ઓપરેશન ડેલ્ટા હન્ટ / ગુજરાત પોલીસનું હાઇટેક મેગા ઓપરેશન, 6200 શંકાસ્પદ લોકો રડારમાં

ગુજરાત પોલીસ દ્વારા રાજ્યભરમાં એકસાથે ‘ઓપરેશન ડેલ્ટા હન્ટ’ હાથ ધરવામાં આવ્યું છે. આ કોઈ સામાન્ય પોલીસ ઓપરેશન નહોતું, પરંતુ હાઇટેક ટેકનોલોજી અને ડેટા ડ્રિવન પોલીસિંગનું મહત્વપૂર્ણ ઉદાહરણ બન્યું છે. આ ઓપરેશનનો મુખ્ય હેતુ રાજ્યમાં ઘૂસણખોરો અને ગેરકાયદેસર રીતે રહેતા લોકો સામે અસરકારક કાર્યવાહી કરવાનો હતો. સમગ્ર રાજ્યમાં એક સાથે કાર્યવાહી થતાં સુરક્ષા એજન્સીઓએ સુનિયોજિત આયોજન અને આધુનિક ટેકનોલોજીનો ઉપયોગ કરીને કામગીરીને સફળ બનાવી છે.

પાયો આશરે સાત મહિના પહેલા

આ સમગ્ર ઓપરેશનનો પાયો આશરે સાત મહિના પહેલા નખાયો હતો. મુખ્યમંત્રી સેન્ટર ઓફ એક્સિલન્સ દ્વારા ટેકનિકલ અને ડેટા ડ્રિવન પોલીસિંગ અંગે સૂચન આપવામાં આવ્યું હતું. આ સૂચનાના આધારે સમગ્ર કામગીરીની શરૂઆત કરવામાં આવી હતી. ત્યારબાદ રાજ્યના DGP દ્વારા આ મિશનને ‘ઓપરેશન ડેલ્ટા હન્ટ’ નામ આપવામાં આવ્યું હતું. આ અભિયાનને સફળ બનાવવા માટે સેન્ટર ઓફ એક્સિલન્સ, સ્ટેટ આઈબી, ક્રાઇમ બ્રાન્ચ, સાયબર સેલ તેમજ તમામ જિલ્લા અને શહેરોની એસઓજીની ટીમોએ દિવસ-રાત મહેનત કરી હતી. રાજ્ય સ્તરે એન્ટી ટેરરિસ્ટ સ્ક્વોડ (ATS)એ પણ આ કામગીરીમાં મહત્વપૂર્ણ ભૂમિકા ભજવી હતી.

ગુપ્ત માહિતીના આધારે શરુ

આ ઓપરેશન કોઈ ચોક્કસ બાતમી અથવા ગુપ્ત માહિતીના આધારે શરૂ કરવામાં આવ્યું નહોતું. ગુજરાત પોલીસની ટેકનિકલ ટીમે અત્યંત આધુનિક પ્રો-એક્ટિવ ડેટા એનાલિટિક્સ પદ્ધતિનો ઉપયોગ કર્યો હતો. સમયાંતરે વિવિધ સ્ત્રોતોમાંથી ડેટા એકત્રિત કરીને તેનું ઝીણવટપૂર્વક વિશ્લેષણ કરવામાં આવ્યું હતું. ત્યારબાદ મળેલા રો ડેટા પર કોરોબોરેટિવ કામગીરી કરવામાં આવી, હ્યુમન ઇન્ટેલિજન્સનો ઉપયોગ કરવામાં આવ્યો તેમજ કમ્યુનિકેશન પેટર્નના આધારે શંકાસ્પદ સંપર્કોની ઓળખ કરવામાં આવી. આ સમગ્ર પ્રક્રિયાના પ્રથમ તબક્કામાં જ આશરે 6,200 ટાર્ગેટ્સ સામે આવ્યા હતા, જેની માહિતી રાજ્યની તમામ સંબંધિત યુનિટ્સ સાથે તાત્કાલિક શેર કરવામાં આવી હતી.

ઓપરેશનનો સૌથી મોટો પડકાર

આ સમગ્ર ઓપરેશનનો સૌથી મોટો પડકાર મેદાનમાં કાર્યરત ફિલ્ડ યુનિટ્સ સામે હતો. મળેલી માહિતીના આધારે તમામ શંકાસ્પદ લોકો સુધી ઝડપથી પહોંચવું અને એકસાથે કાર્યવાહી કરવી સરળ નહોતી. તેમ છતાં વિવિધ પોલીસ ટીમોએ સુમેળભર્યા આયોજન સાથે સમગ્ર રાજ્યમાં એક જ સમયે કામગીરી શરૂ કરી હતી. દરેક જિલ્લાની ટીમો સતત સંપર્કમાં રહીને માહિતીના આધારે સ્થળ પર કાર્યવાહી કરતી રહી હતી.

ઓપરેશનની સૌથી મહત્વપૂર્ણ અને ચોંકાવનારી બાબત

આ ઓપરેશનની સૌથી મહત્વપૂર્ણ અને ચોંકાવનારી બાબત એ રહી કે સમગ્ર રાજ્યમાં એક જ સમયે કાર્યવાહી શરૂ કરવામાં આવી હતી. કોઈપણ શંકાસ્પદ વ્યક્તિ અથવા ઘૂસણખોર રાજ્યમાંથી ભાગી ન જાય તે માટે રેલવે સ્ટેશનો, બસ સ્ટેન્ડ, હાઇવે તેમજ તમામ એક્ઝિટ પોઇન્ટ્સ પર કડક નાકાબંધી કરવામાં આવી હતી. પોલીસની સતર્કતા અને સચોટ આયોજનના કારણે 18થી 20 જેટલા લોકોને ભાગતા ઝડપી પાડવામાં આવ્યા હતા.

આ પણ વાંચો : શાપર 2.49 કરોડના લૂંટ કેસમાં પોલીસને મળી સફળતા, મધ્યપ્રદેશથી 3ને દબોચ્યા

ગુજરાત પોલીસના આ ઓપરેશને ટેકનોલોજી અને આધુનિક પોલીસિંગના સમન્વયનું ઉત્તમ ઉદાહરણ પૂરું પાડ્યું છે. ડેટા એનાલિટિક્સ, હ્યુમન ઇન્ટેલિજન્સ અને વિવિધ સુરક્ષા એજન્સીઓના સંકલિત પ્રયાસોથી રાજ્યવ્યાપી કાર્યવાહી સફળ રહી છે. ‘ઓપરેશન ડેલ્ટા હન્ટ’ને ગુજરાત પોલીસની એક મહત્વપૂર્ણ અને સુનિયોજિત કાર્યવાહી તરીકે જોવામાં આવી રહ્યું છે, જેમાં ટેકનોલોજી આધારિત પોલીસિંગ દ્વારા ઘૂસણખોરો સામે અસરકારક પગલાં લેવામાં આવ્યા છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ