ગુજરાત / 2022માં અમારા સમાજમાંથી મુખ્યમંત્રી બનશેઃ અખિલ ક્ષત્રિય ઠાકોર એકતા સમિતિના પ્રમુખના નિવેદનથી રાજકારણ ગરમાયું

• અખિલ ક્ષત્રિય ઠાકોર એક્તા સમિતિના પ્રમુખનું મોટું નિવેદન
• પ્રમુખ નવઘણજી ઠાકોરે મુખ્યમંત્રી પદને લઇ આપ્યું નિવેદન
• 2022માં ઠાકોર સમાજમાંથી મુખ્યમંત્રી બનશેઃ નવઘણજી ઠાકોર

ગુજરાત વિધાનસભાની ચુંટણીને માથે છે. ત્યારે 2022 ની ચૂંટણીમાં મુખ્યમંત્રી અમારા સમાજનો હોવો જોઈએ. તેવો મોટા ભાગના સમાજ આગેવાનોમાંથી સૂર ઉઠ્યો છે. આવી સ્થિતિ વચ્ચે અગાઉ પાટીદાર સમાજ અને ક્ષત્રિય સમાજ બાદ કોળી સમાજ દ્વારા પણ આ અંગેની માંગ કરવામાં આવી હતી. તેવામાં હવે આ મામલે અખિલ ક્ષત્રિય ઠાકોર એક્તા સમિતિના પ્રમુખનું મોટું નિવેદન સામે આવ્યું છે. 

કોંગ્રેસ મોવડી મંડળ સાથે અમારે વાત થઇ છેઃ નવઘણજી ઠાકોર
આગામી વિધાનસભાની ચૂંટણીમાં મુખ્યમંત્રી પદને અખિલ ક્ષત્રિય ઠાકોર એક્તા સમિતિના પ્રમુખ નવઘણજી ઠાકોરે પાટણથી હુંકાર કર્યો છે. જેમાં 2022માં ઠાકોર સમાજમાંથી મુખ્યમંત્રી બનશે. તેમ ઉમેર્યું હતું.  વધુમાં નવઘણજી ઠાકોરએ દાવા સાથે જણાવ્યું હતું કે,  આગામી વિધાનસભાની ચૂંટણીમાં કોંગ્રેસ 125 બેઠકો સાથે ઝળહળતો વિજય હાંસલ કરશે.  વધુમાં મુખ્યમંત્રી પદ માટે  કોંગ્રેસ મોવડી મંડળ સાથે અમારે વાત થઇ ગઇ હોવાનો પણ નવઘણજી ઠાકોરે ઉલ્લેખ કર્યો હતો.

અગાઉ પણ કર્યો હતો હુંકાર 
ઉલ્લેખનીય છે કે આ અગાઉ પણ 2022માં મુખ્યમંત્રી પદે ઠાકોરની માંગણીને લઇને અખિલ ક્ષત્રિય ઠાકોર એકતા સમિતિના અધ્યક્ષ નવઘણજી ઠાકોરે તીખું નિવેદન આપ્યું હતું.
આશરે ત્રણ માસ અગાઉ  નવઘણજી ઠાકોરે બનાસકાંઠાના ઢીમાથી ધરણીધર ભગવાનના દર્શન કરીને વિજય સંકલ્પ યાત્રા શરૂ કરાવી હતી. આ વેળાએ તેમણે જણાવ્યું હતું કે કોંગ્રેસ અને ભાજપ બન્ને પાર્ટીને સમસ્ત સમાજ એક કરી અલ્ટીમેટમ આપવાનું છે કે,  જો ગુજરાતમાં રાજ કરવું હોય અને અમારા મત જોતા હોય તો મુખ્યમંત્રી અમારા ક્ષત્રિય ઠાકોર સમાજનો જાહેર કરવો પડશે. એટલુ જ નહી સંપૂર્ણ સરકાર ઓ.બી.સી અને એસ.સી એસ.ટી સમાજ હોવી જોઇએ તેમ પણ જણાવ્યું હતું.