બિઝનેસ / હવે તમારી પાસે હશે 14 ઓપ્શન, NPSમાં રોકાણ કરનારાઓ માટે મોટી અપડેટ

બચત અને રોકાણની વાત આવે ત્યારે મોટાભાગના લોકો એવા વિકલ્પો પસંદ કરે છે જ્યાં નાણાં સુરક્ષિત રહે અને લાંબા ગાળે ઉત્તમ રિટર્ન મળી રહે. આ શ્રેણીમાં નેશનલ પેન્શન સિસ્ટમ (NPS) માં રોકાણ કરનારાઓ માટે એક ખુશખબર આવી છે. પેન્શન ફંડ રેગ્યુલેટરી એન્ડ ડેવલપમેન્ટ ઓથોરિટી (PFRDA) એ 4 નવા પેન્શન ફંડને મંજૂરી આપી દીધી છે. આ મંજૂરી બાદ NPS માં પેન્શન ફંડ મેનેજરોની કુલ સંખ્યા વધીને 14 થઈ જશે. આ નિર્ણયથી રોકાણકારો પાસે ફંડ મેનેજરોની પસંદગી માટે વધુ વિકલ્પો ઉપલબ્ધ થશે, જેથી તેઓ વિવિધ ફંડ મેનેજરોના પર્ફોર્મન્સ, ઇન્વેસ્ટમેન્ટ સ્ટ્રેટેજી, ફીઝ અને ગ્રાહક સેવાઓની સરખામણી કરીને યોગ્ય નિર્ણય લઈ શકશે.

NPS માં ફંડ મેનેજરો વધવાથી શું ફાયદો થશે?

NPS એકાઉન્ટ ખુલ્યા પછી રોકાણકારે પોતાના નાણાંના સંચાલન માટે એક પેન્શન ફંડ મેનેજર પસંદ કરવાનો હોય છે. આ ફંડ મેનેજર રોકાણકારોની રકમને શેરબજાર (ઇક્વિટી), સરકારી બોન્ડ્સ અને કોર્પોરેટ બોન્ડ્સ જેવા વિવિધ ક્ષેત્રોમાં રોકે છે.

4 નવા ફંડ મેનેજરો ઉમેરાવાથી હવે કુલ 14 વિકલ્પો ઉપલબ્ધ થશે, જેનાથી કોઈ એક ફંડ મેનેજર પર નિર્ભરતા ઘટશે. ફંડ મેનેજરોની સંખ્યા વધવાથી કંપનીઓ વચ્ચે સ્પર્ધા વધશે, જેના પરિણામે બહેતર રોકાણ વ્યૂહરચના, ઉત્તમ ગ્રાહક સેવાઓ અને તકનીકી સુવિધાઓ મળવાની શક્યતા રહેશે. જો કોઈ ફંડનું પર્ફોર્મન્સ નબળું રહે તો રોકાણકાર જરૂરિયાત મુજબ ફંડ મેનેજર બદલવાનો વિકલ્પ પણ પસંદ કરી શકે છે.

PFRDA ના જણાવ્યા મુજબ, છેલ્લા 15 વર્ષમાં NPS ની ઓછું જોખમ ધરાવતી યોજનાઓ એટલે કે કન્ઝર્વેટિવ સ્કીમ્સે વાર્ષિક સરેરાશ 9.2 થી 9.3 ટકા જેટલું રિટર્ન આપ્યું છે. જોકે, આ ભૂતકાળનું પર્ફોર્મન્સ છે અને ભવિષ્યમાં આટલું જ રિટર્ન મળશે તેની કોઈ ગેરંટી હોતી નથી, કારણ કે રિટર્ન બજારની સ્થિતિ પર આધારિત રહે છે.

NPS માં પૈસાનું રોકાણ કેવી રીતે થાય છે?

NPS માં રોકાણકાર પોતાની પસંદગી મુજબ ઇક્વિટી, ગવર્નમેન્ટ સિક્યોરિટીઝ અને કોર્પોરેટ બોન્ડ્સમાં નાણાં રોકી શકે છે. આ સિવાય એક્ટિવ ઓપ્શન કે ઓટો ચોઈસ વિકલ્પ પસંદ કરી શકાય છે. પેન્શન ફંડ મેનેજરની જવાબદારી નક્કી કરેલા નિયમો અનુસાર નાણાંનું રોકાણ કરીને લાંબા ગાળે રોકાણકારોને સારો લાભ અપાવવાની હોય છે.

'પ્રાઇડ-દિશા' ટૂલથી સરખામણી કરવી બનશે સરળ

PFRDA એ રોકાણકારો માટે 'પ્રાઇડ-દિશા' (Pride-Disha) નામનું નવું ટૂલ પણ લોન્ચ કર્યું છે. આ ટૂલની મદદથી અલગ-અલગ પેન્શન ફંડ્સના પર્ફોર્મન્સને સમજવું અને તેની સરખામણી કરવી ખૂબ સરળ બની જશે.

આ પણ વાંચોઃ અમદાવાદ સહિત ગુજરાતમાં સોનાના ભાવમાં ફેરફાર! જાણો આજે શું છે 22K-24K ગોલ્ડનો ભાવ ?

માત્ર ચોક્કસ સમયગાળાનું રિટર્ન જોવાને બદલે, આ ટૂલ રોકાણકારની વાસ્તવિક રોકાણ પદ્ધતિને ધ્યાનમાં રાખે છે. મોટાભાગના લોકો NPS માં દર મહિને નાણાં જમા કરાવતા હોવાથી માત્ર નિશ્ચિત સમયનું રિટર્ન સાચો ખ્યાલ આપતું નથી. આ ટૂલમાં XIRR પદ્ધતિનો ઉપયોગ કરવામાં આવે છે, જે ક્યારે અને કેટલી રકમ રોકવામાં આવી તેના આધારે વાસ્તવિક વાર્ષિક રિટર્નની સચોટ ગણતરી રજૂ કરે છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ