વરસાદની આગાહી / રાજકોટમાં રેડ એલર્ટ વચ્ચે સતત 8 કલાકથી વરસાદ, શહેરમાં 2.5 ઈચ ખાબક્યો, ધોરાજીના રસ્તાઓ નદી બન્યા

Rajkot Heavy Rain Forecast : રાજકોટમાં રેડ એલર્ટ વચ્ચે મેઘરાજાએ રાતભર જમાવટ બોલાવી છે. શહેરમાં સતત 8 કલાકથી ધીમીધારે વરસાદ વરસી રહ્યો છે, જ્યારે અનેક વિસ્તારોમાં અંદાજે 2.5 ઇંચ વરસાદ નોંધાયો છે. બીજી તરફ સમગ્ર જિલ્લામાં પણ વરસાદે હાજરી નોંધાવી છે. જસદણમાં સૌથી વધુ 38 મીમી વરસાદ નોંધાતા ખેડૂતોમાં ખુશી જોવા મળી રહી છે, જ્યારે દિવસભર ભારે વરસાદની આગાહીને પગલે મનપા અને જિલ્લા તંત્ર એલર્ટ મોડમાં આવી ગયું છે.

રાજકોટ શહેરમાં ગત રાત્રિથી શરૂ થયેલો વરસાદ વહેલી સવાર સુધી અટકવાનું નામ લેતો નથી. મવડી રોડ, રેસકોર્સ રોડ, કાલાવડ રોડ, 150 ફૂટ રિંગ રોડ, ગોંડલ રોડ સહિત શહેરના મુખ્ય માર્ગો પર સતત વરસાદી માહોલ જોવા મળી રહ્યો છે. લાંબા સમયથી ગરમી અને બફારાથી પરેશાન લોકોને વરસાદે રાહત આપી છે, પરંતુ ભારે વરસાદની આગાહીને કારણે વહીવટી તંત્રની ચિંતા પણ વધી છે.

જિલ્લાના તમામ તાલુકામાં મેઘમહેર

છેલ્લા 24 કલાકમાં રાજકોટ જિલ્લાના તમામ તાલુકાઓમાં વરસાદ નોંધાયો છે. સવારના 6 વાગ્યા સુધીના સત્તાવાર આંકડા મુજબ સૌથી વધુ વરસાદ જસદણ તાલુકામાં નોંધાયો છે.

તાલુકાવાર વરસાદના આંકડા

• જસદણ – 38 મીમી
• કોટડા સાંગાણી – 31 મીમી
• વિંછીયા – 31 મીમી
• ગોંડલ – 29 મીમી
• જામકંડોરણા – 26 મીમી
• લોધિકા – 25 મીમી
• જેતપુર – 19 મીમી
• રાજકોટ શહેર – 18 મીમી
• ધોરાજી – 15 મીમી
• પડધરી – 13 મીમી
• ઉપલેટા – 7 મીમી

ધોરાજીમાં ધોધમાર વરસાદથી રસ્તાઓ પર પાણી ફરી વળ્યાં

રાજકોટની સાથે ધોરાજીમાં પણ મોડી રાત્રે વરસાદે જોર પકડ્યું હતું. શહેરના અનેક વિસ્તારોમાં ધોધમાર વરસાદ વરસતા મુખ્ય માર્ગો પર પાણી ફરી વળ્યાં હતા. સતત વરસાદના કારણે વાતાવરણમાં ઠંડક પ્રસરી ગઈ છે અને લોકોને ગરમીમાંથી મોટી રાહત મળી છે.

રેડ એલર્ટ બાદ મનપા-તંત્ર એક્શનમાં

હવામાન વિભાગે રાજકોટ સહિત સમગ્ર સૌરાષ્ટ્રમાં ભારેથી અતિભારે વરસાદની આગાહી સાથે રેડ એલર્ટ જાહેર કર્યું છે. આગાહીને ધ્યાનમાં રાખીને રાજકોટ મહાનગરપાલિકા અને જિલ્લા વહીવટી તંત્ર સંપૂર્ણ એલર્ટ મોડમાં આવી ગયું છે. નીચાણવાળા વિસ્તારોમાં પાણી ભરાવાની શક્યતાને ધ્યાનમાં રાખીને કંટ્રોલ રૂમ સક્રિય કરવામાં આવ્યા છે. મનપાની ટીમોને સ્ટેન્ડબાય રાખવામાં આવી છે અને સંવેદનશીલ વિસ્તારો પર સતત મોનિટરિંગ શરૂ કરવામાં આવ્યું છે.

આ પણ વાંચો : દક્ષિણ ગુજરાત બાદ હવે સૌરાષ્ટ્રનો વારો, સુરેન્દ્રનગરમાં ચેકડેમ તૂટ્યો, મોરબી-રાજકોટમાં જળબંબાકાર

ખેડૂતોમાં ખુશી, પરંતુ આજનો દિવસ ભારે

રાજકોટ જિલ્લામાં સમયસર વરસાદ પડતાં ખેડૂતોમાં ખુશીનો માહોલ જોવા મળી રહ્યો છે. જોકે હવામાન વિભાગે આજે પણ ભારેથી અતિભારે વરસાદની આગાહી વ્યક્ત કરી હોવાથી નદી-નાળા, નીચાણવાળા વિસ્તારો અને પાણી ભરાવાની સંભાવના ધરાવતા સ્થળોએ ખાસ સાવચેતી રાખવા તંત્રએ લોકોને અપીલ કરી છે. મેઘરાજાની આ મેરેથોન હજુ અટકવાની શક્યતા ઓછી છે. રેડ એલર્ટ વચ્ચે રાજકોટ માટે આજનો દિવસ પણ ભારે રહી શકે છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ