- રાજકોટ- જામનગર હાઇવે પર ધ્રોલ પાસે અકસ્માત
- કાર ચાલકે સ્ટેરીંગ પરથી કાબુ ગુમાવતા સર્જાયો અકસ્માત
- બાળક સહિત 2 લોકોના ઘટના સ્થળે જ મોત
રાજકોટ-જામનગર હાઇવે આજે વધુ એક વખત રક્તરંજિત બન્યો છે. જેમાં આજે ભાઈબીજના દિવસે જ ધ્રોલની આહિર કન્યા છાત્રાલય પાસે અકસ્માત સર્જાયો હતો. આ ગોઝારી ઘટનામાં બે ના કમકમાટીભર્યા મોત નિપજતા અરેરાટી મચી જવા પામી છે.
ધ્રોલ પાસે રાજકોટ જામનગર હાઇવે પર અકસ્માત
ધ્રોલ પાસે રાજકોટ જામનગર હાઇવે પર કાર ચાલકે સ્ટેરીંગ પરથી કાબુ ગુમાવતા અકસ્માત સર્જાયો હતો. આ ઘટનામાં આશરે 10 વર્ષના બાળક સહીત બીજલભાઈ જેઠવા નામના વ્યક્તિના મોત નીપજયા હતા. વધુમાં કારમાં સવાર મહિલાને ગંભીર ઇજા થવા પામી હતી. આથી મહીલાને તાત્કાલિક સારવાર અર્થે જામનગરની જીજી હોસ્પિટલ ખાતે ખસેડવામાં આવી હતી. આ ઉપરાંત એક દોઢ વર્ષની ફૂલ જેવી બાળકીનો ચમત્કારીક રીતે બચાવ થયો હતો.
કાર ચાલકે સ્ટેરીંગ પરથી કાબુ ગુમાવતા સર્જાયો અકસ્માત
પ્રાથમિક વિગત અનુસાર આ પરિવાર અમદાવાદનો હોય અને જામનગર જઇ રહ્યો હતો. આ વેળાએ અકસ્માત નડ્યો હોવાનું સામે આવ્યું છે. આ ઘટનાની જાણ થતાં પોલીસે તાત્કાલિક ઘટનાસ્થળે દોડી જઈ તપાસ હાથ ધરી છે. ઉપરાંત મૃતકના પરિવારજનોને જાણ કરી કાર્યવાહી આગળ ધપાવી છે.
મોરબીના હરીપર કેરાળા પાસે અકસ્માતમાં બે ના મોત
ઉલ્લેખનીય છે કે અકસ્માતની વધુ એક ઘટના મોરબીના હરીપર કેરાળા પાસે સામે આવી હતી. જેમાં ટેમ્પો અને ખાનગી બસ વચ્ચે અકસ્માત સર્જાયો હતો. જે અકસ્માતમાં બે લોકોના ઘટનાસ્થળે જ મોત નીપજ્યા હતાં તેમજ સાતથી વધુ લોકોને ઈજા પહોંચી છે. તમામ ઈજાગ્રસ્તોને સારવાર માટે હોસ્પિટલ ખસેડવામાં આવ્યાં છે. જે અકસ્માતના પગલે સમગ્ર પંથકમાં ચકચાર મચી જવા પામી છે.
