારણ
ગોંડલમાં ભાજપની ટિકિટ મુદ્દે વિખવાદ ચાલી રહ્યો છે. ત્યારે રીબડા જૂથ સહદેવસિંહ અને જયંતિ ઢોલ માટે ટિકિટ માગી રહ્યું છે. જ્યારે ગોંડલના વર્તમાન ધારાસભ્યનું જૂથ ટિકિટ માટે દાવેદારી કરી રહ્યા છે. હવે સહદેવસિંહ જાડેજાને પ્રમુખ પદેથી હટાવતા ફરી રાજકારણ ગરમાયું છે. ત્યારે હવે ટિકિટ વિખવાદમાં ગોંડલમાં નવા જૂની થાય તેવા એંધાણ દેખાઈ રહ્યા છે.
ક્ષત્રિય સમાજની કારોબારી બેઠક યોજાઇ હતી. જે કારોબારી બેઠકમાં નવા પ્રમુખની વરણી બાદ સહદેવસિંહે કોર્ટમાં જવાની ધમકી આપી છે. સહદેવસિંહ જાડેજા અનિરુદ્ધસિંહ જૂથના હોવાથી કાર્યવાહી થઈ હોવાની ચર્ચાઓએ જોર પકડ્યુ છે. નવા પ્રમુખની વરણી બાદ ભાજપ નેતા સહદેવસિંહ જાડેજાએ નવા પ્રમુખની વરણીને સ્વિકારવાનો ઈનકાર કર્યો હતો અને કહ્યુ હતુ કે, જરૂર પડ્યે હું કોર્ટના દરવાજા ખખડાવીશ.
