ગુજરાત / 3ના મોત, 4 ઈજાગ્રસ્ત, ટેન્કર-ઇકો વચ્ચે અકસ્માતથી હાઇવે મરણચીસોથી ગૂંજ્યો

રાજકોટ-અમદાવાદ હાઈવે પર બેટી રામપર ગામ નજીક આજે સવારે ગંભીર અકસ્માત સર્જાયો હતો. પ્રાથમિક માહિતી મુજબ, ટેન્કર અને ઇકો કાર વચ્ચે જોરદાર ટક્કર થતાં અકસ્માત થયો હતો. અકસ્માત એટલો ભયંકર હતો કે ઘટનાસ્થળે જ ત્રણ લોકોના કરુણ મોત થયા હોવાનું સામે આવ્યું છે.

અકસ્માતમાં અન્ય ચાર લોકો ગંભીર રીતે ઈજાગ્રસ્ત થયા હતા. ઘટનાની જાણ થતાં જ સ્થાનિક લોકો અને રાહદારીઓ તાત્કાલિક મદદ માટે દોડી આવ્યા હતા. ઈજાગ્રસ્તોને તાત્કાલિક સારવાર મળે તે માટે એમ્બ્યુલન્સની મદદથી નજીકની હોસ્પિટલમાં ખસેડવામાં આવ્યા હતા. હાલ તમામ ઘાયલોની સારવાર ચાલી રહી છે.

વાહનોની લાંબી કતારો લાગી ગઈ

અકસ્માતના કારણે હાઈવે પર વાહનોની લાંબી કતારો લાગી ગઈ હતી અને ટ્રાફિક વ્યવસ્થા ખોરવાઈ ગઈ હતી. ભારે વાહનવ્યવહાર ધરાવતા રાજકોટ-અમદાવાદ હાઈવે પર અકસ્માત બાદ બંને તરફ ટ્રાફિક જામ સર્જાયો હતો. વાહનચાલકોને ભારે મુશ્કેલીનો સામનો કરવો પડ્યો હતો.

એરપોર્ટ પોલીસની ટીમ તાત્કાલિક ઘટનાસ્થળે પહોંચી

ઘટનાની જાણ થતા જ કુવાડવા પોલીસ અને એરપોર્ટ પોલીસની ટીમ તાત્કાલિક ઘટનાસ્થળે પહોંચી હતી. પોલીસ દ્વારા અકસ્માતગ્રસ્ત વાહનોને રસ્તા પરથી હટાવવાની કામગીરી હાથ ધરવામાં આવી હતી જેથી ટ્રાફિક વ્યવસ્થા ફરી સામાન્ય બની શકે. સાથે જ પોલીસે ઘટનાસ્થળે પહોંચી સમગ્ર પરિસ્થિતિનું નિરીક્ષણ કરીને અકસ્માત અંગેની વધુ તપાસ શરૂ કરી હતી.

ચોક્કસ કારણ હજુ સુધી સામે આવ્યું નથી

પ્રાથમિક તપાસમાં અકસ્માતનું ચોક્કસ કારણ હજુ સુધી સામે આવ્યું નથી. જોકે ટેન્કર અને ઇકો કાર વચ્ચે થયેલી જોરદાર ટક્કર અકસ્માતનું મુખ્ય કારણ હોવાનું માનવામાં આવી રહ્યું છે. પોલીસ દ્વારા બંને વાહનોની સ્થિતિ તેમજ અન્ય ટેક્નિકલ પાસાઓની પણ તપાસ કરવામાં આવી રહી છે.

આ પણ વાંચો : શિક્ષણ રાજ્યમંત્રી રિવાબા જાડેજાએ વિદ્યાર્થીઓ સાથે રમ્યા બેડમિન્ટન, ફિટનેસ અને રમતગમતનો પ્રેરણાદાયી સંદેશ

અકસ્માતમાં મૃત્યુ પામેલા લોકોની ઓળખ અને તેઓ ક્યાંના રહેવાસી હતા તે અંગેની માહિતી મેળવવાની કાર્યવાહી પણ ચાલી રહી છે. બીજી તરફ ઘાયલોના પરિવારજનોને ઘટનાની જાણ કરવામાં આવી છે અને હોસ્પિટલ ખાતે તેમના સ્વજનો પહોંચી રહ્યા છે. આ ગંભીર અકસ્માતને કારણે સમગ્ર વિસ્તારમાં શોકનો માહોલ જોવા મળ્યો હતો. સ્થાનિક લોકોએ પણ માર્ગ સલામતી અંગે ચિંતા વ્યક્ત કરી હતી અને હાઈવે પર વાહનચાલકોને વધુ સાવચેતી રાખવાની અપીલ કરી હતી. પોલીસ દ્વારા અકસ્માત અંગે વધુ તપાસ હાથ ધરવામાં આવી છે અને આગામી દિવસોમાં અકસ્માતનું ચોક્કસ કારણ સામે આવે તેવી શક્યતા છે

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ