સ્પોર્ટ્સ / જ્યારે ધોનીએ 0.08 સેકન્ડમાં જ પ્લેયરને કર્યો હતો સ્ટંપ આઉટ, જાણો 5 મોટા રેકોર્ડ્સ

7 જુલાઈ 1981ના રોજ રાંચીમાં જન્મેલા મહેન્દ્ર સિંહ ધોનીએ ભારતીય ક્રિકેટને નવી ઊંચાઈઓ પર પહોંચાડ્યું છે. વિકેટકીપર, ફિનિશર અને કેપ્ટન તરીકે તેમણે વિશ્વ ક્રિકેટમાં અલગ ઓળખ બનાવી છે. તેમની આગેવાનીમાં ભારતે અનેક ઐતિહાસિક સિદ્ધિઓ મેળવી હતી. તેમના જન્મદિવસે જાણીએ ધોનીના પાંચ સૌથી મોટા રેકોર્ડ વિશે.

સૌથી વધુ આંતરરાષ્ટ્રીય મેચોમાં કેપ્ટનશિપ

એમએસ ધોની આંતરરાષ્ટ્રીય ક્રિકેટમાં સૌથી વધુ મેચોમાં કેપ્ટનશિપ કરનારા ખેલાડીઓમાં સામેલ છે. તેમણે કુલ 332 આંતરરાષ્ટ્રીય મેચોમાં ભારતીય ટીમનું નેતૃત્વ કર્યું હતું. તેમની કેપ્ટનશિપ હેઠળ ભારતે 178 મેચોમાં જીત મેળવી હતી. જેમાં 200 વનડે, 75 ટી20 અને 60 ટેસ્ટ મેચનો સમાવેશ થાય છે.

આંતરરાષ્ટ્રીય ક્રિકેટમાં સૌથી વધુ સ્ટમ્પિંગ

ધોનીને વિશ્વના શ્રેષ્ઠ વિકેટકીપરોમાં ગણવામાં આવે છે. તેમના નામે આંતરરાષ્ટ્રીય ક્રિકેટમાં સૌથી વધુ 195 સ્ટમ્પિંગ કરવાનો રેકોર્ડ નોંધાયેલો છે. 538 આંતરરાષ્ટ્રીય મેચોમાં તેમણે પોતાની ઝડપી વિકેટકીપિંગથી અનેક બેટરોને પેવેલિયન મોકલ્યા હતા.

0.08 સેકન્ડમાં સ્ટમ્પિંગનો વર્લ્ડ રેકોર્ડ

ધોનીએ વેસ્ટ ઇન્ડિઝના કીમો પોલને માત્ર 0.08 સેકન્ડમાં સ્ટમ્પ આઉટ કરીને વિશ્વ રેકોર્ડ બનાવ્યો હતો. આજે પણ આંતરરાષ્ટ્રીય ક્રિકેટમાં સૌથી ઝડપી સ્ટમ્પિંગનો આ રેકોર્ડ તેમના નામે જ છે.

આ પણ વાંચોઃ MS Dhoni 45th Birthday: MS ધોની ફોન કેમ નથી ઉપાડતો, આજે માહીના જન્મદિવસે જાણો 7 આશ્ચર્યજનક તથ્યો

વનડેમાં સૌથી વધુ વખત નોટઆઉટ

એમએસ ધોનીના નામે વનડે ક્રિકેટમાં સૌથી વધુ વખત નોટઆઉટ રહેવાનો પણ રેકોર્ડ છે. તેઓ 84 વખત નોટઆઉટ રહીને પેવેલિયન પરત ફર્યા હતા, જે તેમની મેચ ફિનિશ કરવાની ક્ષમતાનું ઉત્તમ ઉદાહરણ છે.

3 ICC ટ્રોફી જીતનારા એકમાત્ર કેપ્ટન

ધોની વિશ્વ ક્રિકેટના એકમાત્ર એવા કેપ્ટન છે જેમણે ત્રણ અલગ-અલગ ICC ટ્રોફી જીતી છે. તેમની કેપ્ટનશિપ હેઠળ ભારતે 2007નો ટી20 વર્લ્ડ કપ, 2011નો વનડે વર્લ્ડ કપ અને 2013ની ચેમ્પિયન્સ ટ્રોફી જીતી હતી. આ સિદ્ધિ આજે પણ કોઈ અન્ય કેપ્ટન હાંસલ કરી શક્યો નથી.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ