બિઝનેસ / શેરબજારમાં ફરી કડાકો! સેન્સેક્સ 227 અંક ગગડ્યો, નિફ્ટી 24,450ની નીચે

ભારતીય શેરબજારમાં આજે ફરી વેચવાલીનું દબાણ જોવા મળ્યું છે. શરૂઆતના કારોબારમાં સેન્સેક્સ 227 અંક સુધી ગગડ્યો હતો જ્યારે નિફ્ટી પણ 24,450ની સપાટીથી નીચે સરકી ગયો હતો. વૈશ્વિક બજારોના મિશ્ર સંકેતો અને વિદેશી રોકાણકારોની વેચવાલીની અસર સ્થાનિક બજાર પર જોવા મળી રહી છે. બીજી તરફ ક્રૂડ ઓઇલના વધતા ભાવ અને રૂપિયાની નબળાઈએ રોકાણકારોની ચિંતા વધારી છે. હવે બજારની નજર આગામી કારોબારમાં રોકાણકારોની ચાલ અને વૈશ્વિક સંકેતો પર રહેશે.

સેન્સેક્સ અને નિફ્ટી લાલ નિશાનમાં

BSE સેન્સેક્સ 35.99 પોઈન્ટના ઘટાડા સાથે 78,097.31ના સ્તરે ખુલ્યો હતો. જ્યારે NSE નિફ્ટી 31.15 પોઈન્ટ ઘટીને 24,444.55 પર પહોંચ્યો હતો. ત્યારબાદ વેચવાલી વધતા સવારે 9:20 વાગ્યા સુધીમાં સેન્સેક્સ 202.74 પોઈન્ટ એટલે કે 0.26 ટકા ઘટીને 77,951.51 પર આવી ગયો હતો. નિફ્ટી પણ 63.85 પોઈન્ટના ઘટાડા સાથે 24,407.85 પર ટ્રેડ થઈ રહ્યો હતો.

ક્રૂડ ઓઇલના ભાવમાં વધારો

આંતરરાષ્ટ્રીય બજારમાં ક્રૂડ ઓઇલના ભાવમાં વધારો પણ ભારતીય શેરબજાર માટે ચિંતાનો વિષય બન્યો છે. બ્રેન્ટ ક્રૂડનો ભાવ પ્રતિ બેરલ 90 ડૉલરની નજીક પહોંચી ગયો છે. ક્રૂડ મોંઘું થવાથી ભારતના આયાત ખર્ચ પર અસર પડી શકે છે. આ કારણે બજારમાં રોકાણકારો સાવચેતીભર્યું વલણ અપનાવી રહ્યા છે.

36 શેરમાં વેચવાલીનું દબાણ

નિફ્ટી50ના એડવાન્સ-ડિક્લાઇન રેશિયો પરથી બજારમાં વેચવાલીનું દબાણ સ્પષ્ટ જોવા મળ્યું. 14 શેરમાં તેજી જ્યારે 36 શેરમાં ઘટાડો નોંધાયો હતો. હિંડાલ્કો, નેસ્લે ઇન્ડિયા, ગ્રાસિમ, બજાજ ઓટો અને ONGC શરૂઆતના ટોપ ગેનર્સમાં રહ્યા હતા. જ્યારે બજાજ ફિનસર્વ, ઇન્ડિગો, મેક્સ હેલ્થ અને અપોલો હોસ્પિટલ જેવા શેરોમાં ઘટાડો જોવા મળ્યો.

આ પણ વાંચોઃ 8માં પગાર પંચથી ₹20-50 હજારનું પેન્શન કેટલું વધશે? Fitment Factorથી સમજો આખું ગણિત

મિલ્કી મિસ્ટ IPOને પ્રથમ દિવસે કેવો પ્રતિસાદ મળ્યો?

બીજી તરફ મિલ્કી મિસ્ટ ડેરી ફૂડના IPOને રોકાણકારો તરફથી પ્રથમ દિવસે સારો પ્રતિસાદ મળ્યો હતો. NSEના આંકડા અનુસાર 11 ઓગસ્ટે સાંજે 5 વાગ્યા સુધી IPOને 79 ટકા સબ્સક્રિપ્શન મળ્યું હતું. ₹1,553 કરોડના IPO હેઠળ કુલ 8,17,98,244 શેર ઓફર કરવામાં આવ્યા હતા જેમાંથી 6,47,53,190 શેર માટે બિડ મળી હતી. રિટેલ રોકાણકારોની કેટેગરીમાં 96 ટકા અને NII કેટેગરીમાં 92 ટકા સબ્સક્રિપ્શન નોંધાયું હતું.

રૂપિયા પર પણ દબાણ

શેરબજારની સાથે ભારતીય રૂપિયા પર પણ દબાણ જોવા મળ્યું છે. અમેરિકન ડૉલરની સરખામણીમાં રૂપિયો 5 પૈસા નબળો પડીને 95.41ના સ્તરે પહોંચી ગયો હતો. રૂપિયામાં નબળાઈ અને ક્રૂડના ઊંચા ભાવ ભારતીય બજાર માટે પડકારરૂપ બની રહ્યા છે. હવે રોકાણકારોની નજર વૈશ્વિક બજારના સંકેતો અને વિદેશી રોકાણકારોની આગામી ચાલ પર રહેશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ