રાજકોટ / લગ્નના બે વર્ષમાં જ પરણિતાએ પડતું મૂક્યું, સસરા ભાજપમાં હોવાથી રાજકોટ પોલીસે ફરિયાદ ના નોંધી? સવાલો ઉઠ્યા

રાજકોટમાં લગ્નના બે વર્ષ બાદ એક પરિણીતાએ ગળેફાંસો ખાઈ આપઘાત કર્યો હોવાની ઘટના સામે આવી છે. મૃતક શ્વેતા વાઢેરના પરિવારજનોનો આક્ષેપ છે કે લગ્ન બાદ તેને શારીરિક અને માનસિક ત્રાસ આપવામાં આવતો હતો. પરિવારનો વધુમાં આક્ષેપ છે કે આપઘાતની ઘટનાને 8 મહિના જેટલો સમય વીતી ગયો હોવા છતાં પોલીસે હજુ સુધી ફરિયાદ નોંધી નથી.

મળતી માહિતી મુજબ, શ્વેતા વાઢેરના લગ્ન 28 નવેમ્બર 2023ના રોજ ઓખા ખાતે રહેતા ભગીરથ બારાઈ સાથે રીત-રિવાજ મુજબ થયા હતા. લગ્ન બાદ શ્વેતાને સાસરી પક્ષ તરફથી શારીરિક અને માનસિક ત્રાસ આપવામાં આવતો હોવાના પરિવારજનો દ્વારા આક્ષેપ કરવામાં આવ્યા છે.

11 જાન્યુઆરી 2026ના રોજ શ્વેતાએ ગળેફાંસો ખાઈ આપઘાત કર્યો હતો. પુત્રીના મોત બાદ પરિવારજનો દ્વારા સમગ્ર મામલે પોલીસ સમક્ષ રજૂઆત કરવામાં આવી હોવા છતાં હજુ સુધી પોલીસ ફરિયાદ નોંધાઈ ન હોવાનો પરિવારનો દાવો છે.

ઘટનાને આશરે 8 મહિના વીતી ગયા બાદ પણ ફરિયાદ ન નોંધાતા મૃતકના પરિવારજનો હવે મીડિયા સમક્ષ આવ્યા છે. પરિવારજનો દ્વારા સમગ્ર મામલે યોગ્ય તપાસ કરી જવાબદાર સામે કાર્યવાહી કરવાની માંગ કરવામાં આવી છે.

ફરિયાદ નોંધવામાં વિલંબને લઈને ભક્તિનગર પોલીસની કામગીરી સામે પણ સવાલો ઉઠી રહ્યા છે. બીજી તરફ, મૃતક પરિણીતાના સસરા દ્વારકા પૂર્વ જિલ્લા ભાજપના ઉપપ્રમુખ હોવાની માહિતી પણ સામે આવી છે.

આ પણ વાંચોઃ ચોમાસાની વિદાય વચ્ચે હવામાનમાં મોટો ફેરફાર, 2 ઓક્ટોબર સુધી અનેક વિસ્તારોમાં ગાજવીજ સાથે વરસાદ

હાલ સમગ્ર મામલે પરિવારજનોના આક્ષેપો અને પોલીસ દ્વારા કરવામાં આવેલી કાર્યવાહી અંગે સત્તાવાર વિગતો સામે આવવાની બાકી છે. પોલીસ ફરિયાદ નોંધાઈ છે કે નહીં તથા તપાસમાં અત્યાર સુધી શું કાર્યવાહી કરવામાં આવી છે તે અંગે પોલીસનું સત્તાવાર નિવેદન મહત્વનું રહેશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ