અમદાવાદ / સ્પામાં મળેલી વસ્તુઓથી લઈને કોન્ડોમ સુધી, જપ્ત મુદ્દામાલ પોલીસ માટે બન્યો માથાનો દુખાવો

ગુનાની તપાસમાં જપ્ત થતી ચીજવસ્તુઓ એટલે કે મુદ્દામાલ પોલીસ માટે માથાનો દુખાવો બની રહ્યો છે. પાપડ અને શાકભાજીથી લઈને અથાણાંના ડબા, તૂટેલું ફર્નિચર, ગાદલાં અને કોન્ડોમ સુધીની વસ્તુઓ કોર્ટના આદેશ સુધી સાચવી રાખવી પડે છે. અમદાવાદમાં પણ જુગાર, દારૂ અને અન્ય દરોડામાં મળતો આવો વિચિત્ર મુદ્દામાલ પોલીસ માટે સંગ્રહની મોટી સમસ્યા બની રહ્યો છે.

રાણીપમાં જુગાર પર દરોડામાંથી મળી ચીજો

અમદાવાદના ન્યૂ રાણીપમાં ક્રાઇમ બ્રાંચના જુગાર પરના દરોડા દરમિયાન રૂ. 3.55 લાખ રોકડા, 10 મોબાઇલ ફોન, બે કાર અને એક ટુ વ્હીલર સહિત કુલ રૂ. 38.15 લાખનો મુદ્દામાલ જપ્ત કરવામાં આવ્યો હતો. આ સાથે ચાર ગાદલાં અને એલ્યુમિનિયમનું ટબ પણ મુદ્દામાલમાં નોંધાયાં હતાં. તેમની કિંમત શૂન્ય દર્શાવવામાં આવી હોવા છતાં દસ્તાવેજીકરણ અને સંગ્રહ કરવો પડ્યો છે.

નારોલના દરોડામાં શું શું મળ્યું?

નારોલમાં ૨૪ જૂનના દારૂના દરોડા દરમિયાન પોલીસે રૂ. 28.24 લાખનો દારૂ અને ટાટા-૭૧૦ વાહન જપ્ત કર્યું હતું. જપ્તનામામાં જૂનાં અને તૂટેલાં ૨૦ ફર્નિચર પણ નોંધાયાં હતાં, જેમાં ટેબલ, ખુરશીઓ અને લાકડાની સેટી સામેલ હતાં. તેમની કિંમત પણ શૂન્ય દર્શાવવામાં આવી હતી.

સ્પાના દરોડામાં આઠ કોન્ડોમ મળ્યાં

એસજી હાઇવે પર શનિવારે સ્ટેટ મોનિટરિંગ સેલ (એસએમસી)ના ચાર સ્પા પરના દરોડામાં આઠ કોન્ડોમ પણ મુદ્દામાલમાં જપ્ત થયા હતા. આ ઘટનાએ જપ્ત થતી ચીજવસ્તુઓની યાદી કેટલી વિચિત્ર હોઈ શકે તેનું વધુ એક ઉદાહરણ પૂરું પાડ્યું.

દરિયાપુરના જુગારના દરોડામાં 270 પ્લાસ્ટિક ટોકન જપ્ત

21 જૂને દરિયાપુરમાં પડેલા જુગારના દરોડામાં રોકડ, મોબાઇલ ફોન, ઓટોરિક્ષા અને મોટરસાઇકલ ઉપરાંત 102 પત્તાં, 4૦ પત્તાંની ગડ્ડીઓ, ચેસબોર્ડ અને 270 પ્લાસ્ટિક ટોકન જપ્ત કરાયાં હતાં. પરંપરાગત પથારીની વસ્તુઓ જેવી કે શેતરંજી અને ચોરસો પણ મુદ્દામાલમાં નોંધાયાં હતાં.

સુરતમાં પાપડની બોરી પાછળ રૂ. 3.75 કરોડનું અફીણ

સુરતના પલસાણા પોલીસ મથકની ટીમ દ્વારા ચોખાના પાપડ ભરેલી ટ્રકમાંથી પાપડની બોરીઓ પાછળ છુપાવેલો રૂ. 3.75 કરોડની કિંમતનો ૨.૫ ટન અફીણનો ભૂકો ઝડપાયો હતો. NH-૪૮, NH-૫૩ અને નેશનલ એક્સપ્રેસ-વે-૪ના જંક્શન પર આવેલા પલસાણામાં પ્રતિબંધિત ચીજવસ્તુઓની જપ્તી વારંવાર થાય છે.

વધુ વાંચો : અમદાવાદમાં 32મા માળે ક્રેન સાથે લટકીને શ્રમિકે ફાંસો ખાધો, સવાર સુધી લાશ લટકતી રહી, લિફ્ટમાં નીચે લવાઈ

વડોદરામાં ગાંજો ઝડપાયો

વડોદરામાં રેલવે પોલીસે કેરીના અથાણાના થોડા કિલો નીચે છુપાવેલો ગાંજો ઝડપ્યો હતો. નશીલા પદાર્થ સાથે અથાણાંનો ડબ્બો પણ પુરાવા તરીકે સાચવવો પડ્યો. પોલીસના જણાવ્યા મુજબ, શાકભાજી પાછળ સંતાડેલો દારૂ હોય ત્યારે પણ નાશવંત વસ્તુનો નિકાલ કરતાં પહેલાં જરૂરી દસ્તાવેજી કાર્યવાહી કરવી પડે છે.પોલીસ અધિકારીઓના જણાવ્યા મુજબ, ગુના સાથે સંકળાયેલી અથવા દરોડામાં મળી આવેલી દરેક વસ્તુની યાદી બનાવી કોર્ટના આદેશ સુધી તેનો યોગ્ય સંગ્રહ કરવો પડે છે. કોઈ વ્યક્તિ બાદમાં કાયદેસર માલિકીનો દાવો કરે તો પણ મુદ્દામાલ સુરક્ષિત રાખવો જરૂરી બને છે. સુરત પોલીસના જણાવ્યા મુજબ, જગ્યા ખાલી કરવા માટે અગાઉ મોટી માત્રામાં જપ્ત દારૂનો નાશ પણ કરવામાં આવ્યો છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ