એલર્ટ જાહેર / દક્ષિણ ગુજરાતમાં ધોધમાર વરસાદ, ડોસવાડા વિયર ડેમ થયો ઓવરફ્લો, 17 ગામ એલર્ટ કરાયાં

તાપી જિલ્લામાં વરસેલા ભારે વરસાદના પગલે જળાશયોમાં પાણીની આવકમાં નોંધપાત્ર વધારો થયો છે. સિઝનમાં પ્રથમવાર ડોસવાડા વિયર ડેમ ઓવરફ્લો થયો છે. ડેમની ઉપરથી પાણી વહેતા દૃશ્યો જોવા મળી રહ્યા છે, જેના કારણે આસપાસના વિસ્તારોમાં લોકોને સાવચેત રહેવા સૂચના આપવામાં આવી છે.

મીંઢોળા નદીમાં પાણી છોડવામાં આવ્યું

ડોસવાડા ડેમમાં પાણીની સપાટી વધતા મીંઢોળા નદીમાં પાણી છોડવામાં આવી રહ્યું છે. નદીમાં પાણીનો પ્રવાહ વધવાની શક્યતાને ધ્યાનમાં રાખીને તંત્ર દ્વારા નદીકાંઠાના વિસ્તારોમાં રહેતા લોકોને એલર્ટ રહેવા જણાવાયું છે.

17 ગામોને સાવચેતીના ભાગરૂપે એલર્ટ

ડેમ ઓવરફ્લો થતાં તાપી જિલ્લાના 17 ગામોને સાવચેતીના ભાગરૂપે એલર્ટ કરવામાં આવ્યા છે. લોકોને નદીના પટમાં ન જવા અને પાણીના પ્રવાહથી દૂર રહેવા અપીલ કરવામાં આવી છે.

તંત્ર દ્વારા પરિસ્થિતિ પર સતત નજર રાખવામાં આવી રહી છે અને જરૂરિયાત મુજબ સુરક્ષાત્મક પગલાં લેવામાં આવશે. ભારે વરસાદને કારણે જિલ્લામાં અન્ય જળાશયોમાં પણ પાણીની આવક વધી રહી છે.

આ પણ વાંચોઃ અમદાવાદ એરપોર્ટ પર કસ્ટમ્સની મોટી કાર્યવાહી, 98.78 લાખનું સોનું ઝડપાયું

પાણીનું સ્તર વધતા પહેલી વખત ખોલાયા મધુબન ડેમના દરવાજા

વલસાડ જિલ્લામાં ભારે વરસાદથી નદી-નાળા છલકાયા છે. ઉપરવાસમાં ધોધમાર વરસાદથી મધુબન ડેમમાં પાણીની આવક થવા પામી હતી. સતત વરસાદથી ડેમમાં પાણીના સ્તરમાં વધારો થઈ રહ્યો છે. પાણીનું સ્તર વધતા પહેલી વખત મધુબન ડેમના દરવાજા ખોલાયા છે. મધુબન ડેમના 2 દરવાજા 5 મીટર ખોલવામાં આવ્યા છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ