NRI / ₹2 કરોડની ઓફર સામે $160Kની નોકરી પસંદ કરી! વ્યક્તિએ કહ્યું- “મારે 5 વાગ્યા પછી કામ નથી કરવું”

India vs USA Salary : નોકરી પસંદ કરતી વખતે મોટાભાગના લોકો માટે સૌથી મહત્વનો મુદ્દો સેલેરી હોય છે. પરંતુ એક વ્યક્તિએ આ પરંપરાગત વિચારથી અલગ નિર્ણય લીધો છે. ભારતમાં લગભગ ₹2 કરોડના પેકેજની તક હોવા છતાં તેણે અમેરિકામાં મળતી $160,000ની નોકરી સ્વીકારવાનું પસંદ કર્યું. બંને દેશોમાં સેલેરી અને જીવન ખર્ચ વચ્ચે મોટો તફાવત હોવા છતાં તેના નિર્ણય પાછળ પૈસા નહીં, પરંતુ વર્ક-લાઇફ બેલેન્સ અને વ્યક્તિગત સમય મુખ્ય કારણ બન્યા.

દુબઈ સ્થિત AI લીડર CJ Teja Sai દ્વારા LinkedIn પર શેર કરવામાં આવેલી આ વાતચીતે સોશિયલ મીડિયા પર ચર્ચા જગાવી છે. તેમના જણાવ્યા મુજબ, તેમના અમેરિકામાં રહેતા એક મિત્ર સામે ભારત અને અમેરિકાની બે નોકરીની તકો હતી. ભારતમાં મળતી ઓફર આર્થિક રીતે ઘણી મોટી હતી, પરંતુ તેણે અમેરિકામાં રહેવાનું પસંદ કર્યું.

આ નિર્ણય અંગે તેનું કહેવું હતું કે અમેરિકામાં કામ પૂર્ણ થયા બાદ તે સાંજે લગભગ 5 વાગ્યે પોતાનું કામ બંધ કરી શકે છે. બીજી તરફ ભારતમાં કામ કરતી વખતે US ટીમો સાથેના સમયના તફાવતને કારણે ઓફિસના સમયની બહાર પણ સતત ઉપલબ્ધ રહેવાની અપેક્ષા રહેતી હોવાની તેની ચિંતા હતી. ખાસ વાત એ છે કે અમેરિકામાં રહેવા માટે વિઝા સંબંધિત અનિશ્ચિતતા હોવા છતાં તેણે આ નિર્ણય લીધો. તેના માટે નોકરીમાંથી મળતી નિશ્ચિત છૂટ અને પોતાના જીવન માટેનો સમય વધુ મહત્વનો હતો.

આ વાત સમજાવવા માટે એક અન્ય ઘટના પણ શેર કરવામાં આવી હતી. ભારતમાં એક એન્જિનિયરિંગ મેનેજર અમેરિકાની ટીમો સાથે કામ કરતો હતો. એક વખત રાત્રે 3 વાગ્યે US ટીમ સાથે મીટિંગ રાખવામાં આવી હતી. શરૂઆતમાં આ મીટિંગ માત્ર 15 મિનિટની હોવાનું કહેવામાં આવ્યું હતું, પરંતુ વાતચીત એટલી લાંબી ચાલી કે તે સવારે લગભગ 6 વાગ્યે પૂરી થઈ. આવી ઘટનાઓ વારંવાર બનતી હોવાથી અંતે મેનેજરે નોકરી છોડવાનો નિર્ણય લીધો હતો.

આ ઘટનાએ એક મહત્વનો સવાલ ઉભો કર્યો છે-શું નોકરીનું મૂલ્યાંકન માત્ર પગાર અને ટેક્સના આધારે થવું જોઈએ?

સામાન્ય રીતે બે દેશોની નોકરીની સરખામણી કરતી વખતે લોકો સેલેરી, ટેક્સ, બચત અને જીવન ખર્ચની ગણતરી કરે છે. પરંતુ આ કિસ્સો એ તરફ ધ્યાન દોરે છે કે નોકરીમાં મળતો વ્યક્તિગત સમય, કામની મર્યાદા અને ઓફિસ પછી ખરેખર ડિસ્કનેક્ટ થઈ શકવાની ક્ષમતા પણ એટલી જ મહત્વની છે.

આ પણ વાંચો : અમેરિકામાં ગ્રીન કાર્ડની રાહ જોતા ભારતીય કામદારો માટે મહત્વના સમાચાર

જોકે આ પોસ્ટ બાદ સોશિયલ મીડિયા પર લોકોના અલગ-અલગ અભિપ્રાયો સામે આવ્યા. કેટલાક લોકોએ કહ્યું કે અમેરિકામાં પણ વર્ક-લાઇફ બેલેન્સ દરેક નોકરીમાં સારું હોય એવું જરૂરી નથી. ખાસ કરીને જો કંપનીનું મેનેજમેન્ટ અથવા બોસ ભારતીય વર્ક કલ્ચર મુજબ કામ કરાવતા હોય તો પરિસ્થિતિ અલગ હોઈ શકે છે. કેટલાક લોકોએ એ પણ દલીલ કરી કે ભારતમાં ઘરકામ, રસોઈ, સફાઈ અને અન્ય ઘણી સેવાઓ સરળતાથી ઉપલબ્ધ હોવાથી વ્યક્તિનો સમય બચી શકે છે. જ્યારે અમેરિકામાં આમાંથી ઘણાં કામ જાતે કરવા પડે છે. બીજી તરફ, કેટલાક લોકોએ અમેરિકાની પસંદગીનું સમર્થન કર્યું અને કહ્યું કે વધુ પગાર હંમેશા વધુ સારી જિંદગીની ગેરંટી આપતો નથી. વ્યક્તિને પોતાની પસંદગી મુજબ સમય, કામની મર્યાદા અને લાંબા ગાળાની કારકિર્દીની તકો મળે તે પણ મહત્વનું છે.

આ સમગ્ર ચર્ચાનો સાર એટલો જ છે કે કંપનીમાંથી મળતી કમાણી ઉપરાંત નોકરી વ્યક્તિને કેટલું સ્વતંત્ર જીવન આપે છે, તે પણ 'કમ્પેન્સેશન'નો એક ભાગ છે. દરેક વ્યક્તિ માટે પ્રાથમિકતાઓ અલગ હોઈ શકે છે, પરંતુ આ કિસ્સાએ સેલેરી સામે સમય અને જીવનની ગુણવત્તાની ચર્ચાને ફરી એકવાર કેન્દ્રમાં લાવી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ