વિવાદ / સૌરાષ્ટ્ર યુનિ.નું પત્રકારત્વ ભવન હવે આસિ. પ્રોફેસરના હવાલે, ઇન્ચાર્જ કુલપતિથી કંટાળી અધ્યક્ષે રાજીનામું આપ્યાની ચર્ચા

• સૌરાષ્ટ્ર યુનિવર્સિટીનું પત્રકારત્વ ભવન હવે આસી. પ્રોફેસરનાં હવાલે
• પત્રકારત્વ ભવનના અધ્યક્ષ ડૉ. નીતા ઉદાણીએ આપ્યું રાજીનામું
• પારિવારિક કારણ આપી ડૉ. નીતા ઉદાણીએ આપ્યું રાજીનામુ

સૌરાષ્ટ્ર યુનિવર્સિટીમાં યુનિવર્સિટીમાં રોજ કોઈ નવો વિવાદ ઉભો થતો જ રહે છે. જેના લીધે યુનિવર્સિટી ચર્ચાનાં ચગડોળે ચડી છે. ત્યારે પાંચ દિવસ પહેલા જ સૌરાષ્ટ્ર યુનિવર્સિટીનાં ભ્રષ્ટાચારને ઉજાગર કરતી કવિતાનાં લીધે યુનિવર્સિટીનાં ગુજરાતી ભવનનાં વડાને સસ્પેન્ડ કરી તેઓની સામે ખાતાકીય તપાસ કરવાનો આદેશ આપવામાં આવ્યો છે. જે વિવાદ હજુ શાંત થયો નથી ત્યાં જ પત્રકારત્વ વિભાગનાં અધ્યક્ષ નીતાબેન ઉદાણીએ અચાનક જ રાજીનામું આપી દેતા સમગ્ર મુદ્દો સૌરાષ્ટ્ર યુનિવર્સિટી સહિત રાજકોટ શહેરમાં ટોક ઓફ ધ ટાઉન રહેવા પામ્યો હતો.

ઈન્ચાર્જ કુલપતિ ર્ડા. ગીરીશ ભીમાણીનાં તુમાખી ભર્યા સ્વભાવને લીધે કર્મચારીઓમાં આંતરિક રોષ
રાજકોટ સૌરાષ્ટ્ર યુનિવર્સિટીના ઇન્ચાર્જ કુલપતિના જોહુકમીભર્યા શાસનથી અધ્યાપકો કંટાળી ગયા હોય તેવો માહોલ છે.  ત્યારે મળતી માહિતી મુજબ ડો.ભીમાણીએ સામે પડેએ સસ્પેન્ડની ફોર્મ્યુલા અપનાવતા હવે અધ્યાપકો પણ ફફડી રહ્યા છે. આ માહોલ વચ્ચે પત્રકારત્વ ભવનના અધ્યક્ષે હેડશીપમાંથી મુક્તિ માગી છે. કાર્યકારી કુલપતિ ડો.ગીરીશ ભીમાણીના તુમાખીભર્યા સ્વભાવને લીધે અધ્યાપકો, અધિકારીઓ, કર્મીઓમાં આંતરીક રોષ ફેલાયો છે. દરમિયાન જર્નાલિઝમ ભવનના હેડના અચાનક નીતાબેન ઉદાણી એ અધ્યક્ષપદમાંથી મુક્તિના નિર્ણયે ચર્ચા જગાવી છે. આ બાબતે ઇન્ચાર્જ કુલસચિવ અમિત પારેખે જણાવ્યું કે, પત્રકારત્વ ભવનના હેડ ડો.નીતાબેન ઉદાણીના અધ્યક્ષપદેથી મુક્તિની નોંધ મંજૂર થઇ ગઈ છે. હવે નવા હેડ તરીકે તુષાર ચંદારાણા ચાર્જ સંભાળશે. 
મેં અંગત કારણોસર હેડશીપ છોડી છેઃ ર્ડા.નીતાબેન ઉદાણી
જોકે ભવન અધ્યક્ષ તરીકે મુક્તિ માંગ્યાના કારણ બાબતે ડો.નીતાબેન ઉદાણીને પૂછતાં તેમણે કહ્યું કે. મેં અંગત કારણોસર હેડશીપ છોડી છે. સૌરાષ્ટ્ર યુનિવર્સિટી સહિત રાજ્યની સરકારી વિશ્વ વિદ્યાલયોમાં થતી વિદ્યાર્થી અને અધ્યાપકલક્ષી પ્રવૃતિઓનો વધુમાં વધુ પ્રચાર અને પ્રસાર થાય તે માટે હવે સોશ્યલ મીડિયા ઇન્ચાર્જ મૂકાયા છે.  જેની એક બેઠક તાજેતરમાં ગાંધીનગરમાં મળી હતી.

સૌરાષ્ટ્ર યુનિવર્સિટીનાં સોશિયલ મીડિયા ઈન્ચાર્જ તરીકે તુષાર ચંદારાણાની નિમણૂંક
મળતી વિગતો મુજબ, ગાંધીનગરમાં ઉચ્ચ શિક્ષણ કમિશ્નર કચેરીના પરિમલ પંડ્યાના અધ્યક્ષ સ્થાને એક બેઠક તાજેતરમાં મળી જેમાં રાજ્યની ૧૬ સરકારી વિશ્વ વિદ્યાલયના સોશ્યલ મીડિયા ઇન્ચાર્જ ત્યાં પહોચ્યા હતા. જેમાં linkdin. ઇન્સ્ટાગ્રામ અને ટવીટર એમ ત્રણ મુખ્ય સોશ્યલ મીડિયા પ્લેટફોર્મ પર પ્રચાર-પ્રસાર કરવા સૂચના અપાઈ હતી. જેમાં સૌરાષ્ટ્ર યુનિવર્સિટીના સોશ્યલ મીડિયા ઇન્ચાર્જ તરીકે તુષાર ચંદારાણાની નિમણૂક કરવામાં આવી છે જોકે જાણકારો કહે છે કે તુષાર ચંદારાણા ઘણા વર્ષોથી મોબાઇલ પણ ન વાપરતા તેને સોશિયલ મીડિયાના ઇન્ચાર્જ બનાવ્યા છે.