સુરત / ખરાબ હવામાનને કારણે મધરાત્રે ઈન્ડિગોની ફ્લાઈટ કરાઈ ડાયવર્ટ, સુરત એરપોર્ટ પર લેન્ડિંગ

Surat Flight Landing : સોમવારે રાત્રે દિલ્હીથી શિરડી જતી IndiGo ની ફ્લાઇટને અચાનક સુરત તરફ ડાયવર્ટ કરવી પડી, જેના કારણે મુસાફરોને થોડો સમય માટે મુશ્કેલીનો સામનો કરવો પડ્યો. ખરાબ હવામાન અને ઓછી દૃશ્યતાને કારણે આ નિર્ણય લેવાયો હતો, જેને સલામતીના દ્રષ્ટિકોણથી મહત્વપૂર્ણ માનવામાં આવે છે.

શું હતો સમગ્ર મામલો ?

માહિતી મુજબ, ફ્લાઇટ નિયમિત સમય મુજબ ઉડાન ભરી હતી અને રાત્રે શિરડી નજીક પહોંચી ગઈ હતી. પરંતુ ત્યાં ભારે પવન અને ઓછી વિઝિબિલિટીના કારણે વિમાનનું સુરક્ષિત લેન્ડિંગ શક્ય બન્યું નહોતું. પાયલોટે કેટલાક સમય સુધી વિમાનને હવામાં જ રાખીને પરિસ્થિતિ સુધરે તેવી રાહ જોઈ, પરંતુ હવામાનમાં કોઈ ખાસ ફેરફાર ન આવતા અંતે નિર્ણય લેવાયો કે ફ્લાઇટને સુરત એરપોર્ટ પર ઉતારવામાં આવે.

વિગતો મુજબ વિમાનમાં 150થી વધુ મુસાફરો સવાર હતા. લાંબા સમય સુધી હવામાં ચક્કર મારતા રહેવાથી મુસાફરોમાં થોડી ચિંતા અને ગૂંચવણ સર્જાઈ હતી. સ્થાનિક વિસ્તારોમાં પણ વિમાન ઓછી ઊંચાઈએ ફરતા લોકોમાં ગભરાટનો માહોલ ઉભો થયો હતો, પરંતુ વહીવટીતંત્રે સ્પષ્ટ કર્યું કે, વિમાનમાં કોઈ ટેકનિકલ ખામી નહોતી.

આ પણ વાંચો : સુરતના લિંબાયતમાં મકાનમાં ભીષણ આગ લાગતા 4 મહિલા સહિત બાળકનું દર્દનાક મોત

અંતે વિમાન સુરત એરપોર્ટ પર સલામત રીતે ઉતારવામાં આવ્યું, જ્યાં જરૂરી પ્રક્રિયા અને ઇંધણ ભરવાનું કામ પૂર્ણ કરવામાં આવ્યું. લગભગ ત્રણ કલાક પછી, જ્યારે હવામાન સુધર્યું, ત્યારે ફ્લાઇટ ફરી શિરડી માટે રવાના થઈ અને બધા મુસાફરોને સુરક્ષિત રીતે તેમના ગંતવ્ય પર પહોંચાડવામાં આવ્યા.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ