કાર્યવાહી / દરોડાનો દૌર યથાવત: ટેરર ફંડિંગ વિરૂદ્ધ NIAનું એક્શન, જમ્મુ કાશ્મીરના બે જિલ્લામાં એકસાથે 6 સ્થળોએ રેડ પાડતા દોડધામ

• જમ્મુ કાશ્મીરમાં નેશનલ ઇન્વેસ્ટિગેશન એજન્સીની મોટી કાર્યવાહી
• દક્ષિણ કાશ્મીરના શોપિયાં અને પુલવામામાં NIAએ અનેક સ્થળોએ સર્ચ હાથ ધર્યું 
• અગાઉ પણ NIAએ આતંકવાદી ષડયંત્રના સંદર્ભમાં ઘણી જગ્યાએ પાડ્યા હતા દરોડા 

જમ્મુ કાશ્મીરમાં નેશનલ ઇન્વેસ્ટિગેશન એજન્સીની મોટી કાર્યવાહી સામે આવી છે. વાત જાણે એમ છે કે, દક્ષિણ કાશ્મીરના શોપિયાં અને પુલવામામાં નેશનલ ઇન્વેસ્ટિગેશન એજન્સી (NIA) એ ટેરર ​​ફંડિંગના સંબંધમાં અનેક સ્થળોએ સર્ચ હાથ ધર્યું છે. આ પહેલા પણ NIAએ જમ્મુ-કાશ્મીરમાં આતંકવાદી ષડયંત્રના સંદર્ભમાં ઘણી જગ્યાએ દરોડા પાડ્યા હતા.
 
થોડા દિવસો પહેલા NIAએ શ્રીનગરના કુરસુ રાજબાગમાં ત્રણ અસલી ભાઈઓ મોહમ્મદ અયુબ પખ્તૂન, તારિક અહેમદ અને સફીનના ઘરોની તપાસ કરી હતી. ઝાકુરામાં મુશ્તાક અહમદ પિંજુના ઘરની તલાશી લેવામાં આવી હતી. બડગામ જિલ્લાના યુદ્ધ સંગમ વિસ્તારમાં સજ્જાદ અહેમદ ખાનના ઘરની તલાશી લીધા બાદ NIAએ તેને પૂછપરછ માટે કસ્ટડીમાં પણ લીધો હતો. આ સાથે જ બડગામના જ મીર મોહલ્લા નસરુલ્લાપોરામાં ફયાઝ અહમદ રાથેરના ઘરની તલાશી લેવામાં આવી હતી. 

Jammu and Kashmir | NIA raids underway in Pulwama. pic.twitter.com/rRxyKO7KnR

— ANI (@ANI) May 15, 2023

અગાઉ પણ કરાયું હતું સર્ચ 
દક્ષિણ કાશ્મીરના રામપોરા કુલગામમાં રઉફ અહેમદના ઘર અને સાંગાસમાં શાહનવાઝ હજામના ઘર પર સર્ચ કરવામાં આવ્યું હતું. શોપિયાં જિલ્લાના ખુરામપોરા ખાતે શૌકત અહેમદ ગનાઈ, કિલોરા મલિકગુંડ ખાતે મુદસ્સર રહેમાન અને ચાનપોરા ખાતે કરિયાણાના વેપારી ફૈયાઝ અહેમદ બાબાના ઘર અને દુકાન પર સર્ચ કરવામાં આવ્યું હતું.