ક્રિકેટ / ટીમ ઈન્ડિયાના હેડ કોચ પદેથી BCCI ગૌતમ ગંભીરને નહીં હટાવે! સામે આવ્યા 2 મોટા કારણ

ભારતીય ક્રિકેટ ટીમના મુખ્ય કોચ તરીકે ગૌતમ ગંભીરના સ્થાન અંગે સતત સવાલો ઉઠાવવામાં આવી રહ્યા છે. ટેસ્ટ ક્રિકેટમાં ટીમના નબળા પ્રદર્શન બાદ, 'વ્હાઇટ-બોલ' સીરિઝમાં મળેલી તાજેતરની હારને કારણે તેમના પરનું દબાણ વધુ વધી ગયું છે. જોકે, હાલમાં તેમના માટે એક રાહતજનક સમાચાર છે; અહેવાલો અનુસાર, BCCI ગંભીરને હટાવવાના મૂડમાં નથી.

ગંભીરની ખુરશી સુરક્ષિત

ગંભીરે કોચ તરીકેની જવાબદારી સંભાળી ત્યારથી ભારતીય ટીમનું પ્રદર્શનમાં ઉતાર-ચઢાવ રહ્યો છે. ખાસ કરીને ટેસ્ટ ક્રિકેટમાં ન્યૂઝીલેન્ડ અને દક્ષિણ આફ્રિકા સામે ઘરઆંગણે રમાયેલી સીરિઝમાં મળેલી હાર ખૂબ જ નિરાશાજનક હતી. હવે, આયર્લેન્ડ અને ઈંગ્લેન્ડ સામેની T20 સીરિઝમાં નબળા પરિણામો બાદ, વ્હાઇટ-બોલ ક્રિકેટમાં તેમની ભૂમિકા અંગે પણ સવાલો ઉઠી રહ્યા છે. આમ છતાં, અહેવાલો સૂચવે છે કે BCCIએ હજુ સુધી ગંભીરને હટાવવાનો નિર્ણય લીધો નથી. આ વલણ પાછળ બે મુખ્ય કારણો જણાવવામાં આવી રહ્યા છે.

પહેલુ કારણ-ટેસ્ટ ટીમમાં બદલાવનો સમય

ભારતીય ટેસ્ટ ક્રિકેટ હાલમાં એક મોટા પરિવર્તનના તબક્કામાંથી પસાર થઈ રહ્યું છે. વિરાટ કોહલી, રોહિત શર્મા અને રવિચંદ્રન અશ્વિન જેવા અનુભવી ખેલાડીઓના આ ફોર્મેટમાંથી નિવૃત્ત થયા બાદ ટીમનું સમગ્ર માળખું બદલાઈ ગયું છે. હવે શુભમન ગિલના નેતૃત્વમાં એક નવી ટેસ્ટ ટીમ તૈયાર કરવામાં આવી રહી છે. આ પરિસ્થિતિને ધ્યાનમાં રાખીને, BCCIનું માનવું છે કે, પરિવર્તનના આ તબક્કા દરમિયાન મળેલા નબળા પરિણામો માટે માત્ર કોચની નિષ્ફળતાને જવાબદાર ઠેરવવી અયોગ્ય ગણાશે. આંતરરાષ્ટ્રીય ટેસ્ટ ક્રિકેટમાં પોતાની ક્ષમતા સાબિત કરવાની તક ઘણા નવા ખેલાડીઓને મળી રહી છે અને તેમને સ્થિર થવા માટે સમયની જરૂર છે.

બીજુ કારણ- ખેલાડીઓ ઇજાગ્રસ્ત થવા પર વધી મુશ્કેલી

ગંભીર માટે બીજી મોટી રાહતની બાબત ખેલાડીઓની ઈજાઓ સાથે જોડવામાં આવે છે. રિપોર્ટ અનુસાર, BCCI પણ સ્વીકારે છે કે અમુક મુખ્ય ખેલાડીઓની ગેરહાજરીની અસર ટીમની કામગીરી પર પડી છે. દક્ષિણ આફ્રિકા સામેની ઘરઆંગણે રમાયેલી ટેસ્ટ સીરિઝ દરમિયાન શુભમન ગિલને થયેલી ઈજાને પણ આ સંદર્ભમાં જોવામાં આવી રહી છે. માનવામાં આવે છે કે, જો ગિલ સમગ્ર સીરિઝ માટે ઉપલબ્ધ રહેતો તો મેચોનાં પરિણામો કદાચ અલગ હોત. શ્રીલંકાના પ્રવાસ પહેલાં પણ ભારતની મુશ્કેલીઓ ઓછી થઈ નથી. જસપ્રીત બુમરાહ, સાઈ સુદર્શન અને વોશિંગ્ટન સુંદર જેવા મુખ્ય ખેલાડીઓ ઈજા કે અન્ય કારણોસર ટીમની બહાર છે.

VVS લક્ષ્મણની ભૂમિકા પણ બનેલી છે

રિપોર્ટમાં પણ દાવો કરવામાં આવ્યો છે કે, VVS લક્ષ્મણ BCCIના 'સેન્ટર ઓફ એક્સેલન્સ'માં 'હેડ ઓફ ક્રિકેટ' તરીકેની પોતાની ભૂમિકામાં સહજ છે. પરિણામે, હાલમાં ટેસ્ટ ટીમ માટે વચગાળાના કોચની નિમણૂક કરવાની શક્યતા નહિવત માનવામાં આવે છે. આનું બીજું એક કારણ એ છે કે શ્રીલંકાના પ્રવાસ બાદ, WTC 2025-27 સાયકલમાં ભારત માટે માત્ર બે જ ટેસ્ટ સીરિઝ બાકી રહેશે. આ સંજોગોમાં, ટેસ્ટ કોચને અધવચ્ચે બદલવાનો નિર્ણય BCCI માટે ખાસ વ્યવહારિક માનવામાં આવતો નથી.

આ પણ વાંચોઃ શ્રીલંકાને બેવડો ફટકો, ભારત સામેની ટેસ્ટ શ્રેણી પહેલા બે ખેલાડી ઘાયલ

2027 વન ડે વર્લ્ડ કપ સુધી રહેશે ગંભીર?

હાલમાં, વ્હાઇટ-બોલ ક્રિકેટમાં પણ ગંભીરના સ્થાન પર કોઈ મોટું જોખમ જણાતું નથી. રિપોર્ટ અનુસાર કે, તેમને ઓછામાં ઓછા 2027ના વન-ડે વર્લ્ડ કપ સુધી ભારતીય ટીમ સાથે જાળવી રાખવાની યોજના છે. બીજા શબ્દોમાં કહીએ તો, ગંભીર અંગે BCCIનું વલણ હાલ પૂરતું સ્પષ્ટ છે. નબળા પરિણામો હોવા છતાં, બોર્ડ તાત્કાલિક કોઈ કઠોર પગલાં લેવાને બદલે નવી ખેલાડીઓથી બનેલી ટીમને સ્થિર થવા માટે સમય આપવાની તરફેણમાં છે. જોકે, આગામી ટેસ્ટ સીરિઝ અને ખાસ કરીને WTC અભિયાનમાં ટીમનું પ્રદર્શન ગંભીરના ભવિષ્ય માટે નિર્ણાયક સાબિત થઈ શકે છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ