ભાવનગર / "આપવાના છે? હા અગર ના", ભાવનગરના PSI પરમારે ખાખીને લજવી

ગુજરાતમાં દારૂબંધીના કડક અમલના દાવાઓ વચ્ચે ભાવનગરમાંથી સામે આવેલા એક કથિત વાયરલ ઓડિયોએ પોલીસ તંત્રની કામગીરી સામે સવાલો ઊભા કર્યા છે. વાયરલ થઈ રહેલી ઓડિયો ક્લિપમાં એક વ્યક્તિ પોતાને પોલીસ અધિકારી તરીકે રજૂ કરતી હોવાનું અને બુટલેગર પાસેથી કથિત રીતે હપ્તાની માંગણી અંગે વાતચીત થતી હોવાનું જણાવાઈ રહ્યું છે.

વાયરલ ઓડિયોને લઈને PSI પરમારનું નામ ચર્ચામાં આવ્યું છે. ઓડિયોમાં કથિત રીતે દારૂના સ્ટેન્ડ અને તેના બદલામાં રકમની માંગણી અંગે વાતચીત થતી હોવાનો દાવો કરવામાં આવી રહ્યો છે. રકમ નહીં મળે તો કાર્યવાહી કરવાની ધમકી આપવામાં આવી હોવાનો પણ આક્ષેપ છે.

બુટલેગર પાસેથી કથિત હપ્તાની માંગણી?

વાયરલ ઓડિયોમાં કથિત પોલીસ અધિકારી અને બુટલેગર વચ્ચે રકમને લઈને રકઝક થતી સંભળાતી હોવાનો દાવો છે. આ વાતચીતને આધારે સોશિયલ મીડિયા પર પોલીસની ભૂમિકા અને દારૂબંધીના અમલ અંગે અનેક સવાલો ઉઠી રહ્યા છે.જોકે, આ ઓડિયો ક્લિપમાં રહેલા અવાજ ખરેખર PSI પરમારના જ છે કે નહીં, તેમજ તેમાં કરવામાં આવેલા દાવા અને વાતચીતનો વાસ્તવિક સંદર્ભ શું છે, તેની સ્વતંત્ર પુષ્ટિ થઈ નથી.

દારૂબંધીના અમલ સામે મોટો સવાલ

ગુજરાતમાં દારૂબંધી હોવા છતાં દારૂની ગેરકાયદેસર હેરાફેરી અને વેચાણના બનાવો સમયાંતરે સામે આવતા રહે છે. ત્યારે પોલીસ અધિકારીના નામ સાથે જોડાયેલી આ કથિત ઓડિયો ક્લિપ જો સાચી સાબિત થાય તો તે દારૂબંધીના અમલની વ્યવસ્થા સામે ગંભીર પ્રશ્નો ઊભા કરી શકે છે.

આ પણ વાંચોઃ વિરપરડા ગામના કૂવાનું પાણી હિલોળે કેમ ચડ્યું? કારણ તપાસવા મોરબી પહોંચી વૈજ્ઞાનિકોની ટીમ

ઓડિયોની સત્યતા તપાસનો વિષય

હાલમાં ઉપલબ્ધ વાયરલ ક્લિપના આધારે કોઈ અંતિમ નિષ્કર્ષ પર પહોંચવું યોગ્ય નથી. ઓડિયોની ફોરેન્સિક તપાસ, તેમાં રહેલા અવાજની ઓળખ, વાતચીતનો સંપૂર્ણ સંદર્ભ અને સંબંધિત પોલીસ અધિકારી તથા અન્ય પક્ષોનું સત્તાવાર નિવેદન સામે આવ્યા બાદ જ સમગ્ર મામલાની હકીકત સ્પષ્ટ થઈ શકે છે. આ મામલે સત્તાવાર તપાસ અથવા સંબંધિત અધિકારીઓનું નિવેદન સામે આવે તો તે આધારે વધુ સ્પષ્ટતા થઈ શકે છે. વીટીવી ન્યૂઝ આ ઓડીયોની પુષ્ટિ કરતું નથી.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ