ફાયદો / લર્નિંગ લાઈસન્સ માટે હવે RTOના ધક્કા બંધ થઈ જશે, અહીંથી જ મળી જશે

• આરટીઓમાં લર્નિંગ ડ્રાઇવિંગ લાઇસન્સ કઢાવવું હવે ભૂતકાળ બની જશે
• જો લર્નિંગ ડ્રાઇવિંગ લાઇસન્સ લેવું હશે તો સાથે સાથે ફરજિયાત પાકા લાઇસન્સની ફી પણ ભરી દેવી પડશે
• કોઈપણ વાહન માલિક કે વાહનચાલકને રૂ.1050 એક મહિનો પહેલાં આપી દેવા પડશે

કાચું ડ્રાઇવિંગ લાઇસન્સ ઇશ્યુ કરવાની કામગીરી હવે સંપૂર્ણપણે બંધ કરી દેવામાં આવી છે

આરટીઓમાં લર્નિંગ ડ્રાઇવિંગ લાઇસન્સ કઢાવવું હવે ભૂતકાળ બની જશે. કેમકે, આરટીઓ કચેરીમાંથી કાચું ડ્રાઇવિંગ લાઇસન્સ ઇશ્યુ કરવાની કામગીરી હવે સંપૂર્ણપણે બંધ કરી દેવામાં આવી છે. તેના માટે આરટીઓના સોફ્ટવેરમાં ફેરફાર પણ કરી દેવામાં આવ્યો છે. જેના કારણે હવે આરટીઓમાંથી લર્નિંગ લાઇસન્સની  એપોન્ટમેન્ટ નહીં મળે. તાત્કાલિક ધોરણે આ બદલાવ કરવા માટે સારથી સોફ્ટવેરમાં આરટીઓનો લર્નિંગ લાઇસન્સનો સ્લોટ કાઢી નાખવામાં આવ્યો છે.

વાહનચાલકે એન્ડોર્સમેન્ટ પ્રક્રિયા પૂરી કરવી પડશે

એક અઠવાડિયાં સુધી આરટીઓમાં લર્નિંગ લાઈસન્સની કામગીરી ચાલુ રખાઈ હતી. જે હવે આજથી બંધ કરાઈ છે . આ માટે આઈટીઆઈને પ્રતિ લર્નિંગ લાઇસન્સ ૧૦૦ રૂપિયાનું વળતર અપાય છે. જેમાંથી આઈટીઆઈને ઇન્સ્ટ્રક્ટરનો પગાર ચૂકવવાનો રહેશે. નવા નિયમ અનુસાર આરટીઓ દ્વારા હવે પછી કોઈપણ વાહનચાલકને જો લર્નિંગ ડ્રાઇવિંગ લાઇસન્સ લેવું હશે તો સાથે સાથે ફરજિયાત પાકા લાઇસન્સની ફી પણ ભરી દેવી પડશે. તેના માટે વાહનચાલકે એન્ડોર્સમેન્ટ પ્રક્રિયા પૂરી કરવી પડશે. 

હવે ફરજિયાત રૂ.1050 પણ ભરી દેવા પડશે

અત્યાર સુધી લર્નિંગ લાઇસન્સ માટે માત્ર રૂ.150 ભરવાના થતા હતા, તેની સાથે હવે ફરજિયાત રૂ.1050 પણ ભરી દેવા પડશે. આ નિયમના કારણે હવે પછી લાઈસન્સ કઢાવવા માટે કોઈપણ વાહન માલિક કે વાહનચાલકને રૂ.1050 એક મહિનો પહેલાં આપી દેવા પડશે. જો કોઈ પણ વ્યક્તિ પાસે ટુ વ્હીલરનું લાઇસન્સ હશે અને તેને રિક્ષા અથવા તો ફોર વ્હીલરનું લાઈસન્સ કઢાવવું હશે તો જે તે વાહનચાલક કે વાહનમાલિકને આ અંગે લાઈસન્સમાં ઉમેરો કરી અને ટેસ્ટ આપવો પડશે.