વિશ્વ / જો ટ્રમ્પ પીછેહઠ કરશે!, તો શું નેતન્યાહૂ ઈરાન સામે પરમાણુ બોમ્બનો ઉપયોગ કરશે?

ઈરાન અને ઈઝરાયલ વચ્ચે ચાલી રહેલા યુદ્ધનો અંત આવવાનું નામ નથી લઈ રહ્યો. જોકે, આ યુદ્ધ શરૂ થવાનું કારણ ઈઝરાયલી સેના દ્વારા તેહરાન અને તેની આસપાસના પરમાણુ મથકો પર હુમલો હતો. ઈઝરાયલી સેના આમાં ઘણી હદ સુધી સફળ રહી હતી, પરંતુ તેમ છતા ઈરાનનું એક પરમાણુ મથક હજુ પણ સંપૂર્ણપણે સુરક્ષિત છે અને તેનું નામ ફોર્ડો ન્યુક્લિયર ફ્યુઅલ પ્લાન્ટ છે. ઈરાનનો સૌથી સુરક્ષિત પરમાણુ પ્લાન્ટ (ફોર્ડો ન્યુક્લિયર ફ્યુઅલ પ્લાન્ટ) રાજધાની તેહરાનથી 125 માઈલ દૂર, એક પર્વત નીચે લગભગ ૩૦૦ ફૂટની ઊંડાઈએ બનેલો છે. એવું કહેવાય છે કે ઈરાન ટેકરી પર સ્થિત આ પ્લાન્ટમાં પોતાના માટે ખૂબ જ સમૃદ્ધ યુરેનિયમ (U-235) ઉત્પન્ન કરે છે.

ફોર્ડો પ્લાન્ટ 80-90 મીટર મોટા ખડકો નીચે છે

પરમાણુ બોમ્બ બનાવવા માટે U-235 ખૂબ જ મહત્વપૂર્ણ છે. તે ઈરાન માટે એટલું મહત્વપૂર્ણ છે કે તેણે તેને મજબૂત બનાવ્યું છે. હવાઈ હુમલા અને બોમ્બમારા દ્વારા પણ તેનો નાશ કરી શકાતો નથી. આ સ્થળ ઓછામાં ઓછા 80 થી 90 મીટર મોટા ખડકો નીચે બનેલ છે. ઈરાને રશિયન S-૩૦૦ હવાઈ સંરક્ષણ પ્રણાલી અને ભારે લશ્કરી હાજરી સાથે તેને સુરક્ષિત બનાવ્યું છે.

બંકર બસ્ટર બોમ્બ શું છે?

ફોર્ડો પરમાણુ પ્લાન્ટને નષ્ટ કરવા માટે, એક ખૂબ જ શક્તિશાળી બોમ્બની જરૂર પડશે અને ફક્ત અમેરિકા પાસે જ તે બોમ્બ છે. તેને નષ્ટ કરવા માટે, એક બંકર બસ્ટર બોમ્બની જરૂર પડશે. બંકર બસ્ટર બોમ્બ જમીનની સપાટી નીચે ઊંડા વિસ્ફોટ કરવા માટે રચાયેલ છે. અમેરિકાનો GBU-57 મેસિવ ઓર્ડનન્સ પેનિટ્રેટર એક સમાન બોમ્બ છે, જેનું વજન લગભગ 13,600 કિલોગ્રામ છે. તે ઊંડા ટનલ અને મજબૂત બંકરો પર સચોટ હુમલો કરવા માટે રચાયેલ છે.

ફોર્ડો પ્લાન્ટ અંગે ટ્રમ્પનું શું વલણ છે?

અમેરિકાના રાષ્ટ્રપતિ ડોનાલ્ડ ટ્રમ્પે ઘણી વખત ઈરાનના પરમાણુ પ્લાન્ટ પર હુમલો કરવાની વાત કરી છે. ટ્રમ્પ કહે છે કે જો ઈરાનને પરમાણુ બોમ્બ બનાવતા અટકાવવા હોય તો તેનો નાશ કરવો જ પડશે, પરંતુ તેમણે હજુ સુધી એવું કહ્યું નથી કે તેઓ આ મામલે ઈઝરાયલને મદદ કરશે કે નહીં.

આ પણ વાંચો: ઇઝરાયેલી હુમલામાં વધારે એક ન્યૂક્લિયર વૈજ્ઞાનિકનું મોત, ઇરાને કહ્યું હવે તો વાતચીત જ શક્ય નહી

'ઇઝરાયલ પરમાણુ બોમ્બનો ઉપયોગ કરી શકે છે'

એક મીડિયા અહેવાલ મુજબ, જો ટ્રમ્પ બે અઠવાડિયામાં ફોર્ડો પરમાણુ પ્લાન્ટ પર હુમલો કરવાનું ટાળે છે, તો ઇઝરાયલ પાસે આ સ્થળનો નાશ કરવાનો એક જ રસ્તો છે અને તે છે પરમાણુ બોમ્બનો ઉપયોગ કરવો. હિબ્રુ ભાષામાં આપેલા ઇન્ટરવ્યુમાં નેતન્યાહૂએ કહ્યું કે, 'ઇઝરાયલ ફોર્ડો પરમાણુ પ્લાન્ટ સહિત ઇરાનના તમામ પરમાણુ સ્થળોનો નાશ કરવા માટે પ્રતિબદ્ધ છે'. તેમણે વધુમાં કહ્યું કે 'અમારી પાસે કોઈના સહયોગ વિના પણ તેને નાશ કરવાની ક્ષમતા છે. જે સ્થિતિમાં એવું અનુમાન કરવામાં આવી રહ્યું છે કે ઇઝરાયલ ફોર્ડો પરમાણુ પ્લાન્ટનો નાશ કરવા માટે ઓછી શક્તિ ધરાવતા પરમાણુ શસ્ત્રોનો ઉપયોગ કરી શકે છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ