ટેક્નોલોજી / ChatGPT બાદ OpenAIનું નવું ‘Always-On’ AI, હવે યુઝર વગર પણ કલાકો-દિવસો સુધી કામ કરી શકશે

અત્યાર સુધી, AI પાસે કોઈ કાર્ય કરાવવા માટે તમારે વારંવાર સૂચનાઓ આપવી પડતી હતી, જેમ કે પ્રશ્ન પૂછવો અને જવાબ મેળવવો, અને તે સાથે જ તે પ્રક્રિયા પૂરી થઈ જતી હતી. જોકે, OpenAI હવે આ અભિગમ બદલવાનો પ્રયાસ કરી રહ્યું છે. કંપનીએ "Dots" નામના AI એજન્ટ્સ રજૂ કર્યા છે; એકવાર તેઓ કોઈ કાર્ય સમજી લે, પછી તમારે દરેક પગલે સૂચનાઓ આપવાની જરૂર રહેતી નથી અને તેઓ તે કાર્ય પર સતત કામ કરી શકે છે.

સરળ શબ્દોમાં કહીએ તો, આ માત્ર તમારા પ્રશ્નોના જવાબ આપતું AI નથી. તમે તેને કોઈ કાર્ય સોંપી શકો છો અને તે કામને આગળ વધારવા માટે જરૂરી આગલા પગલાં જાતે જ નક્કી કરશે. જ્યારે જરૂર પડશે ત્યારે તે તમારું સૂચન કે મંજૂરી મેળવશે અને ત્યારબાદ કાર્ય આગળ વધારશે. આ એવો તફાવત છે જે 'Dots' ને સામાન્ય ચેટબોટ્સથી અલગ પાડે છે. મેટાએ તાજેતરમાં 'Muse' લોન્ચ કર્યું છે, અને તેનું 'Muse Charm' ઉપકરણ પણ 'ઓલવેઝ-ઓન' AI એજન્ટ તરીકે કામ કરે છે.

જાતે જ કરશે બ્રાઉઝિંગ પણ

OpenAI ના જણાવ્યા અનુસાર, 'Dots' ખાસ કરીને એવા કાર્યો માટે તૈયાર કરવામાં આવ્યા છે જેનો અંત માત્ર એક મેસેજના જવાબથી આવતો નથી. દરેક 'Dot' પાસે પોતાનું ક્લાઉડ કમ્પ્યુટર અને બ્રાઉઝર હોય છે; તે કનેક્ટેડ એપ્સનો ઉપયોગ કરીને કોઈ પ્રોજેક્ટ પર કામ કરી શકે છે અને યૂઝર્સ દ્વારા ChatGPT છોડી દેવા છતાં પણ તે કાર્ય ચાલુ રાખી શકે છે.

Introducing dots, powered by GPT-6 Astra.

Remarkably capable, always-on agents built to handle everything. pic.twitter.com/inY5BZj3Kz

— OpenAI (@OpenAI) September 29, 2026

ઉદાહરણ તરીકે, જો તમે કોઈ પ્રોજેક્ટ પર કામ કરી રહ્યા હોવ, તો 'Dot' માત્ર તમારા માટે માહિતી જ નહીં શોધે; તે ઉપલબ્ધ ડેટાની સમીક્ષા કરી શકે છે, કામનો આગામી તબક્કો નક્કી કરી શકે છે, જરૂરી સામગ્રીનો મુસદ્દો તૈયાર કરી શકે છે અને ત્યારબાદ સમીક્ષા માટે તમારી પાસે પાછું આવી શકે છે.

ટૂંકમાં, નવું AI મોડેલ આ રીતે કામ કરે છે: ફક્ત કાર્ય જણાવો અને દરેક ઝીણી વિગત સમજાવવાને બદલે, તેને કામ આગળ વધારવા દો. સૌથી રસપ્રદ બાબત એ છે કે તમે ChatGPT બંધ કરી દો તો પણ કામ ચાલુ રહે છે.

‘Dots’ની મુખ્ય વિશેષતા એ છે કે તે always-on રહે છે. OpenAIના જણાવ્યા અનુસાર, તે બેકગ્રાઉન્ડમાં તમારા કાર્યો પર કામ કરવાનું ચાલુ રાખી શકે છે અને જ્યારે કોઈ મહત્વપૂર્ણ નિર્ણય લેવાનો હોય અથવા તમારી મંજૂરીની જરૂર હોય ત્યારે તે તમારો સંપર્ક કરે છે.

ઉદાહરણ તરીકે, જો તમે સતત બદલાતા ડેટાને લગતા કોઈ રિપોર્ટ પર કામ કરી રહ્યા હોવ, તો 'Dot' નવી માહિતી આવતાની સાથે જ તેના પર નજર રાખી શકે છે, તેના વિશ્લેષણને અપડેટ કરી શકે છે અને જ્યારે તમારા ઇનપુટની જરૂર હોય ત્યારે તમને જાણ કરી શકે છે. તેવી જ રીતે, જો તેને કોઈ કાર્ય સોંપવામાં આવે, તો તે સ્વતંત્ર રીતે વિવિધ સોર્સને કોન્ટેક્ટ કરી શકે છે.

આ કન્ટેન્ટ ક્રિએટર્સ માટે પણ રસપ્રદ સાબિત થઈ શકે છે. OpenAI દ્વારા આપવામાં આવેલા એક ઉદાહરણ મુજબ, 'dot' કોઈ ક્રિએટરના ઇન્ટરવ્યુના ટ્રાન્સક્રિપ્ટમાંથી મુખ્ય અંશો તારવીને 'શો નોટ્સ' અને સોશિયલ મીડિયા પોસ્ટ્સનો મુસદ્દો તૈયાર કરી શકે છે. એકવાર વપરાશકર્તા તેમાં સુધારા-વધારા કરે, પછી તે તે પસંદગીઓને ભવિષ્યના કાર્યોમાં પણ ધ્યાનમાં લઈ શકે છે.

4,000 થી વધારે એપ્સથી જોડવાની ક્ષમતા

OpenAI એ આ ક્ષમતાઓને માત્ર ChatGPT પૂરતી જ સીમિત રાખી નથી; કંપનીના જણાવ્યા અનુસાર, તે 4,000થી વધુ એપ્લિકેશન્સ સાથેના જોડાણના સમર્થન સાથે અન્ય સંલગ્ન એપ્લિકેશન્સમાં પણ કામ કરી શકે છે. ChatGPT ઉપરાંત, તેનો ઉપયોગ Slack અને Microsoft Teams જેવા પ્લેટફોર્મ્સ પર પણ થઈ શકે છે. ભવિષ્યમાં ટેક્સ્ટ મેસેજિંગનો વિકલ્પ રજૂ કરવામાં આવશે તેનો પણ ઉલ્લેખ કરવામાં આવ્યો છે.

આનો અર્થ એ છે કે AI વિવિધ એપ્લિકેશન્સમાં વહેંચાયેલા કાર્યોને એકત્રિત કરવામાં અને તેને આગળ વધારવામાં ભૂમિકા ભજવી શકે છે. અહીં જ 'Dots'નો પ્રભાવ માત્ર AI ચેટ પૂરતો સીમિત ન રહેતા ઈમેલ, મીટિંગ્સ, રિસર્ચ, દસ્તાવેજો, કોડિંગ અને ટીમ સહયોગ જેવા ક્ષેત્રો સુધી વિસ્તરે છે.

અહીં એક મહત્વની બાબત નોંધવા જેવી છે: 'Dots' ને સંપૂર્ણપણે મુક્ત છૂટ આપવામાં આવતી નથી. યૂઝર્સ નક્કી કરે છે કે કઈ એપ્લિકેશન્સનો ઉપયોગ 'dot' કરી શકે છે અને તેને કઈ હદ સુધીની પરવાનગીઓ આપવામાં આવે છે. અમુક ચોક્કસ ક્રિયાઓ માટે યૂઝર્સની મંજૂરી ફરજિયાત બનાવી શકાય છે; OpenAI ના જણાવ્યા અનુસાર, સંવેદનશીલ કાર્યો જેમ કે પાસવર્ડ બદલવા યૂઝર્સ ના નિયંત્રણ હેઠળ જ રહે છે.

OpenAI એ Custom Rules નો વિકલ્પ પણ રજૂ કર્યો છે. આ સુવિધા વપરાશકર્તાઓને એ નક્કી કરવાની મંજૂરી આપે છે કે AI કયા કાર્યો સ્વતંત્ર રીતે કરી શકે, કયા કાર્યો માટે મંજૂરીની જરૂર પડે અને કયા કાર્યો તેણે બિલકુલ ન કરવા જોઈએ. આ બાબત અત્યંત મહત્વપૂર્ણ છે, કારણ કે AI ને તમારા ઈમેઈલ, ફાઈલો અને અન્ય એપ્લિકેશન્સની ઍક્સેસ આપવી એ માત્ર સુવિધાનો વિષય નથી; તેમાં સુરક્ષા અને પ્રાઇવસીના મુદ્દાઓ પણ જોડાયેલ છે.

OpenAI ની ટક્કર Metaના Muse થી

Dots એવા સમયે લોન્ચ કરવામાં આવ્યું છે જ્યારે Meta પણ તેના AI એજન્ટ Muse ને આગળ વધારી રહ્યું છે. Meta એ સપ્ટેમ્બરમાં Muse રજૂ કર્યું હતું; તે યૂઝર્સવતી કાર્યો કરી શકે છે, લાંબા ગાળા સુધી કોઈ લક્ષ્યને હાંસલ કરવા માટે કામ કરી શકે છે અને જરૂર પડે ત્યારે મંજૂરી પણ માંગી શકે છે. તેથી, OpenAI અને Meta વચ્ચેની સ્પર્ધા હવે માત્ર એ બાબત પૂરતી સીમિત નથી કે કઈ કંપનીનું AI વધુ સારા જવાબો આપે છે. હવે પછીની લડાઈ એ વાત પર છે કે કોનું AI તમારા માટે વધુ કાર્યો સ્વતંત્ર રીતે કરી શકે છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ