- કલરાજ મિશ્રનું ટ્વીટર એકાઉન્ટ હેક
- રાજસ્થાનના રાજ્યપાલ છે કલરાજ મિશ્ર
- કેન્દ્રીય મંત્રી રાવ ઈંદ્રજીત સિંહનું એકાઉન્ટ પણ હેક
- હેકર્સે અરબી ભાષામાં કરી પોસ્ટ
ગત થોડા દિવસથી ટ્વીટર એકાઉન્ટ હેક થવાના સમાચાર સામે આવી રહ્યા છે. ત્યારે હવે આવા જ સમાચાર રાજસ્થાનમાંથી સામે આવ્યા છે. રવિવારે રાજસ્થાનના રાજ્યપાલ કલરાજ મિશ્રનું ટ્વીટર એકાઉન્ટ હેક થવાની ઘટના સામે આવી હતી.
અરબી ભાષામાં કરી ટ્વિટ
હેકર્સે એકાઉન્ટ હેક કરીને અરબી ભાષામાં ટ્વીટ પોસ્ટ કરી હતી. રાજ્યપાલના ટ્વીટર એકાઉન્ટ હેક થવાના સમાચાર મળતાની સાથે સાઈબર સેલની ટીમ એકાઉન્ટ રિકવર કરવામાં લાગી છે. કલરાજ મિશ્ર ઉપરાંત મંત્રી રાવ ઈંદ્રજીત સિંહનું ટ્વીટર એકાઉન્ટ પણ હેક થયું છે. આ બન્ને નેતાના ટ્વીટર એકાઉન્ટ હેક કર્યા બાદ હેકર્સે એક જ પ્રકારની લાઈન અને ઈમોઝી પોસ્ટ કર્યું હતું.
કેન્દ્રીય મંત્રી રાવ ઈન્દ્રજીત સિંહનું ટ્વિટર એકાઉન્ટ હેક
રાજ્યપાલ કલરાજ મિશ્રા ઉપરાંત કેન્દ્રીય મંત્રી રાવ ઈન્દ્રજીત સિંહનું ટ્વિટર એકાઉન્ટ પણ હેક થયું હોવાના અહેવાલ છે. રાવ ઈન્દ્રજીત સિંહના ટ્વિટર હેન્ડલ પરથી અરબી ભાષામાં એક ટ્વિટ પણ કરવામાં આવી છે. કલરાજ મિશ્રાના ટ્વિટર હેન્ડલ પરથી આ જ ટ્વિટ છે. રાવ ઈન્દ્રજીતે ટ્વિટરની સાથે ટેલિકોમ મંત્રાલયમાં પણ સત્તાવાર રીતે ફરિયાદ નોંધાવી છે.
શનિવારે રાત્રે NDRFનું ટ્વિટર હેન્ડલ પણ હેક કરવામાં આવ્યું હતું
નેશનલ ડિઝાસ્ટર રિસ્પોન્સ ફોર્સ (NDRF)નું ટ્વિટર હેન્ડલ શનિવારે રાત્રે હેક કરવામાં આવ્યું હતું. એનડીઆરએફના મહાનિર્દેશક અતુલ કરવલે આ માહિતી આપી હતી. તેમણે જણાવ્યું હતું કે શનિવારે રાત્રે ટ્વિટર હેન્ડલ હેક કરવામાં આવ્યું હતું. અમે આ મામલે વધુ તપાસ કરી રહ્યા છીએ.
