બિઝનેસ / હવે આટલા લિટરથી વધારે પેટ્રોલ નહીં લઇ જઇ શકો, નિયમ તોડ્યો તો ગયા!

કેન્દ્ર સરકારે પેટ્રોલ અને ડીઝલના પુરવઠા અંગે એક મહત્વપૂર્ણ નિર્ણય લીધો છે. પેટ્રોલિયમ અને કુદરતી ગેસ મંત્રાલય દ્વારા જારી કરાયેલા નવા આદેશ મુજબ હવે ફેક્ટરીઓ, મોટી કંપનીઓ અને અન્ય ઔદ્યોગિક, વાણિજ્યિક તેમજ સંસ્થાકીય ગ્રાહકો પેટ્રોલ પંપ પરથી પેટ્રોલ અથવા ડીઝલ ખરીદી શકશે નહીં. આ ગ્રાહકોને હવે માત્ર તેમના નિર્ધારિત ગ્રાહક પંપ (Customer Pump) પરથી જ ઇંધણ ખરીદવું પડશે. સરકારના આ નિર્ણયનો મુખ્ય હેતુ સામાન્ય જનતા માટે પેટ્રોલ અને ડીઝલનો સતત પુરવઠો જાળવી રાખવાનો છે.

પંપ માટે પણ કેટલાક સ્પષ્ટ નિયમો

સરકારે પેટ્રોલ પંપ માટે પણ કેટલાક સ્પષ્ટ નિયમો નક્કી કર્યા છે. નવા નિયમો અનુસાર પેટ્રોલ પંપ હવે માત્ર વાહનની ટાંકીમાં અથવા PESO દ્વારા મંજૂર કરાયેલા કન્ટેનરમાં જ ડીઝલ આપશે. આ ઉપરાંત કોઈપણ ગ્રાહક અથવા વાહનને એક દિવસમાં 200 લિટરથી વધુ ડીઝલ ખરીદવાની મંજૂરી આપવામાં આવશે નહીં. સાથે જ આ ડીઝલનું પુનઃવેચાણ પણ કરી શકાશે નહીં. આ નિયમોનું અમલીકરણ સુનિશ્ચિત કરવાની જવાબદારી તેલ કંપનીઓ અને પેટ્રોલ પંપ ડીલરોને સોંપવામાં આવી છે.

કાયમી નથી પરંતુ કામચલાઉ

સરકાર દ્વારા જારી કરાયેલા આ પ્રતિબંધો કાયમી નથી પરંતુ કામચલાઉ સ્વરૂપના છે. આદેશ હેઠળ લાગુ કરાયેલા નિયમો શરૂઆતમાં મહત્તમ 90 દિવસ માટે અમલમાં રહેશે. જો પરિસ્થિતિની જરૂરિયાત ઉભી થશે તો સરકાર આ સમયગાળો વધુ લંબાવી પણ શકે છે. સાથે જ સરકારને ચોક્કસ ગ્રાહકો, વિસ્તારો અથવા વિશેષ પ્રકારના વ્યવહારોને આ નિયમોમાંથી મુક્તિ આપવાનો અધિકાર પણ રહેશે.

આ નિર્ણય પાછળ બે મુખ્ય કારણો

સરકારે આ પગલું કેમ ભર્યું તે અંગે પણ સ્પષ્ટતા કરી છે. આ નિર્ણય પાછળ બે મુખ્ય કારણો જવાબદાર હોવાનું જણાવવામાં આવ્યું છે. પ્રથમ કારણ વૈશ્વિક પરિસ્થિતિ સાથે જોડાયેલું છે. વિશ્વના કેટલાક વિસ્તારોમાં ચાલી રહેલા ભૂ-રાજકીય તણાવના કારણે આંતરરાષ્ટ્રીય સપ્લાય ચેઇન, શિપિંગ વ્યવસ્થા અને પેટ્રોલિયમ ઉત્પાદનોની ઉપલબ્ધતા પર અસર પડી રહી છે. આવી સ્થિતિમાં ઉપલબ્ધ ઇંધણનો વિવેકપૂર્ણ ઉપયોગ અને પુરવઠાની સુરક્ષા જાળવવી જરૂરી હોવાનું સરકાર માને છે.

ઉલ્લંઘન કરનારાઓ સામે કડક કાર્યવાહી

આ આદેશનું ઉલ્લંઘન કરનારાઓ સામે કડક કાર્યવાહી કરવામાં આવશે. સરકારના જણાવ્યા અનુસાર નિયમોનો ભંગ કરવો આવશ્યક ચીજવસ્તુ અધિનિયમ, 1955 અને અન્ય લાગુ કાયદાઓ હેઠળ સજાપાત્ર ગુનો ગણાશે. દેખરેખ અને અમલીકરણ માટે કેન્દ્ર અથવા રાજ્ય સરકારના રાજપત્રિત અધિકારીઓ, ડીએસપી અથવા તેનાથી ઉપરના દરજ્જાના પોલીસ અધિકારીઓ તેમજ તેલ કંપનીઓના વેચાણ અધિકારીઓને શોધ અને જપ્તીની સત્તા આપવામાં આવી છે. રાજ્ય સરકારોને પણ સંગ્રહખોરી, કાળાબજાર અને ઇંધણના ગેરવહીવટ સામે કડક કાર્યવાહી કરવાની સૂચનાઓ આપવામાં આવી છે.

આ પણ વાંચો : સુરતની જેમ હવે વડોદરામાં ભૂતિયા ડિમોલિશનકાંડ! લાભાર્થીઓ પહોંચ્યા TDO પાસે

સામાન્ય વાહનચાલકો માટે આ નિર્ણયથી કોઈ ખાસ ફેરફાર થવાનો નથી. જો તમે તમારી કાર, બાઇક અથવા અન્ય સામાન્ય વાહનમાં પેટ્રોલ કે ડીઝલ ભરાવો છો તો તમારા માટે કોઈ નવા પ્રતિબંધો લાગુ થતા નથી. 200 લિટરની દૈનિક મર્યાદા સામાન્ય ગ્રાહકો માટે કોઈ સમસ્યા ઊભી કરતી નથી કારણ કે મોટાભાગના વાહનોની ટાંકીની ક્ષમતા આ મર્યાદાથી ઘણી ઓછી હોય છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ