કરૂણાંતિકા / સુરતના સાયણમાં લીફ્ટ તૂટતા 2 શ્રમિકોના મોત, માલ ચઢાવતી વખતે ઘટી દુર્ઘટના

સુરત જિલ્લાના સાયણ વિસ્તારમાં એક ગંભીર દુર્ઘટના સર્જાઈ છે. આદર્શ નગર–2 વિસ્તારના ઇન્ડસ્ટ્રીયલ ઝોનમાં માલસામાન લઇ જવા માટેની લિફ્ટ તૂટી પડતા બે પરપ્રાંતીય યુવાનોએ સ્થળ પર જ જાન ગુમાવી છે. ઘટના બનતા જ સમગ્ર વિસ્તારમાં શોક અને દહેશતનું વાતાવરણ છવાઈ ગયું છે.

માહિતી મુજબ, દુર્ઘટના ત્યારે બની જ્યારે રિકી મહંતો અને કિશન નામના બે પરપ્રાંતીય યુવાનો લિફ્ટ મારફતે માલ ચડાવવાનું કામ કરી રહ્યા હતા. અચાનક જ લિફ્ટની કેબલ તૂટી જતા લિફ્ટ નીચે ધસી પડી. બંને યુવાનોને ગંભીર ઇજાઓ પહોચતાં તેમનું મૃત્યુ નિપજ્યું.

દુર્ઘટનાની જાણ થતાં જ પોલીસ અને ફાયર વિભાગે ઘટનાસ્થળે પહોંચી વધુ તપાસ શરૂ કરી છે. ઇન્ડસ્ટ્રીયલ વિસ્તારોમાં મશીનરીના નિયમિત મેન્ટેનન્સનો મુદ્દો ફરી એકવાર ચર્ચામાં આવ્યો છે. કામદારો અને સુરક્ષા ધોરણો અંગે મોટા પ્રશ્નો ઊભા થઈ રહ્યાં છે.

લિફ્ટ તૂટી પડે અથવા ખામી સર્જાય ત્યારે શું કરવું?

આ પ્રકારની દુર્ઘટનાઓ ઘણીવાર બેદરકારી અથવા મેન્ટેનન્સની ખામીના કારણે બને છે. પરંતુ જો લિફ્ટ તૂટી પાડવાનું જોખમ સર્જાય તો નીચેના પગલાં જીવ બચાવવામાં મદદરૂપ બની શકે —

જમીન પર બેસી જાવ અથવા સૂઈ જાવ

લિફ્ટ ઝડપથી નીચે પડી રહી હોય ત્યારે શરીરને નીચે બેસી જવાનું કે સૂઈ જવાનું શ્રેષ્ઠ. આ સ્થિતિમાં સ્પાઇન અને હેડ ઈન્જરીનું જોખમ ઓછું થાય છે.

માથું અને ગળાને હાથથી કવચ આપો

કોઈ પણ ભારે વસ્તુ પડી શકે એટલે માથાને સુરક્ષિત રાખવું સૌથી અગત્યનું.

એલાર્મ બટન દબાવવું કે ઇમરજન્સી કોલ કરવો

જો લિફ્ટ અટકી જાય પરંતુ તૂટવાની સ્થિતિ ન હોય તો તરત જ એલાર્મ અથવા ઇમરજન્સી કોમ્યુનિકેશન બટન દબાવો.

ઉદ્યોગોમાં નિયમિત સુરક્ષા ચેક ફરજિયાત રાખવા જોઈએ

ઇન્ડસ્ટ્રીયલ ઝોનમાં માલસામાન લે-જતી લિફ્ટો હેવી-લોડ લિફ્ટ હોય છે, જેના નિયમિત મેન્ટેનન્સ વગર ગંભીર દુર્ઘટનાઓ સર્જાઈ શકે છે.

આ પણ વાંચોઃ અમદાવાદમાં વધતી સ્નેચિંગની ઘટનાઓ, બેફામ લૂંટારુઓ સામે પોલીસ લાચાર !

દુર્ઘટનાએ સુરક્ષા ધોરણો પર ફરી પ્રશ્નચિહ્ન મૂક્યું

સાયણની આ ઘટનાએ ફરી એકવાર સ્પષ્ટ કર્યું છે કે ઉદ્યોગોમાં સલામતીને પ્રાથમિકતા આપવી અનિવાર્ય છે. કામદારોના જીવને જોખમમાં નાખતા લિફ્ટ અને મશીનરીના ઉપયોગ પહેલાં મેન્ટેનન્સ ચેક ફરજિયાત રીતે થવા જોઈએ. રિકી મહંતો અને કિશન જેવા યુવાનોની નિર્દોષ જિંદગી બચી શકત, જો સમયસર અને યોગ્ય સુરક્ષા વ્યવસ્થાઓ લાગુ કરવામાં આવી હોત.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ