- મહારાષ્ટ્રના લાતુરના ખેડૂત લીલા ધાણાની ખેતીથી થયા માલામાલ
- 25 લાખથી વધુનો થયો ચોખ્ખો નફો
- દ્રાક્ષની ખેતીમાં ખોટ જતા કોથમીર તરફ વળ્યાં
કમાવાની તાકાત હોય અને નસીબ સાથ આપે તો કોઈનું પણ ભાગ્ય ચમકી જાય છે અને તેમાંય અન્નદાતાઓ તો જમીન ફાડીને સોનું ઉગાડી જાણે તેવા મક્કમ મનોબળવાળા છે. અહીં વાત કરવી છે મહારાષ્ટ્રના લાતુરના એક ખેડૂતની, જેમણે લીલા ધાણા વેચીને એક વર્ષમાં 25 લાખથી વધુની કમાણી કરી.
એક વર્ષમાં 25 લાખથી વધુ કમાયા
ધાણા વેચીને માલામાલ થનાર ખેડૂતનું નામ રમેશ વિઠ્ઠલરાવ છે. પહેલા તેઓ પરંપરાગત પાકની ખેતી કરતા હતા. તેઓ આમાંથી આટલી કમાણી કરી રહ્યા ન હતા. આવી સ્થિતિમાં તેમણે 4 વર્ષ પહેલા પરંપરાગત પાકોની ખેતી છોડી દીધી હતી અને વૈજ્ઞાનિક પદ્ધતિથી ધાણાની ખેતી શરૂ કરી હતી અને તેમને આ ખેતી ફળી ગઈ અને એક જ વર્ષમાં 27 લાખથી વધુની કમાણી કરી લીધી. આ વર્ષે રમેશભાઈએ આલીશાન ઘર બનાવ્યું છે અને મોંઘી ગાડી પણ લીધી છે.
5 એકર જમીનમાં ધાણાની ખેતી
રમેશ વિઠ્ઠલરાવ છેલ્લા ચાર વર્ષથી 5 એકર જમીનમાં ધાણાની ખેતી કરે છે. તેમનું કહેવું છે કે, અત્યાર સુધીમાં તેમણે કોથમીર વેચીને લાખો રૂપિયાની કમાણી કરી છે. રમેશ વિઠ્ઠલરાવના જણાવ્યા અનુસાર લાતુર જિલ્લો દુષ્કાળગ્રસ્ત વિસ્તાર છે. અહીં ખૂબ ઓછો વરસાદ પડે છે. આવી સ્થિતિમાં પરંપરાગત પાકની ખેતીથી ખેડૂતોની કમાણી પણ થતી નથી. ઘણી વખત ખેડૂતો ખર્ચ પણ વસૂલ કરી શકતા નથી. તેથી જ મેં કોથમીરની ખેતી કરવાનું નક્કી કર્યું. ખાસ વાત એ છે કે ખેડૂત રમેશે 2019માં ધાણાની ખેતી શરૂ કરી હતી. જો કે 25 એકર જમીન પર કોથમીર વાવવા માટે તેમને માત્ર એક લાખ રૂપિયા ખર્ચ કરવા પડ્યા હતા. આ રીતે તેમને 27 લાખ રૂપિયાનો ચોખ્ખો નફો થયો. રમેશભાઈએ 2020માં 16 લાખ, 2021માં 14 લાખ, 2022માં 13 લાખના ધાણા વેચ્યાં હતા. ધાણાની ખેતી શરૂ કરતા પહેલા રમેશે 2015માં 3 એકર જમીનમાં દ્રાક્ષનું વાવેતર કર્યું હતું પરંતુ દ્રાક્ષની ખેતી માથે પડી હતી આથી તેમણે ધાણાની ખેતી કરવાનો વિચાર આવ્યો અને પહેલા જ વર્ષે તેમને 27 લાખની માતબર કમાણી થઈ આથી ઉત્સાહિત થઈને તેમણે આલિશાન ઘર બનાવ્યું અને મોંઘી ગાડી પણ લીધી.
