- ગણતંત્ર દિવસ સમારોહને માત્ર એક સપ્તાહ બાકી
- ગૃહ મંત્રાલયે સર્ક્યુલર જાહેર કર્યું
- ભારતીય ધ્વજની ગરિમા જળવાય તે સુનિશ્ચિત કરવું જરૂરી
ગણતંત્ર દિવસ સમારોહને માત્ર એક સપ્તાહ બાકી છે. ગૃહ મંત્રાલયે ગણતંત્ર દિવસ 26 જાન્યુઆરીને ધ્યાનમાં રાખીને દેશના તમામ રાજ્યો અને કેન્દ્રશાસિત પ્રદેશો માટે એક સર્ક્યુલર જાહેર કર્યું છે. રાજ્યો અને કેન્દ્રશાસિત પ્રદેશોને આદેશ આપવામાં આવ્યો છે કે, રાષ્ટ્રીય, સાંસ્કૃતિક અને રમતગમતના આયોજન દરમિયાન ભારતીય ધ્વજનો ઉપયોગ કરવામાં આવે ત્યારપછી તેને જમીન પર ફેંકવામાં ના આવે તે સુનિશ્ચિત કરવું.
ગૃહ મંત્રાલયે જણાવ્યું છે કે, ‘ભારતીય રાષ્ટ્રીય ધ્વજ ભારતીયોની આશા અને આકાંક્ષાનું પ્રતિનિધિત્ત્વ કરે છે અને ઝંડાની ગરિમાને અનુરૂપ કાગળના તિરંગાને વ્યક્તિગતરૂપે માનપૂર્વક રાખવામાં આવે.’ ગૃહ મંત્રાલય તરફથી જાહેર કરેલ સર્ક્યુલરમાં જણાવવામાં આવ્યું છે કે, ‘કાગળથી બનેલ રાષ્ટ્રીય ધ્વજને રાષ્ટ્રીય, સાંસ્કૃતિક અને રમતગમત આયોજન સાથે જોડાયેલ અવસર પર ‘ભારતની ધ્વજ સંહિતાના ભાગ- IIના પેરેગ્રાફ 2.2ના ખંડ (x)’ હેઠળ લહેરાવવામાં આવે છે. જેમાં અનુરોધ કરવામાં આવ્યો છે કે, જનતા દ્વારા જે પણ કાગળના ધ્વજનો ઉપયોગ કરવામાં આવે તેને કાર્યક્રમ પછી જમીન પર ના ફેંકવો.’
વધુ વાંચો: ઉત્તર ભારત જનારા માટે મોટા સમાચાર: આઠ દિવસ સુધી દિલ્હીમાં ફ્લાઇટની ઉડાન પર રોક, સરકારે આ કારણે લીધો નિર્ણય
26 જાન્યુઆરીના રોજ 75માં ગણતંત્ર દિવસની ઊજવણી કરવામાં આવશે. ગણતંત્ર દિવસ સમારોહમાં ફ્રાંસના રાષ્ટ્રપતિ ઈમૈનુએલ મેક્રોલ મુખ્ય અતિથિ હશે. દિલ્હીમાં ગણતંત્ર દિવસ પરેડની તૈયારીઓ કરવામાં આવી રહી છે. નવી દિલ્હીને છાવણી તબદીલ કરી દેવામાં આવ્યું છે. દિલ્હી મેટ્રોની સુરક્ષામાં વધારો કરવામાં આવ્યો છે.
