VIDEO / યુવતીની છેડતી મામલે જૂની અદાવત, કાલોલમાં હિંસક અથડામણ

પંચમહાલ જિલ્લાના કાલોલ શહેરમાં મોડી રાત્રે એક જ સમુદાયના બે જૂથ વચ્ચે થયેલી હિંસક અથડામણથી સમગ્ર વિસ્તારમાં તણાવનો માહોલ સર્જાયો છે. યુવતીની છેડતીના મુદ્દે શરૂ થયેલી બોલાચાલી થોડી જ વારમાં ઉગ્ર બની ગઈ અને બંને પક્ષ વચ્ચે છૂટ્ટાહાથની મારામારી શરૂ થઈ ગઈ.

ખાટલાનો પણ હથિયાર તરીકે ઉપયોગ કરીને હુમલો કરાયો

પ્રાપ્ત માહિતી અનુસાર, ઝઘડો એટલો વધ્યો કે લોકો લાકડીઓ, ધોકા, લોખંડના પાઈપ, તગારા અને પથ્થરો જેવા જે કંઈ હાથમાં આવ્યું તેનો ઉપયોગ કરીને એકબીજા પર હુમલો કરતા જોવા મળ્યા. કેટલીક જગ્યાએ તો ખાટલાનો પણ હથિયાર તરીકે ઉપયોગ કરવામાં આવ્યો હતો, જે ઘટનાની ગંભીરતા દર્શાવે છે.

ધિંગાણાથી આખી સોસાયટીમાં અરાજકતાનો માહોલ

આ ધિંગાણામાં માત્ર યુવાનો જ નહીં પરંતુ વૃદ્ધો, મહિલાઓ અને બાળકો પણ સામેલ થઈ ગયા હતા. જેના કારણે પરિસ્થિતિ વધુ બેકાબૂ બની ગઈ હતી. સમગ્ર સોસાયટીમાં અરાજકતાનો માહોલ સર્જાયો હતો અને લોકોમાં ભય ફેલાયો હતો.

ઘટનાનો વીડિયો વાયરલ

ઘટનાના વીડિયો હાલ સોશિયલ મીડિયામાં વાયરલ થઈ રહ્યા છે, જેમાં લોકો ખુલ્લેઆમ એકબીજા પર હુમલો કરતા નજરે પડે છે. અંગત અદાવત અને છેડતીના મુદ્દે થયેલી આ હિંસાએ સ્થાનિક લોકોમાં ચિંતા વધારી છે.

આ પણ વાંચોઃ સ્થાનિક સ્વરાજની ચૂંટણીને લઈ ભાજપની મહત્વની બેઠક, ઘડાશે રણનીતિ

પોલીસે તપાસ શરૂ કરી

પથ્થરમારાની આ ઘટનાની જાણ થતા જ મામલો પોલીસ મથકે પહોંચ્યો હતો. પોલીસે ઘટનાની ગંભીરતા ધ્યાનમાં લઈને તપાસ હાથ ધરી છે અને જવાબદાર વ્યક્તિઓ સામે કાયદેસરની કાર્યવાહી કરવામાં આવશે તેવી માહિતી આપવામાં આવી છે. હાલ વિસ્તારમાં શાંતિ જળવાઈ રહે તે માટે પોલીસ બંદોબસ્ત ગોઠવવામાં આવ્યો છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ