કેનેડાના ટોરન્ટોમાં 13 જાન્યુઆરીના રોજ કચડાયેલી હાલતમાં મળી આવેલ હીરલ પટેલની લાશ બાદ ગઇ કાલે તેના પૂર્વ પતિ રાકેશ પટેલની લાશ એટોબિકોકમાં હોસ્પિટલ પાસેથી મળી આવતાં ચકચાર મચી છે. હીરલની હત્યા તેના પૂર્વ પતિએ કરી હોવાની શંકા વ્યક્ત કરવામાં આવી રહી હતી.
બોરસતના પામેલા ગામની યુવતીની થઈ હતી હત્યા
પૂર્વ પતિએ જ હત્યા કરી હોવાની શંકા સેવાઈ હતી
પોલીસ શોધખોળ કરી રહી હતી પરંતુ તેના પતિની લાશ મળી આવી
બોરસદના પામોલ ગામમાં રહેતી હીરલ પટેલનાં લગ્ન 7 વર્ષ પૂર્વે વર્ષ 2013માં મૂળ કિંખલોડના અને કેનેડા સ્થાયી થયેલા એનઆરઆઈ રાકેશ મહેન્દ્રભાઈ પટેલ સાથે થયાં હતાં. લગ્ન પછી કેનેડા પહોંચેલી હીરલે મેડિકલ ક્ષેત્રમાં જોબ શરૂ કરી હતી. લગ્નના થોડા સમય બાદ સાસરિયાંએ હીરલ પર ત્રાસ ગુજારવાનું શરૂ કર્યું હતું. આથી કંટાળીને તે ભાઈના ઘરે રહેવા જતી રહી હતી. દરમિયાન બે માસ પૂર્વે તેણે છૂટાછેડા લીધા હતા.
હિરલ નોકરી ગઈ એ બાદ તેની લાશ મળી હતી
11 જાન્યુઆરીએ નોકરીએ ગયેલી હીરલ પરત ન ફરતાં તેના ભાઈએ ટોરન્ટો પોલીસને જાણ કરી હતી. પોલીસે શોધખોળ શરૂ કરતાં ગુમશુદા હીરલનો મૃતદેહ ખાડી વિસ્તારમાંથી મળી આવ્યો હતો. હીરલનો મૃતદેહ અકસ્માતગ્રસ્ત કારમાં કચડાઈ ગયેલી હાલતમાં હતો, જે સંદર્ભે ટોરન્ટો પોલીસે તપાસ હાથ ધરી છે. હીરલના મોત બાદ તેના પૂર્વ પતિ રાકેશને વોન્ટેડ જાહેર કરવામાં આવ્યો હતો.