નેશનલ / 'મારો સતત પ્રયાસ રહ્યો છે કે હું સેવા કરું પરંતુ TMC...', બંગાળથી PMના પ્રહાર

West Bengal: પ્રધાનમંત્રી નરેન્દ્ર મોદી રવિવારે હુગલી પહોંચ્યા અને સિંગુરમાં અનેક વિકાસ પ્રોજેક્ટ્સનું ઉદ્ઘાટન, શિલાન્યાસ અને લોકાર્પણ કર્યું હતું. જાહેર સભાને સંબોધતા તેમણે જણાવ્યું કે વિકસિત ભારત માટે પૂર્વી ભારતનો વિકાસ જરૂરી છે, અને કેન્દ્ર સરકાર આ દિશામાં કામ કરી રહી છે. વંદે ભારત સ્લીપર ટ્રેન અને નવી અમૃત ભારત એક્સપ્રેસ ટ્રેનોની શરૂઆતનો ઉલ્લેખ કરતા પ્રધાનમંત્રીએ કાશી અને બંગાળ વચ્ચે સારી કનેક્ટિવિટીની વાત કરી હતી.

પ્રધાનમંત્રી નરેન્દ્ર મોદી રવિવારે બપોરે પશ્ચિમ બંગાળના હુગલી જિલ્લામાં પહોંચ્યા. તેમણે સિંગુરમાં અનેક મુખ્ય વિકાસ પ્રોજેક્ટ્સનું ઉદ્ઘાટન, શિલાન્યાસ અને લોકાર્પણ કર્યા. આ પ્રસંગે પ્રધાનમંત્રી મોદીએ બે અલગ અલગ જાહેર સભાઓને પણ સંબોધિત કરી. તેમણે જણાવ્યું કે વિકસિત ભારતના લક્ષ્યને પ્રાપ્ત કરવા માટે પૂર્વી ભારતનો વિકાસ મહત્વપૂર્ણ છે, અને કેન્દ્ર સરકાર આ લક્ષ્ય તરફ સતત કામ કરી રહી છે. મમતા બેનર્જી સરકાર પર નિશાન સાધતા પીએમ મોદીએ કહ્યું કે ટીએમસી બંગાળના લોકો પ્રત્યે દુશ્મની નિકાળી રહી છે અને કેન્દ્ર સરકારની યોજનાઓ તેમના સુધી પહોંચતી અટકાવી રહી છે.

પ્રધાનમંત્રીએ કહ્યુ કે દેશની પ્રથમ વંદે ભારત સ્લીપર ટ્રેનની ગઈકાલે પશ્ચિમ બંગાળથી શરૂઆત કરવામાં આવી છે. આ સાથે બંગાળને લગભગ અડધો ડઝન નવી અમૃત ભારત એક્સપ્રેસ ટ્રેનો પણ મળી છે. આજે વધુ ત્રણ અમૃત ભારત એક્સપ્રેસ ટ્રેનોને લીલી ઝંડી આપવામાં આવી છે. આ ટ્રેનોમાંથી એક મારા સંસદીય મતવિસ્તાર કાશી (વારાણસી) અને બંગાળ વચ્ચે કનેક્ટિવિટીને વધુ મજબૂત કરશે.

'ટીએમસી બંગાળના લોકોથી દુશ્મનાવટ નિકાળી રહી છે'

પીએમ મોદીએ કહ્યું, "બંગાળના યુવાનો, ખેડૂતો, માતાઓ અને બહેનોની દરેક શક્ય રીતે સેવા કરવાનો મારો સતત પ્રયાસ છે. પરંતુ અહીંની ટીએમસી સરકાર કેન્દ્ર સરકારની યોજનાઓને તમારા સુધી યોગ્ય રીતે પહોંચવા દેતી નથી. ટીએમસી બંગાળના લોકો સાથે તેની દુશ્મનાવટ નિકાળી રહી છે." ટીએમસી અહીંના યુવાનો, માતાઓ, બહેનો અને ખેડૂતોની દુશ્મન બની બેઠી છે.

તેમણે કહ્યું, "ભાજપ સરકારે દિલ્હીમાં ઇન્ડિયા ગેટની સામે કર્તવ્ય પથ પર નેતાજી સુભાષ બાબુની પ્રતિમા સ્થાપિત કરી. પહેલી વાર લાલ કિલ્લા પરથી આઝાદ હિંદ ફોજના યોગદાનને નમન કરવામાં આવ્યું. આંદામાન અને નિકોબારમાં એક ટાપુનું નામ નેતાજીના નામ પર રાખવામાં આવ્યું હતું. અગાઉ 26 જાન્યુઆરીની ઉજવણી 24 કે 25 તારીખે શરૂ થતી હતી અને 30 તારીખે સમાપ્ત થતી હતી. અમે આ કાર્યક્રમમાં ફેરફાર કર્યો છે. હવે અમે 23 જાન્યુઆરી, સુભાષ બાબુની જન્મજયંતિથી શરૂ કરીએ છીએ અને મહાત્મા ગાંધીની પુણ્યતિથિ પર સમાપ્ત કરીએ છીએ."

આ પણ વાંચોઃ સ્ટ્રાઇક રેટ 64 %, બેઠક 1425, જુઓ ભાજપ સામે કઇ રીતે પરાસ્ત થયું મહાવિકાસ અઘાડી?

"અમે બિહાર અને પશ્ચિમ બંગાળમાં જંગલ રાજ રોકીશું"

પીએમ મોદીએ કહ્યું, "ભાજપ સરકાર બનતાની સાથે જ પ્લાસ્ટિક માટે એક નક્કર નીતિ ઘડવામાં આવશે અને શણ પેકેજિંગને વધુ પ્રોત્સાહન આપવામાં આવશે, જે અહીં શણના વેપારને વધુ મજબૂત બનાવશે." તેમણે કહ્યું કે હુગલીમાં અન્ય શાકભાજીની સાથે બટાકા અને ડુંગળીની મોટી માત્રામાં ખેતી થાય છે. વૈશ્વિક સ્તરે તાજા શાકભાજીની માંગ ખૂબ છે. વધુમાં પેકેજ્ડ શાકભાજી માટે વિશ્વ એક વિશાળ બજાર છે. મારું સ્વપ્ન છે કે ભારતના ખેડૂતો, ભારતીય પશુપાલકો અને ભારતીય માછીમારો વૈશ્વિક બજારોમાં ધૂમ મચાવે.

તેમણે કહ્યું, "દરેક વ્યક્તિ એક જ આશા સાથે એકઠા થયા છે આપણને અસલી પરિવર્તનની જરૂર છે. દરેક વ્યક્તિ 15 વર્ષ જૂના જંગલ રાજને બદલવા માંગે છે. ભાજપ-એનડીએએ બિહારમાં જંગલ રાજના શાસનને હમણાં જ ફરી રોકી દીધું છે અને હવે પશ્ચિમ બંગાળમાં પણ ટીએમસીના મહા જંગલ રાજને બદલવા માટે તૈયાર છે."

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ